Ngɔɔ Baiblo ɔ Kɛ Tsu Ní Kɛ He Bemi
1. Mɛni heje Baiblo ɔ he hia wawɛɛ ɔ?
1 Mawu Munyu ɔ nɛ waa kɛ ma tsu ní kɛ he bemi ɔ maa ye bua wɔ nɛ waa fiɛɛ loo waa tsɔɔ anɔkuale ɔ nɛ e mi nɛ tɛ, konɛ wa kpa lakpa tsɔɔmihi kɛ nimli a kɔhi a he bo.—2 Tim. 2:15; 1 Pet. 3:15.
2. Mɛni maa ye bua wɔ konɛ wa he nɛ be kɛ ngmami hlami?
2 Moo Le Baiblo ɔ Mi Saminya: Ke o le nítsumi dade ko he ga saminya a, o nyɛɔ nɛ o kɛ tsuɔ ní kɛ he bemi. Baiblo mluku ɔ nɛ o maa kane ɔ ma ha nɛ o na munyu oti nɛ ngɛ Baiblo ɔ mi ɔ. Enɛ ɔ peemi hu maa ye bua mo konɛ o kai ngmamihi, nɛ o bli mɛ mla. Ke o le Ngmami ɔ mi saminya a, o kɛ kã kɛ nɔ mi mami maa tu munyu benɛ o ngɛ tlukaa odase yee kɛ benɛ o ya fiɛɛmi.—1 Tes. 1:5.
3, 4. (a) Mɛni ji blɔ komɛ a nɔ nɛ wa maa gu konɛ waa le Baiblo ɔ mi saminya? (b) Anɛ o gu blɔ kpa ko nɔ nɛ o kɛ le Ngmami ɔ mi lo?
3 Ke wa ya nikasemi nɛ a tsɛ ngmami ko ɔ, ha nɛ e pee o su kaa o ma bli o Baiblo ɔ nɛ o nyɛɛ nikanemi ɔ se. Ke o ngɛ o dɛhe nikasemi pee, loo o ngɛ o he dlae kɛ ha asafo mi kpe ɔ, kane ngmamihi nɛ a tsɛ se ɔ nɛ o susu bɔnɛ o kɛ ma tsu ní ha a he. Nihi fuu yɔse kaa ngmamihi nɛ a kaneɔ kɛ jee Baiblo ɔ mi tɛɛ ɔ yeɔ bua mɛ nɛ a kaiɔ he nɛ ngmami ɔmɛ ngɛ mla ke a ngɛ hlae nɛ a kɛ tsu ní ngɛ fiɛɛmi mi, pe ke a kane ngɛ computer loo womi nɔ.—Yoh. 14:26.
4 Weku komɛ to be nɛ a kɛ kaseɔ Baiblo mi ngmamihi kɛ woɔ a yi mi. A poɔ womi tsɔwihi nɛ a ngmaa ngmami ɔmɛ ngɛ hɛ mi, kɛ a mi munyu ɔmɛ ngɛ se. A ti nɔ tsuaa nɔ hyɛɛ kaa e ma nyɛ ma kai ngmami ko mi munyu loo he nɛ a je kɛ je lo. Fiɛɛmi yami munyuhi nɛ wa ma nylɔ a mi kɛ munyuhi nɛ nihi tleɔ si nɛ wa maa kase bɔnɛ waa kɛ Baiblo ɔ ma ha heto ɔ ma ha nɛ wa he maa be.
5. Mɛni heje e sa kaa wa he nɛ be ngɛ bɔnɛ waa kɛ Baiblo ɔ tsuɔ ní ha a mi?
5 Womi kpa ko be nɛ se nami ngɛ he kaa Baiblo ɔ. E mi pɛ nɛ munyuhi nɛ haa nihi ‘leɔ ní konɛ a he a yi wami’ ɔ ngɛ. (2 Tim. 3:15) Akɛnɛ nihi babauu nɛ ngɛ wa zugba kpɔ ɔ mi li anɔkuale munyuhi nɛ a se be nɛ ngɛ Baiblo ɔ mi heje ɔ, sisi numi ngɛ he kaa wa ma ha nɛ wa he maa be kɛ tsɔɔ mɛ nɔ́ tutuutu nɛ Baiblo ɔ tsɔɔ.—Abɛ 2:1-5.