BAIBLO MI SANE BIMIHI NƐ A HA HETO

Mɛni he je nɛ e sa kaa waa sɔle?

Yehowa suɔ nɛ waa je wa tsui mi faa nɛ waa kɛ lɛ nɛ sɛɛ wa haomihi a he ní be tsuaa be. (Luka 18:1-7) E buɔ wɔ tue, ejakaa e suɔ wɔ. Yehowa nitsɛ ngɛ wɔ dee kaa waa sɔle ha lɛ. Ke jã a, lɛɛ mɛni he je nɛ wa sɔɛle ha lɛ mɔ?​—Kane Filipi Bi 4:6.

Pi kaa wa sɔleɔ kɛ biɔ Yehowa nɔ́ ko kɛkɛ, mohu ɔ, ke wa sɔleɔ ɔ haa lɛ ɔ, e haa nɛ huɛ bɔmi gbagbanii hii waa kɛ lɛ wa kpɛti. (La 8:3, 4) Ke waa kɛ Yehowa pɔɔ ní sɛɛmi ɔ, e ba peeɔ wa huɛ nɛ nyu bi ngɛ waa kɛ lɛ wa kpɛti.​—Kane Yakobo 4:8.

Mɛni blɔ nɔ e sa kaa waa gu kɛ sɔle?

Mawu sume kaa ke wa ngɛ sɔlee ɔ, waa tĩ munyu ko nɛ wa kase kɛ wo wa yi mi ɔ mi, aloo wa ha nɛ nihi nɛ a le kaa wa nya mi tsɔ. Wa maa da si kɛ sɔle jio, wa maa hi si jio, wa ma kpla hu si jio, lɔ ɔ he hia we Mawu. Yehowa ngɛ hlae nɛ waa sɔle kɛ je wa tsui mi tɔɔ. (Mateo 6:7) Kaa nɔ hyɛmi nɔ́ ɔ, ngɛ blema Israel ɔ, Hana sɔle ngɛ nyagba ko nɛ́ e kɛ ngɛ kpee ngɛ e weku ɔ mi ɔ he. Benɛ e ná e nyagba a nya tsaba a, e bua jɔ, nɛ e je e tsui mi nɛ e sɔle ha Mawu.​—Kane 1 Samuel 1:10, 12, 13, 26, 27; 2:1.

Moo hyɛ he blɔ nɛ se be nɛ wa ná kaa wa ma nyɛ maa sɔle kɛ ha wa Bɔlɔ ɔ ngɛ wa nyagbahi a he! Wa ma nyɛ ma je e yi, nɛ waa na lɛ si ngɛ níhi nɛ e ngɛ pee ha wɔ ɔ hu a he. Ngɛ anɔkuale mi ɔ, e sɛ nɛ waa ngɔ he blɔ nɛ wa ná nɛ ɔ kɛ fiɛ kulaa.​—Kane La 145:14-16.