Mɛnɔ Bɔ Mawu?

Moo po munyu nɛ ɔ he foni ngɛ o juɛmi mi nɛ o hyɛ. Tsɛ ko kɛ e binyumu nɛ e ye jeha kpaago ngɛ ní sɛɛe. Tsɛ ɔ de e bi ɔ ke, “Blema lokoo nɛ Mawu bɔ je ɔ kɛ e mi nɔ́ tsuaa nɔ́. Lɛ nɛ e bɔ pu, nyɔhiɔ, kɛ dodoe ɔmɛ.” Bi ɔ susu nɔ́ nɛ e tsɛ ɔ de lɛ ɔ he bɔɔ, kɛkɛ nɛ e bi e tsɛ ɔ ke, “Papaa, mɛnɔ bɔ Mawu?”

Tsɛ ɔ ha e bi ɔ heto ke, “Tsa pi nɔ ko nɛ e bɔ Mawu. E ngɛ kɛ je blema.” Heto nɛ ɔ ha nɛ jokuɛ ɔ tsui nɔ e mi lolo. Se benɛ jokuɛ ɔ ba bɔni wami ɔ, e yi mi tɛ̃ lɛ ngɛ heto nɛ e tsɛ ɔ ha lɛ ɔ he. E nui sisi kaa nɔ ko ngɛ nɛ lɛɛ lɛɛ tsa pi nɔ ko nɛ e bɔ lɛ, ejakaa je ɔ po ɔ, nɔ ko lɛ e bɔ. E bi e he ke, ‘Kɛ Mawu plɛ kɛ ba si himi kɛɛ?’

Kɛ Baiblo ɔ ha sane bimɛ nɛ ɔ heto ha kɛɛ? E ha sane bimi nɛ ɔ heto kaa bɔ nɛ tsɛ ɔ ha e bi ɔ heto ɔ. Mose ngma ke: ‘Yehowa, benɛ o ná we nɛ o bɔ yo ɔmɛ; benɛ o ná we nɛ o bɔ je ɔ, mo ji Mawu nɛ ngɛ kɛ je neneene kɛ yaa si neneene.’ (La 90:1, 2) Jã kɛ̃ nɛ gbalɔ Yesaya hu de ke: ‘Anɛ o li lo? Anɛ o nui lolo lo? Yehowa ji nɔ nɛ ngɛ daa kɛ yaa daa; lɛ ji nɔ nɛ bɔ je ɔ tsuo’! (Yesaya 40:28) Jã kɛ̃ nɛ Yuda hu tsɔɔ ngɛ e sɛ womi ɔ mi kaa Mawu ngɛ kɛ je “blema lokoo.”​—Yuda 25.

Ngmami nɛ ɔmɛ tsɔɔ kaa Mawu ji “neneene Matsɛ” kaa bɔ nɛ bɔfo Paulo kale lɛ ɔ. (1 Timoteo 1:17) Enɛ ɔ tsɔɔ kaa Mawu ngɛ momoomo, nɛ e maa hi si hu kɛ maa ya neneene. (Kpojemi 1:8) Enɛ ɔ he ɔ, Ope ɔ, be sisije, nɛ e be nyagbe hulɔ.

Mɛni he je nɛ e yee ha wɔ kaa wa maa nu munyu nɛ ɔ sisi ɔ? Ejakaa wa se kɛ we ngɛ je mi nɛ wa gbo ɔ. Enɛ ɔ he ɔ, e slo bɔ nɛ wa buɔ be ha ngɛ bɔ nɛ Yehowa buɔ be ha a he. Akɛnɛ Mawu ngɛ kɛ yaa neneene he je ɔ, jeha akpe ngɛ kaa ligbi kake ngɛ e hɛ mi. (2 Petro 3:8) Nɔ́ hetomi nɔ́ ko ji nɛ ɔ nɛ: Baalɛ yeɔ ligbi 50 pɛ kɛkɛ e gbo. Enɛ ɔ he ɔ, ke a de baalɛ kaa nɔmlɔ yeɔ jeha 70 aloo 80 ɔ, anɛ e maa nu sisi lo? E be sisi nue gblee! Baiblo ɔ tsɔɔ kaa ke a kɛ wɔ to wa Bɔlɔ Ngua a he ɔ, wa ngɛ kaa baalɛhi kɛkɛ. Baiblo ɔ tsɔɔ hu kaa e susumi ɔmɛ hu pã wa susumi ɔmɛ kulaa. (Yesaya 40:22; 55:8, 9) Enɛ ɔ he ɔ, e sɛ nɛ e pee wɔ nyakpɛ kaa adesahi nui bɔ nɛ Yehowa ngɛ ha a sisi fitsofitso.

Eko ɔ, e maa ye kaa waa maa nu sisi kaa Mawu ngɛ momoomo, nɛ e maa hi si hu kɛ ya neneene. Se sisi numi ngɛ he. Kaa nɔ ko nɛ bɔ Mawu ɔ, jinɛ jamɛatsɛ ɔ lɛ ko pee Bɔlɔ ɔ nɛ. Se Baiblo ɔ tsɔɔ kaa Yehowa lɛ “bɔ níhi tsuo.” (Kpojemi 4:11) Jehanɛ se hu ɔ, wa le kaa be ko nɛ be ɔ, je mluku ɔ be. (1 Mose 1:1, 2) Lɛɛ kɛ je mluku ɔ plɛ kɛ ba kɛɛ? Nɔ ko lɛ bɔ. Enɛ ɔ tsɔɔ kaa nɔ nɛ bɔ je mluku ɔ ngɛ momoomo loko e ba bɔ je ɔ. E ngɛ momoomo loko e bɔ e Bi kake ɔ kɛ hiɔwe bɔfo ɔmɛ hulɔ. (Hiob 38:4, 7; Kolose Bi 1:15) Enɛ ɔ tsɔɔ kaa be ko nɛ be ɔ, lɛ pɛ nɛ e ngɛ. Nɔ ko be nyɛe maa bɔ lɛ, ejakaa nɔ ko sɛ we e hlami.

Wami mi nɛ wa ngɛ ɔ, kɛ je mluku ɔ tsuo nɛ ngɛ ɔ, maa nɔ mi kaa Mawu ko ngɛ momoomo, nɛ e maa hi si hu kɛ ya neneene. E sa nɛ Nɔ nɛ ha nɛ je mluku agbo nɛ ɔ ngɛ si bɔlee, nɛ e wo mlaahi nɛ ngɛ je mluku ɔ kudɔe ɔ, nɛ hi si kɛ ya neneene. Lɛ pɛ nɛ e ma nyɛ ma ha níhi tsuo nɛ a ngɛ je ɔ mi ɔ wami.​—Hiob 33:4.