Bɔ Nɛ Fiɛɛmi Ní Tsumi ɔ Je Sisi Ha Ngɛ Portugal

BENƐ Nyɛminyumu George Young ngɛ mele ko mi kɛ yaa Yuropa nɛ oslɔke ngɛ kue kɛ ngɛ mele ɔ náe ɔ, Nyɛminyumu Young hɛ mi pee bua jɔmi. E bɔni bɔ nɛ Matsɛ Yemi fiɛɛmi ní tsumi ɔ wo yiblii ha ngɛ Brazil loko e je ɔ he susumi.a Se be bɔɔ se ɔ, e bɔni ní tsumi ehe nɛ a kɛ wo e dɛ ɔ hu he susumi. E yaa fiɛɛ Matsɛ Yemi sɛ gbi ɔ ngɛ zugba kpɔhi nɛ a fiɛɛ we ngɛ mi hyɛ ɔ ngɛ Spain kɛ Portugal. E pee e juɛmi kaa ke e ya a, e maa to blɔ nya konɛ Nyɛminyumu J. F. Rutherford nɛ ba tu Baiblo mi munyuhi ngɛ lejɛ ɔ, konɛ a gba dɛ womi 300,000!

Benɛ Nyɛminyumu Young ya su Lisbon ngɛ jeha 1925 ɔ mi ɔ, e na kaa ma a mi jɔɛ kulaa. Ma mi bi ɔmɛ te si kɛ wo ma nɔ yelɔ ɔ ngɛ jeha 1910 mi, nɛ a je nɔ yelɔ ɔ ngɛ sɛ ɔ nɔ, nɛ blɔ nya nɛ Katolik bi ɔmɛ hɛɛ ɔ hu je a dɛ. Ma mi bi ɔmɛ ba ná he yemi, se kɛ̃ ɔ, ma a mi jɔɛ.

Benɛ Nyɛminyumu Young to blɔ nya konɛ Nyɛminyumu Rutherford nɛ ba a, ni komɛ ka nɔ yelɔ ɔ fieemi ngɛ sɛ ɔ nɔ, enɛ ɔ he ɔ, amlaalo ɔ fã kaa ta buli nɛ a bu ma a he mohu pe polisihi. British and Foreign Bible Society womi ngmalɔ ɔ de Nyɛminyumu Young ke nɔ yemi ɔ maa te si kɛ wo lɛ wawɛɛ, se Nyɛminyumu Young pee kã nɛ e to blɔ nya kɛ ha Nyɛminyumu Rutherford bami ɔ. E ya bi blɔ, nɛ a ha lɛ tsu ko ngɛ Camões Nɔ Tsami Sukuu ɔ!

Kɛkɛ nɛ May 13, ligbi nɛ Nyɛminyumu Rutherford ma ba tu Baiblo mi munyu ɔ ba su. Nihi hyɛ jamɛ a ligbi ɔ blɔ wawɛɛ, ejakaa a ngma munyuyi nɛ ji “Bɔ Nɛ O Maa Pee Ha Konɛ O Hi Si Ngɛ Zugba a Nɔ Kɛ Ya Neneene” ɔ kɛ mɛtɛ gbogbohi a he ngɛ ma a mi, nɛ a kɛ wo adafi fiami womihi hu a mi. Oya nɔuu nɛ jami hɛ mi nyɛɛli ɔmɛ hu ngma munyu ko ngɛ adafi fiami womi ko mi kɛ bɔ nihi kɔkɔ kaa “lakpa gbali” ba ma a mi. Si temi kɛ woli ɔmɛ ba gba womihi ngɛ he nɛ Nyɛminyumu Rutherford maa tu munyu ɔ ngɛ ɔ. Womi ɔ tu munyu kɛ si Nyɛminyumu Rutherford tsɔɔmi ɔmɛ.

Se kɛ̃ ɔ, nihi maa pee 2,000 hyi tsu ɔ mi tɔ. Akɛnɛ nane mami he po be he je ɔ, a ha nɛ nihi babauu kpale kɛ ho we mi ya. Tue buli komɛ nɛ a bua jɔ munyu ɔ he ɔ kuɔ kɛ da kpɔ mi gbɔlemi klama ko nɔ, nɛ ni komɛ hu kpla kpa komɛ a he ngɛ tsu ɔ mi.

Si temi kɛ woli ɔmɛ ka blɔ nya tomi ɔ gbɛmi. A pee basabasa, nɛ a ngɔ sɛ ɔmɛ kɛ fiaa si. Se Nyɛminyumu Rutherford pee blɛuu, nɛ e kuɔ kɛ da okplɔɔ ko nɔ konɛ tue buli ɔmɛ nɛ a nu e gbi. E gbe e munyu ɔ nya nyɔ mi kpɛti, nɛ nihi 1,200 kɛ se nɛ́ a bua jɔ munyu ɔ he ɔ ngɔ a biɛhi kɛ adrɛs kɛ ha konɛ a hi mɛ Baiblo kasemi womihi hae. E nɔ jena a, a ngma munyu ko ngɛ adafi fiami womi ko nɛ a tsɛɛ kɛ O Século ɔ mi kɛ kɔ munyu nɛ Nyɛminyumu Rutherford tu ɔ he.

Jinɛ a tsɔɔ Hwɔɔmi Mɔ ɔ sisi kɛ yaa Portugal gbi mi ngɛ Brazil. Se ngɛ September 1925 ɔ mi ɔ, a bɔni Hwɔɔmi Mɔ ɔ peemi ngɛ Portugal ma a mi. Jamɛ a be ɔ mi ɔ, nyɛmi ko nɛ e ngɛ Brazil nɛ a tsɛɛ lɛ ke Virgílio Ferguson ɔ bɔni blɔ nya tomi kaa e maa hia kɛ ya Portugal konɛ e ya ye bua kɛ tsu Matsɛ Yemi ní tsumi ɔ. Jinɛ e kɛ Nyɛminyumu Young tsuɔ ní ngɛ Baiblo Kaseli ɔmɛ a ní tsumi kɔni nyafii ko nɛ ngɛ Brazil ɔ. E kɛ we nɛ Virgílio kɛ e yo Lizzie ya piɛɛ Nyɛminyumu Young he ngɛ Portugal. Nyɛminyumu Ferguson ya su lejɛ ɔ ngɛ be nya, ejakaa e kɛ we nɛ Nyɛminyumu Young hia kɛ je lejɛ ɔ kɛ ya fiɛɛ ngɛ he kpahi nɛ Soviet Union hu piɛɛ he.

Benɛ ta buli ɔmɛ fiee Portugal nɔ yelɔ ɔ ngɛ sɛ ɔ nɔ ɔ, nyɛmimɛ ɔmɛ kɛ si temi kɛ womi fuu kpe. Se enɛ ɔ wui Nyɛminyumu Ferguson he gbeye, e hi ma a mi. E po nyɛmimɛ bɔɔ nɛ a ngɛ ma a mi ɔ a he piɛ, nɛ e ye bua mɛ nɛ a kɛ kã tsu fiɛɛmi ní tsumi ɔ. E bi blɔ ngɛ amlaalo ɔ ngɔ konɛ a ngmɛ blɔ nɛ a pee asafo mi kpehi ngɛ e we ɔ mi. Ngɛ October 1927 ɔ, a ha lɛ jamɛ a he blɔ ɔ.

Benɛ ta buli ɔmɛ ngɛ ma a nɔ yee ɔ, e we kekleekle jeha a, nihi maa pee 450 sɛɛ Hwɔɔmi Mɔ ɔ ngɛ Portugal. Jehanɛ hu ɔ, a gu dɛ womihi kɛ womiyohi a nɔ kɛ gbɛ anɔkuale ɔ kɛ fĩa ngɛ mahi nɛ Portugal yeɔ a nɔ ɔ mi. Ma nɛ ɔmɛ ji Angola, Azores, Cape Verde, East Timor, Goa, Madeira kɛ Mozambique.

Ngmɔ hulɔ ko nɛ e ji Portugal no nɛ a tsɛɛ lɛ ke Manuel da Silva Jordão ba Lisbon ma a mi ngɛ jeha 1929 ɔ mi. Benɛ e ngɛ Brazil ɔ, e nu magbɛ nɔ munyu ko nɛ Nyɛminyumu Young tu ɔ. E ba yɔse kaa anɔkuale ɔ ji nɛ ɔ nɛ. Enɛ ɔ he ɔ, e to kaa e maa ye bua Nyɛminyumu Ferguson konɛ a fiɛɛ ngɛ mahi fuu a nɔ. Manuel bɔni sɔmɔmi kaa blɔ gbalɔ. Akɛnɛ a to blɔ nya saminya kɛ ha Baiblo kasemi womihi a fiami kɛ a gbami ngɛ lejɛ ɔ he je ɔ, Lisbon asafo ehe nɛ a to sisi ɔ ya hɛ mi mlamlaamla!

Ngɛ jeha 1934 ɔ mi ɔ, e he ba hia nɛ Nyɛminyumu kɛ Nyɛmiyo Ferguson nɛ a kpale kɛ ho Brazil ya. Se nɔ́ nɛ he hia ji kaa, a du anɔkuale ɔ kɛ wo Portugal bi ɔmɛ a tsui mi. Benɛ a ngɛ Spania Ta a, kɛ Je Mi Ta enyɔne ɔ hwue ɔ, nyɛmimɛ nɛ a ngɛ Portugal ɔ ya nɔ nɛ a ye Yehowa anɔkuale. E ba su he ko ɔ, a ba pee kaa kane mi tako nɛ ngɛ tsoe sulii, se ngɛ jeha 1947 ɔ mi, benɛ ma se sane kpakpa fiɛɛlɔ John Cooke nɛ e gbe Gilead Sukuu ɔ nya a ya lejɛ ɔ, e wo mɛ kã, nɛ a la a kpɛ wawɛɛ. Lɔ ɔ se ɔ, sane kpakpa fiɛɛli ɔmɛ a yibɔ ya hɛ mi wawɛɛ. Benɛ amlaalo ɔ tsi Yehowa Odasefohi a ní tsumi nya ngɛ jeha 1962 ɔ mi po ɔ, a yibɔ ya hɛ mi. Ngɛ December 1974 ɔ mi benɛ a kplɛɛ Yehowa Odasefo ɔmɛ a nɔ ngɛ mlaa nya a, fiɛɛli a he ba hiɛ pe 13,000.

Mwɔnɛ ɔ, fiɛɛli nɛ a ngɛ Mawu Matsɛ Yemi ɔ he sane kpakpa a fiɛɛe ngɛ Portugal kɛ zugba kpɔhi nɛ wo bɔle mɛ nɛ a tuɔ Portugal gbi ɔ, kaa Azores kɛ Madeira a, a he hiɛ pe 50,000. Fiɛɛli nɛ ɔmɛ a kpɛti ni komɛ ji nihi nɛ a bu Nyɛminyumu Rutherford magbɛ nɔ munyu ɔ tue ngɛ jeha 1925 ɔ mi ɔ a bibimɛ.

Wa naa Yehowa kɛ nyɛmimɛ nyumuhi kɛ yihi nɛ a je ní tsumi ɔ sisi kɛ kã, nɛ a tsu ní kaa ‘Kristo Yesu sɔmɔli kɛ ha je ma amɛ’ ɔ si wawɛɛ.​—Rom. 15:15, 16.​—A je ngɛ wa yi nɔ sane womihi a mi ngɛ Portugal.