Nihi Fuu Ma Ná Yi Baami Ngɛ Nyagbe ɔ Mi​—Mo Hu O ma Nyɛ Ma Ná Yi Baami

Baiblo ɔ ha nɛ wa le kaa a ma kpata ni komɛ a hɛ mi ngɛ nyagbe ɔ mi: ‘Haomi ngua maa ba nɛ a nɛ́ eko hyɛ kɛ je be nɛ a bɔ je ɔ, kɛ ba si mwɔnɛ ɔ ligbi nɛ ɔ. Nɛ ke a pui jamɛ a ligbi ɔmɛ a nɔ kpiti ɔ, jinɛ adesa ko adesa ko yi be wami nae.’ (Mateo 24:21, 22) Se Mawu wo si kaa nihi babauu ma ná yi baami: ‘Je ɔ bee kɛ yaa, se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.’​—1 Yohane 2:17.

Je ɔ bee kɛ yaa, lɔ ɔ he ɔ, ke o ngɛ hlae nɛ o ná yi baami nɛ ‘o hi si kɛ ya neneene’ ɔ, lɛɛ mɛni e sa kaa o pee? Anɛ e sa kaa o bɔni he lo nya níhi a nya buami lo? Dɛbi. Baiblo ɔ woɔ wɔ he wami wawɛɛ nɛ waa kɛ otihi nɛ da nɛ ma wa hɛ mi. E de ke: “Akɛnɛ ní nɛ ɔmɛ tsuo pɛpɛɛpɛ a hɛ mi ma kpata kikɛ nɛ ɔ, lɛɛ kɛ e sa kaa nyɛɛ ba nyɛ je mi kɛɛ? E sa kaa nyɛɛ pee klɔuklɔu nɛ nyɛɛ ngɔ nyɛ he ngɔ ha Mawu, konɛ nyɛɛ hi Mawu ligbi ɔ blɔ hyɛe.” (2 Petro 3:10-12) Munyu nɛ ɔ tsɔɔ kaa nɔ yemihi ngɛ je yaya nɛ ɔ mi kɛ nihi nɛ fĩ se mohu pe Mawu nɔ yemi ɔ piɛɛ “ní nɛ ɔmɛ tsuo” nɛ a hɛ mi ma kpata a he. E ngɛ heii kaa ke wa bua he lo nya níhi a nya a, lɔ ɔ be wa yi wami hee ngɛ hɛ mi kpatami nɛ ma a mi.

Ngɛ anɔkuale mi ɔ, loko wa ma ná yi baami ɔ, jã wa suɔ Yehowa Mawu, nɛ wa kase bɔ nɛ wa maa ba wa jemi ha nɛ maa sa e hɛ mi. (Zefania 2:3) E sa nɛ waa “hi Mawu ligbi ɔ blɔ hyɛe” mohu pe nɛ wa ma ya nyɛɛ nihi fuu a se, nɛ wa ma wa hɛ kɛ fɔ okadihi nɛ ngɛ heii nɛ tsɔɔ kaa wa ngɛ nyagbe ligbi ɔmɛ a mi ɔ nɔ. Yehowa Odasefohi ma nyɛ maa tsɔɔ mo kɛ je Baiblo ɔ mi bɔ nɛ o ma plɛ kɛ ná yi baami ngɛ nyagbe ɔ nɛ ma a mi.