Mɛni Heje E Sa Nɛ O Bua Nɛ Jɔ Baiblo ɔ He ɔ?

Baiblo ɔ ji womi ko nɛ pɔhe pe womi kpahi tsuo ngɛ je ɔ mi. Mɛni heje? Nɔ́ kake ji kaa e mi munyu ɔmɛ a sisi numi yi. Nihi nɛ a tu a he munyu ngɛ Baiblo ɔ mi ɔ ji nihi nɛ a hi si hyɛ nitsɛnitsɛ. Baiblo ɔ tsɔɔ bɔnɛ a kɛ a sibi hi si ha, kɛ bɔnɛ a kɛ Mawu hu hi si ha. Wa ma nyɛ maa kase ní kɛ je nimli nɛ ɔmɛ a he. A kɛ munyunguhi nɛ a sisi numi yi nɛ ngma nimli nɛ ɔmɛ a he sane kɛ wo Baiblo ɔ mi. Enɛ ɔ he ɔ, a ma nyɛ maa tsɔɔ Baiblo ɔ sisi kɛ ya gbihi lafahi abɔ mi, konɛ nihi nɛ a ngɛ he tsuaa he ngɛ be saisaa ko mi ɔ, nɛ a nu sisi. Wa ma nyɛ maa ngɔ sisi tomi mlaahi nɛ ngɛ Baiblo ɔ mi ɔ kɛ tsu ní be tsuaa be.

Nɔ́ nɛ he hia pe kulaa a, pi Mawu he munyu kɛkɛ nɛ Baiblo ɔ tu, e ji womi nɛ je Mawu ngɔ hulɔ. E tsɔɔ wɔ Mawu biɛ, e suhi, kɛ yi mi tomi nɛ e kɛ bɔ zugba a kɛ adesahi. E tsɔɔ kaa Mawu yi mi tomi ɔ tsakee we. Jehanɛ se hu ɔ, Baiblo ɔ tsɔɔ kaa kɛ je blema a, nihi bɔɔ mɔde wawɛɛ kaa a kɛ kpakpa peemi maa ye yayami nɔ kunimi. E tsɔɔ sane ko nɛ kɔɔ nɔ nɛ e sa kaa e ye je mluku ɔ nɔ ɔ he. E tsɔɔ kaa sane nɛ ɔ maa ba nyagbe ngɛ bua jɔmi mi. Ke waa kɛ juɛmi nɛ da kane Baiblo ɔ, lɔɔ ma ha nɛ wa ma ná hemi kɛ yemi kɛ hɛ kɛ nɔ fɔmi.

Munyu komɛ ngɛ Baiblo ɔ mi nɛ o be nae ngɛ he kpa ko. Kaa nɔ hyɛmi nɔ́ ɔ, Baiblo deɔ wɔ anɔkuale nɛ kɔɔ munyuhi nɛ a nyɛɛ se nɛ ɔ a he:

• Bɔnɛ wa plɛ kɛ ba je ɔ mi kɛ nɔ́ heje nɛ wa ngɛ nɔ́ nae

• Blɔ nya nɛ Mawu to konɛ e kɛ kpɔ̃ adesahi

• Nɔ́ nɛ Yesu pee ha wɔ

• Nɔ́ nɛ maa ba zugba a nɔ, kɛ nɔ́ nɛ adesahi ma ná hwɔɔ se

Moo kane munyuhi nɛ nyɛɛ se ɔ konɛ o le níhi nɛ ngɛ Baiblo ɔ mi?