Sane Bimi Nɛ E Heto Hami Yee

NIHI hɛɛ susumi slɔɔtoslɔɔtohi ngɛ wami kɛ gbenɔ he. Ni komɛ susuɔ kaa ke a gbo ɔ, a maa ya nɔ maa hi wami mi kaa bɔ nɔ́ kpa aloo ngɛ he ko. Ni komɛ hu susuɔ kaa ke a gbo ɔ, a ma ba blaa. Nɛ ni komɛ hu susuɔ kaa gbenɔ poɔ wami se kulaa.

Eko ɔ, bɔ nɛ a tsɔse mo ha, loo he nɛ a tsɔse mo ngɛ ɔ ha nɛ e slo nɔ́ nɛ mo hu o heɔ yeɔ ngɛ sane nɛ ɔ he. Akɛnɛ nihi hɛɛ susumi ekpaekpa ngɛ si fɔfɔɛ nɛ ni gbogboehi ngɛ mi ɔ he je ɔ, wa ma bi ke, jije wa ma ná sane bimi nɛ ɔ heto nɛ da nɛ taa nɔ tsui he ngɛ? Aloo mɛnɔ nɛ e ma nyɛ ma ha wɔ sane bimi nɛ ɔ heto nɛ da nɛ taa nɔ tsui he?

Jami hɛ mi nyɛɛli kɛ jehahi babauu tsɔɔ kaa ke adesa gbo ɔ, e klaa gbo we. Nihi nɛ a ngɛ jami nɛ nihi le wawɛɛ kaa Kristo jami, Hindu jami, Yuda jami, Klamɔ jami, kɛ jami kpahi a mi ɔ heɔ yeɔ kaa ke nɔ gbo ɔ, e klaa a lɛɛ e gbo we. Mohu ɔ, e yaa nɔ nɛ e hii si ngɛ mumihi a je ko. Ngɛ Buda jami mi ɔ, a tsɔɔ kaa ke nɔ ko ba blaa aloo a fɔ nɔ ko nɛ gbo ɔ si abɔ ɔ, e juɛmi nya bli ɔ wawɛɛ, nɛ e náa he wami loo bua jɔmi slɔɔto ko nɛ hí kalemi. A tsɛɛ si fɔfɔɛ nɛ ɔ ke Nirvana.

Tsɔɔmi nɛ ɔmɛ ha nɛ nihi babauu ngɛ je ɔ mi ɔ ba he ye kaa ke nɔ ko gbo ɔ, e ya tsaa si himi ɔ nɔ ngɛ je ekpa ko mi. Ngɛ nihi fuu a blɔ fa mi ɔ, gbenɔ ji nɔ́ ko nɛ he hia ngɛ adesahi a si himi mi. A naa gbenɔ kaa e ji Mawu blɔ nya tomi. Se mɛni nɛ Baiblo ɔ de ngɛ sane nɛ ɔ he? Wa kpa mo pɛɛ nɛ o kane munyu nɛ nyɛɛ se ɔ. Eko ɔ, heto ɔ maa pee mo nyakpɛ.