Abraham—Mawu Huɛ

NYU Afua a se ɔ, hehi nɛ nihi ya hi ɔ a kpɛti kake ji Ur. Ur ba plɛ ma ngua nɛ he biɛ kɛ e mi tsuhi nɛ ngɛ fɛu. Se mabi ɔmɛ jaa wɔ. Ja kɛ̃ nɛ a pee benɛ a ngɛ Babel ɔ. Nihi nɛ ngɛ Ur kɛ Babel be kaa Noa kɛ e binyumu Shem nɛ́ a ya nɔ sɔmɔ Yehowa a.

Nyagbe ɔ, anɔkuafo Noa gbo ngɛ nyu afua a se jeha 350. E nɔ jeha enyɔ se pɛ kɛkɛ nɛ a fɔ nyumu ɔ nɛ o ngɛ hyɛe ngɛ foni ɔ mi ɔ. E ji nɔmlɔ pɔtɛɛ ko ha Mawu. A tsɛɛ lɛ Abraham. E kɛ e weku ɔ hi Ur ma a mi.

Ligbi ko ɔ, Yehowa de Abraham ke: ‘Jee Ur kɛ o wekuli a kpɛti, nɛ ma tsɔɔ mo ma nɛ o ya hi mi.’ Anɛ Abraham bu Mawu tue nɛ e je níhi tsuo nɛ haa lɛ bua jɔmi ngɛ Ur he lo? Ee, e pee ja. Akɛnɛ Abraham bu Mawu tue ngɛ nɔ́ tsuaa nɔ́ mi heje nɛ a tsɛɛ lɛ Mawu huɛ ɔ nɛ.

Abraham wekuli komɛ piɛɛ e he kɛ je Ur ma a mi. E tsɛ Tera piɛɛ e he kɛ ho. Nɛ jã kɛ̃ e nyɛminyumu bi Lot hu kɛ lɛ ho. Abraham yo nɛ ji Sara hu piɛɛ e he. Be komɛ a se ɔ, mɛ tsuo a ya su he ko nɛ a tsɛɛ ke Haran, nɛ lejɛ ɔ Tera gbo ngɛ. A kɛ Ur ma a kpɛti kɛ saminya.

Be bɔɔ se ɔ, Abraham kɛ e weku ɔ je Haran nɛ a ba su he ko nɛ a tsɛɛ Kanaan. Yehowa de Abraham ngɛ lejɛ ɔ ke: ‘Zugba nɛ ɔ ma ngɔ kɛ ha o bimɛ ɔ nɛ.’ Abraham hi Kanaan ngɛ bo tsuhi a mi.

Mawu ye bua Abraham nɛ e ba ná tohi kɛ lohwehi kpahi babauu, kɛ sɔmɔli fuu. Se e kɛ e yo Sara be bi.

Benɛ Abraham ye jeha 99, Yehowa de lɛ ke: ‘I ngɛ mo si woe kaa o ma ba pee jemahi babauu a tsɛ.’ Se, nɛ́ Abraham kɛ e yo Sara be bi ɔ, kɛ enɛ ɔ ma plɛ kɛ ba mi kɛɛ?