Anɛ O Le Lo?

Anɛ blema Israel bi ɔmɛ da Mose Mlaa a nɔ kɛ dla nyagbahi nɛ baa ngɛ ní tsumi mi ɔ niinɛ lo?

A PEE jã be komɛ. Ha nɛ wa susu nɔ hyɛmi nɔ́ ko he nɛ waa hyɛ. Mose womi nɛ ji enuɔ, yi 24 kuku 14 kɛ 15 ɔ de ke: ‘Koo sisi apaatsɛ ohiatsɛ nɛ e fĩ lɛ, o nyɛmi Israel no jio, nubwɔ nɛ ngɛ o ma amɛ eko mi jio. . . . Ke o wui lɛ hiɔ, nɛ e fa kue ha Yehowa ngɛ nɔ́ nɛ o pee nɛ ɔ he ɔ, a maa bu mo fɔ kaa o pee yayami.’

Sane ko ba ngɛ jeha lafa kpaago ɔmɛ a mi loko a fɔ Kristo, nɛ a ngma ngɛ buɛ ko he. Níhi a mi hlali ya na ngɛ he ko nɛ e kɛ Ashdod ma a he kɛ we. Eko ɔ, a ngma kɛ ha apaatsɛ ko nɛ a po e nya kaa e nyɛ we nɛ e kpa ní kaa bɔ nɛ a tsɔɔ kaa e pee ɔ. A ngma ngɛ buɛ ɔ he ke: “Benɛ o tsɔlɔ ɔ kpa ní kɛ wo gba mi ligbi bɔɔ se ɔ, Hoshayahu nɛ ji Shobay bi ɔ ba kpɔ̃ o tsɔlɔ ɔ tade klɔii ɔ ngɛ e dɛ. . . . Ye huɛmɛ nɛ i kɛ mɛ tsu ní ngɛ pu ɔ nɔ́ ɔ ma nyɛ maa ye odase. . . kaa nɔ́ nɛ i de ɔ ji anɔkuale. Enɛ ɔ he ɔ, i yi fɔ ngɛ sane nɛ ɔ mi. . . . Ke amlaalo ɔ susu kaa e sɛ nɛ a kpale ye tade ɔ ba ha mi ɔ, i kpa mo pɛɛ nɛ o na mi mɔbɔ! E sɛ nɛ o hyɛ nɛ o tsɔlɔ ɔ nɛ hɛɛ e he gu.”

Yi nɔ sane ngmalɔ ko nɛ a tsɛɛ lɛ ke Simon Schama de ngɛ tsɔlɔ ɔ pɛɛ kpami ɔ he ke: “Enɛ ɔ tsɔɔ wɔ níhi fuu pe apaatsɛ nɛ e hao nɛ e ngɛ hlae nɛ a kpale [e tade] kɛ ha lɛ. E tsɔɔ wɔ kaa pɛɛ kpalɔ ɔ le Baiblo mi mlaa nɛ ngɛ 3 Mose kɛ 5 Mose nɛ tuɔ munyu kɛ siɔ ohiatsɛmɛ nɛ a waa mɛ yi mi ɔ.”