MUNYUHI NƐ A MAA KASE

Munyu nɛ ɔ nɛ wa maa kase ɔ maa ma nɔ mi kaa Yehowa ngɛ Matsɛ yee be tsuaa be. Wa maa kase bɔnɛ Yehowa yeɔ e nibɔ níhi nɛ a ngɛ hiɔwe kɛ zugba a nɔ ɔ a nɔ ha hulɔ. Ni kasemi nɛ ɔ hu maa wo wɔ he wami konɛ waa kase nihi nɛ a hi si blema nɛ a ja Yehowa kaa a neneene Matsɛ ɔ.

Munyu nɛ ɔ ma ha nɛ wa bua maa jɔ níhi nɛ Mesia Matsɛ ɔ nyɛ pee ngɛ e jeha 100 nɔ yemi ɔ mi ɔ he wawɛɛ. E maa wo wa ti nɔ tsuaa nɔ he wami konɛ e kɛ anɔkuale yemi nɛ e fĩ Matsɛ Yemi ɔ se, nɛ e ma ha nɛ wa ma susu nɔ́ nɛ jeha 2014 jeha ngmami ɔ tsɔɔ nitsɛnitsɛ ɔ he.

Mɛni ma pee ngɛ ye si himi mi? Enɛ ɔ ji sane bimi nɛ he hia nɛ e sa kaa nɔ tsuaa nɔ nɛ e jɔɔ e he nɔ kɛ ha Yehowa a nɛ e bi e he. Ngɛ munyu nɛ ɔmɛ nɛ wa maa kase ɔ a mi ɔ, wa ma susu sisi tomi mlaahi nɛ maa ye bua nihewi kɛ yihewi nɛ a ji Kristofoli ɔ konɛ a nyɛ nɛ a ngɔ a tsui tsuo kɛ sɔmɔ Mawu ɔ he. Ní kasemi nɛ ɔ hu ma ha nɛ waa na he blɔhi nɛ Kristofoli nɛ a wa ngɛ jeha mi ɔ ma nyɛ ma ná kɛ bli a sɔmɔmi nítsumi ɔ mi.

Mwɔnɛ ɔ, níhi nɛ ngɛ nɔ yae ngɛ je ɔ mi ɔ je nihi fuu a juɛmi kɛ je nɔ́ nɛ Mawu ngɛ pee ɔ nɔ. Ni komɛ hu mɛ nitsɛmɛ a tsui nya níhi a se dimi ha we nɛ a na níhi nɛ Mawu ngɛ pee ɔ. A tsɔɔ Baiblo gbamihi etɛ nɛ ha nɛ Kristofoli ngɛ nɔ mi mami kaa e be kɛe kulaa nɛ Mawu Matsɛ Yemi ɔ ma kpata je yaya nɛ ɔ hɛ mi ɔ ngɛ munyu nɛ ɔ nɛ wa maa kase ɔ mi.