Anɛ O le Lo?

Blema a, mɛni blɔ nɔ a guɔ nɛ a kɛ la jeɔ he kake kɛ yaa he kake?

MUNYU nɛ ngɛ 1 Mose 22:6 tsɔɔ kaa benɛ Abraham yaa sã afɔle ngɛ he ko tsitsaa a, e “ngɔ lɛ́ ɔ nɛ a kɛ maa sã bɔ ɔ ngɔ tloo Isak, nɛ lɛ nitsɛ lɛɛ e hɛɛ ha kɛ nɔ́ nɛ a kɛ ma slɛ la a.”

Nɔ́ ko be Ngmami ɔ mi nɛ tsɔɔ bɔ nɛ a plɛɔ kɛ slɛɔ la ha blema a. Ngɛ Abraham sane nɛ ɔ mi ɔ, ke e hí kulaa a, Baiblo mi ní lelɔ ko tsɔɔ kaa ‘e he maa wa kaa Abraham kɛ Isak kɛ la nɛ ngɛ tsoe maa po jamɛ a blɔ gagaa a.’ Enɛ ɔ he ɔ, eko ɔ, nɔ́ nɛ a ngɛ he munyu tue ɔ ji níhi nɛ a kɛ ma slɛ la.

Se ni kpahi hu tsɔɔ kaa, blema a, e be gbɔjɔɔ kaa nɔ ko ma slɛ la. Nɔ́ nɛ nihi pɔɔ peemi ji kaa, ke e maa hi ɔ, a ya jeɔ la ngɛ nihi nɛ a kɛ mɛ wo paka a a ngɔ mohu pe nɛ a ma slɛ la ngɛ a dɛ he. Enɛ ɔ he ɔ, Baiblo mi ní leli fuu tsɔɔ kaa nɔ́ nɛ a kɛ slɛɔ la nɛ Abraham wo ɔ ji ngɛyu aloo zu buɛ ko nɛ kpã ngɛ he, nɛ́ a je la nɛ a slɛ gbɔkuɛ ɔ eko kɛ wo mi. (Yes. 30:14) Ke a hɛɛ la kɛ hia blɔ ɔ, be fɛɛ be nɛ a suɔ ɔ, a ma nyɛ maa ngɔ nga gbigbli kɛ pue nɔ konɛ e tso.