Mɛni Heje Nɛ Nɔ Sisimi Ngɛ Nɔ Yae Loloolo?

MUNYU nɛ ɔ ha nɛ wa na nɔ́ nɛ jeɔ adesa nɔ yemi mi kɛ baa. Adesa nɔ yemi lɛ ngɔ nɔ́ nami kɛ haomihi fuu nɛ ngɛ je ɔ mi ɔ kɛ ba. Kɛ je blema a, nihi nɛ a hɛɛ juɛmi kpakpa a bɔ mɔde kaa a ma ha nɛ níhi nɛ ya nɔ pɛpɛɛpɛ, se nɔ́ nɛ pɔɔ bami mohu ji, a kɛ a he ya woɔ hɛ tsumi kɛ nɔ sisimi ní peepeehi a mi. Mɛni heje nɛ e ngɛ jã a? Mɛni heje nɛ nɔ sisimi ngɛ nɔ yae loloolo ɔ? Nɔ́ heje ji, níhi etɛ nɛ nyɛɛ se nɛ ɔ ngɛ nihi a nɔ he wami náe ngɛ blɔ yaya nɔ.

1. Yayami.

Baiblo ɔ de heii kaa wɔ tsuo wa “ngɛ yayami he wami sisi.” (Romabi 3:9) ‘Yayami su nɛ ngɛ wa mi’ ɔ ngɛ kaa hiɔ ko nɛ hí tsami nɛ wa ná kɛ je fɔmi mi. Kɛ je blema tɔɔ nɛ yayami ‘ye adesahi a nɔ matsɛ.’ Yayami “mlaa” a ngɛ ní tsue ngɛ wa mi loloolo. Yayami nɛ ngɛ wa he ɔ ha nɛ nihi fuu foɔ mɛ pɛ a nɔ́ mi kekle, loo a kɛ a juɛmi maa helo nya níhi loo blɔ nya nɛ a ma ná a nɔ titli, konɛ a kɛ ha nɛ ni komɛ nɛ a na nɔ́.—Romabi 5:21; 7:17, 20, 23, 25.

2. Je ɔ nɛ wa ngɛ mi ɔ.

Hɛ tsumi kɛ nɔ nitsɛ e nɔ́ mi fomi hyi je nɛ wa ngɛ mi ɔ mi tɔ. Enɛ ɔ ha nɛ e yee ha ni komɛ kaa a maa je ekpa ngɛ nihi nɛ bɔle mɛ ɔ a he. Nɔ nitsɛ e nɔ́ mi fomi ha nɛ nihi fuu suɔ wawɛɛ kaa a ná blɔ nya. Jehanɛ se hu ɔ, a suɔ nɛ a ná sika kɛ helo nya níhi fuu pe bɔnɛ a hia. Aywilɛho sane ji kaa a suɔ kaa a sisi nihi konɛ a nyɛ nɛ a su oti nɛ ɔmɛ nɛ a kɛ ma a hɛ mi ɔ he. Nimli nɛ ɔmɛ ‘nyɛɛɔ nihi fuu a se’ mohu pe nɛ a maa yu a he ngɛ su yaya nɛ ɔmɛ a he.—2 Mose 23:2.

3. Satan Abosiami.

Satan nɛ ji mumi mi bɔ nɔ́ nɛ tsɔ atua a ngɛ ‘nihi tsuo sisie ngɛ je ɔ mi.’ (Kpojemi 12:9) Ke e ngɛ nihi sisie ɔ, e bua jɔɔ. E ma nyɛ maa gu ga blɔ nɔ konɛ e ha nɛ suɔmi nɛ wa ngɛ kaa wa ma ná helo nya níhi kɛ si himi kpakpa a mi nɛ wa, konɛ lɔɔ nɛ ha nɛ waa sisi nihi.

Anɛ lɔɔ tsɔɔ kaa e sa nɛ waa bu Satan tue nɛ waa pee nɔ́ tsuaa nɔ́ nɛ e ma de wɔ ke waa pee ɔ lo? Dɛbi! Wa maa kase nɔ́ heje nɛ wa ha heto ke dɛbi ɔ ngɛ munyu nɛ nyɛɛ se ɔ mi.