Anɛ Mawu Susuɔ O He Lo?

Anɛ e sa kaa David nɛ hyɛ blɔ kaa Mawu nɛ susu e he lo? Anɛ Mawu susuɔ o he lo? E yee ha nihi fuu kaa a ma he ye kaa Mawu ope ɔ susuɔ a he. Mɛni he je?

Nɔ́ kake ji kaa Mawu nɔ kuɔ kulaa pe adesahi. Mawu naa je ma amɛ tsuo kaa ‘a ngɛ kaa nyu kɔyi kake kɛkɛ nɛ dɛ kɛ je goga mi, aloo kaa bunyuku nɛ pue sɛni nɔ.’ (Yesaya 40:15) Lingmi nɛ ɔ, womi ngmalɔ ko nɛ e tuɔ munyu kɛ siɔ Mawu jami ɔ tsɔɔ kaa “ke nɔ ko susu kaa Mawu ko ngɛ nɛ e susuɔ e he ɔ, lɛɛ jamɛatsɛ ɔ ngɛ e he sisie pɛ.”

Se ni komɛ hu susuɔ kaa ngɛ a ní peepeehi a he je ɔ, a sɛ ngɛ Mawu hɛ mi. Kaa nɔ hyɛmi nɔ́ ɔ, nyumu ko nɛ a tsɛɛ lɛ ke Jim ɔ de ke: “I sɔleɔ daa konɛ Mawu nɛ ha nɛ ma di tue mi jɔmi se, nɛ ma ye ye he nɔ. Se bɔɔ kɛ bɔɔ pɛ kɛkɛ ye mi mi fu. Nyagbe ɔ, i ma nya si kaa ye nɔ nɔmlɔ yaya ko be, enɛ ɔ he je nɛ Mawu nyɛ we nɛ e ye bua mi ɔ nɛ.”

Anɛ Mawu kɛ adesahi a kpɛti kɛ wawɛɛ nɛ lɔ ɔ he ɔ, e nyɛ we nɛ e naa mɛ lo? Kɛ Mawu naa adesahi nɛ a yi mluku ɔ ha kɛɛ? Ke pi Mawu nitsɛ nɛ tsɔɔ wɔ bɔ nɛ e ngɛ ha a, jinɛ adesa ko be lee bɔ nɛ e ngɛ ha, nɛ jã kɛ̃ nɛ wa ko li sane bimi nɛ ɔmɛ hu a heto. Se Mawu ha nɛ a ngma Baiblo ɔ ha wɔ. Baiblo ɔ ha nɛ wa le kaa Mawu kɛ adesahi a kpɛti kɛ we kulaa. Baiblo ɔ tsɔɔ hu kaa Mawu susuɔ adesahi a he. Baiblo ɔ de ke: ‘Niinɛ, Mawu kɛ wa ti nɔ tsuaa nɔ kpɛti kɛ we kulaa.’ (Bɔfo Ɔmɛ A Ní Tsumi 17:27) Mawu de ní komɛ nɛ tsɔɔ kaa e susuɔ wa ti nɔ tsuaa nɔ he. Mo hu o piɛɛ he. Wa ma susu jamɛ a ní ɔmɛ a he ngɛ munyu eywiɛ nɛ nyɛɛ se ɔ mi.