Nɔ́ He Je Nɛ Wa Hia Kpɔmi

Kɛ je blema lokoo nɛ adesahi suɔ nɛ a hi si daa kaa nihewi kɛ yihewi nɛ a ngɛ nɔmlɔ tso mi he wami kpakpa. Se aywilɛho sane ji: Wa gbo ɔ. Hiob tu anɔkuale munyuhi nɛ ngɛ yi nɔ ɔ jeha akpe etɛ kɛ se ji nɛ ɔ.

Adesahi tsuo ngɛ je kɛ wɛ ɔ suɔ nɛ a hi si kɛ ya neneene. Baiblo ɔ deɔ wɔ ke Mawu ngɔ neneene wami he suɔmi kɛ wo wa tsui mi konɛ wa bua nɛ jɔ kaa wa maa le nɔ́ nɛ ji neneene wami. (Fiɛlɔ 3:11, NW) Ke jã a, anɛ o susu kaa Mawu nɛ ngɛ suɔmi ɔ kɛ nɔ́ ko nɛ wa nine be nyɛe maa su nɔ maa wo wa tsui mi lo? Ke o ha heto ke dɛbi ɔ, o heto ɔ da. Mawu Munyu ɔ tsɛɔ gbenɔ ke he nyɛlɔ, nɛ Mawu wo si kaa e “ma kpata e hɛ mi.”​—1 Korinto Bi 15:26.

Atsinyɛ jemi ko be he kaa gbenɔ ji he nyɛlɔ. Nɔ ko be nɛ e bua jɔ he. Ke wa na kaa oslaa ko ma a, wa jee lejɛ ɔ, wa laa wa he, aloo wa tuu fo. Ke wa be he wami ɔ, wa hlaa hiɔ tsami. Wa peeɔ bɔ tsuaa bɔ nɛ wa ma nyɛ konɛ wa ko pee níhi nɛ ma ha nɛ wa gbo.

Anɛ wa ngɛ nɔ́ nɛ wa ma nyɛ maa da nɔ kɛ he ye kaa a ma kpata blema he nyɛlɔ nɛ ɔ hɛ mi lo? Ee, nɔ́ ko ngɛ. Yehowa Mawu nɛ ji Bɔlɔ ɔ bɔɛ adesahi nɛ a hi si jehahi bɔɔ ko nɛ a gbo. Gbenɔ piɛɛ we yi mi tomi nɛ Mawu kɛ bɔ adesa a he. E yi mi tomi ji kaa adesahi nɛ a hi si ngɛ zugba a nɔ kɛ ya neneene, nɛ nɔ́ tsuaa nɔ́ nɛ e to kaa e maa pee ɔ maa ba mi.​—Yesaya 55:11.

Lɛɛ, kɛ e maa pee kɛ kpata gbenɔ hɛ mi ha kɛɛ? Kɛ je blema nɛ adesahi bɔ mɔde kaa a ma je gbenɔ kɛ je, se a yi manye. A ngɛ mɔde bɔe ngɛ wa be nɛ ɔ mi hulɔ. Je mi si kpali pee tsopahi konɛ a kɛ nu hiɔ komɛ a nya. A pee níhi a mi hlami ngɛ adebɔ níhi nɛ wami ngɛ a mi ɔmɛ a mi. Ngɛ hehi fuu ɔ, adesahi a se kɛɛ ngɛ je mi mwɔnɛ ɔ pe jeha lafa nɛ be ɔ. Se kɛ̃ ɔ, a nyɛ we nɛ a je gbenɔ. Kaa bɔ nɛ Baiblo ɔ de ɔ, “zu mi lɛ mɛ tsuo a maa kpale kɛ ya.”​—Fiɛlɔ 3:20.

Bua jɔmi sane ji kaa, e he hia we kaa waa ngɔ wa hɛ kɛ fɔ adesahi a nile nɔ kaa e ma tsu haomi nɛ ngɛ kɛ je blema nɛ ɔ he ní. Yehowa Mawu to blɔ nya nɛ e kɛ ma he wa yi wami loo e kɛ ma kpɔ wɔ kɛ je gbenɔ mi ɔ momo, nɛ nɔ titli nɛ ngɛ blɔ nya tomi nɛ ɔ mi ji Yesu Kristo.