NÍ KASEMI 43
Yoshua Ba Pee Hɛ Mi Nyɛɛlɔ
MOSE suɔ kaa e kpaka Israelbi ɔmɛ kɛ ya Kanaan zugba a nɔ. Lɔɔ he ɔ, e bi Yehowa ke: ‘Yehowa, mo ha ma po Yordan Pa a, konɛ ma na zugba kpakpa a.’ Se Yehowa de lɛ ke: ‘E hiɛ! Koo tu munyu nɛ ɔ hu!’ O le nɔ́ nɛ ha Yehowa de jã lo?
Nɔ́ nɛ ya nɔ benɛ Mose ngɔ e tso ɔ kɛ fia tɛsa a heje nɛ Yehowa de jã ngɛ ɔ nɛ. Mo kai kaa, Mose kɛ Aaron kɛ anunyami ha we Yehowa. A de we Israelbi ɔmɛ kaa Yehowa ji nɔ nɛ ma ha nyu ɔ maa je tɛsa a mi kɛ ba ha mɛ. Enɛ ɔ he ɔ, Yehowa de kaa e be hae nɛ a ya Kanaan zugba a nɔ.
Lɔɔ heje ɔ, nyɔhiɔ bɔɔ ngɛ́ Aaron gbenɔ ɔ se ɔ, Yehowa de Mose ke: ‘Ngɔɔ Yoshua kɛ ya da osɔfo nɔkɔtɔma Eleazar, kɛ ma a tsuo hɛ mi. Mo de mɛ tsuo kaa Yoshua ji a hɛ mi nyɛɛlɔ ehe.’ Mose pee bɔnɛ Yehowa de lɛ ɔ pɛpɛɛpɛ kaa bɔnɛ o ngɛ hyɛe ngɛ foni ɔ mi ɔ.
Jehanɛ ɔ, Yehowa de Yoshua ke: ‘O he nɛ wa, nɛ koo ye gbeye. Mo ji nɔ nɛ ma kpaka Israelbi ɔmɛ kɛ ya Kanaan zugba nɛ i wo mɛ si kaa ma ngɔ kɛ ha mɛ ɔ nɔ. Nɛ ma fĩ o se.’
Pee se ɔ, Yehowa de Mose ke e kuɔ kɛ ya Nebo Yoku ɔ nɛ́ ngɛ Moab zugba a nɔ ɔ yi mi. Enɛ ɔ ma ha Mose he blɔ konɛ e na Kanaan zugba nɛ́ ngɛ fɛu ɔ ngɛ tsitsaa Yordan Pa a se. Yehowa de lɛ ke: ‘Zugba a nɛ i wo Abraham, Isak kɛ Yakob si kaa ma ngɔ kɛ ha a nina ji nɛ ɔ nɛ. I ha nɛ o na zugba a, se o be nɔ yae.’
Mose gbo ngɛ Nebo Yoku ɔ yi mi. E ye jeha 120. E ngɛ nɔmlɔtso mi he wami, nɛ e hɛngmɛhi hu ngɛ nɔ́ hyɛe saminya. Mabi ɔmɛ ye aywilɛho nɛ a fo ya, ejakaa Mose gbo. Se a ba ná bua jɔmi kaa Yoshua maa pee a hɛ mi nyɛɛlɔ ehe.