Kaimi ɔ He Nine Fɔmi Womi Nɛ A Ma Gba Ngɛ Je ɔ Mi Tsuo!

1. Mɛni nítsumi klɛdɛɛ ko lɛ a ma tsu ngɛ je ɔ mi tsuo loko a maa pee Kaimi ɔ?

¹ “Nyɛɛ pee enɛ ɔ nɛ nyɛ kɛ kai mi.” (Luka 22:19) Akɛnɛ Yehowa jali kɛ nihi nɛ a ngɛ munyu ɔ he bua jɔmi ɔ buɔ fami nɛ ɔ nɛ Yesu kɛ ha a tue heje ɔ, a ma bua a he nya ngɛ March 30, 2010 konɛ a kai Yesu gbenɔ ɔ. Wa ma gba Kaimi ɔ he nine fɔmi womi klɛdɛɛ ngɛ je ɔ mi tsuo kɛ je March 13 kɛ ya si March 30.

2. Mɛni blɔ nɔ wa maa gu nɛ wa maa ngɔ nine fɔmi womi ɔ kɛ ha?

² Bɔnɛ O Maa Pee Lɛ Ha: O ma nyɛ maa ngɔ nine fɔmi womi ɔ kɛ ha wetsɛ ɔ bɔnɛ pee nɛ e hyɛ foni ɔ nɛ ngɛ womi ɔ hɛ mi ɔ. Lɔɔ se ɔ, mo de lɛ ke: “Nihi ayɔhi abɔ nɛ a ngɛ je ɔ mi tsuo ma bua a he nya ngɛ March 30 gbɔkuɛ nɛ́ a kai Yesu gbenɔ ɔ. I ba nɛ ma ba ha o kɛ o weku ɔ nine fɔmi womi nɛ ɔ konɛ nyɛɛ ba. O huɛmɛ hu ma nyɛ maa ba. I kpa mo pɛɛ nɛ o kadi be kɛ he nɛ a maa pee Kaimi ɔ ngɛ ɔ.” O ma nyɛ maa kane Luka 22:19 kɛ je Baiblo ɔ mi kɛ tsɔɔ wetsɛ ɔ fami nɛ ngɛ Ngmami ɔ mi ɔ, ke e hia kaa o pee jã. Se, ha nɛ e hi o juɛmi mi kaa, be bɔɔ pɛ wa ngɛ kɛ ha nine fɔmi womi ɔ gbami ngɛ zugba kpɔ ɔ mi, enɛ ɔ heje ɔ, e maa hi wawɛɛ kaa o maa po o munyu ɔ kpiti.

3. Mɛnɔmɛ nine wa ma nyɛ maa fɔ?

³ Ke zugba kpɔ nɛ nyɛ asafo ɔ fiɛɛɔ ngɛ mi ɔ kle ɔ, asafo mi nikɔtɔma amɛ ma nyɛ ma de nyɛ konɛ nyɛ si womi ɔ eko ngɛ nihi nɛ be we mi ɔ a sinyahi a nya. Ngɛ be nɛ sa mi ɔ, nyɛɛ ngɔ womi tɛtlɛɛ ɔmɛ kɛ piɛɛ nine fɔmi womi ɔ he kɛ ha. Nyɛɛ bɔ mɔde nɛ nyɛɛ fɔ nihi nɛ nyɛ ya slaa mɛ, nyɛ Baiblo kaseli, nihi nɛ nyɛɛ kɛ tsuɔ ní, nihi nɛ nyɛɛ kɛ yaa sukuu, nyɛ wekuli, nyɛ kpɔ ɔ mi bi, kɛ ni kpahi nɛ nyɛ le mɛ ɔ nine.

4. Hɛsa nɛ wa ngɛ ha suɔmi nɛ Yehowa je kpo ha wɔ kɛ gu kpɔmi nɔ́ ɔ nɛ e kɛ ha a nɔ ɔ maa wo wɔ gɛjɛmi nɛ wa maa pee mɛni?

⁴ Dla O He Nɛ O Ngɔ O He Kɛ Wo Mi Kɛ Pi Si: Kaimi be ɔ ji be nɛ hi wawɛɛ nɛ wa ma nyɛ ma bli wa fiɛɛmi nítsumi ɔ mi. Anɛ o ma nyɛ maa pee tsakemi ngɛ o be ɔ he bɔnɛ pee nɛ o sɔmɔ kaa blɔ gbali a walɔ lo? Anɛ o ngɛ bimɛ loo Baiblo mi nikaseli nɛ a ngɛ hɛ mi yae ngɛ Mawu jami mi lo? Ke jã a, lɛɛ mo de nikɔtɔma amɛ nɛ a hyɛ keji e maa hi kaa a ngɔ a he kɛ wo nítsumi klɛdɛɛ nɛ ɔ mi kaa fiɛɛli nɛ kpaako a maa baptisi mɛ. E sa nɛ hɛsa nɛ wa ngɛ ha suɔmi nɛ Yehowa je kpo ha wɔ kɛ gu kpɔmi nɔ́ ɔ nɛ e ngɔ kɛ ha a nɔ ɔ nɛ wo wɔ gɛjɛmi konɛ waa ya Kaimi ɔ, nɛ jehanɛ se hu ɔ, waa fɔ nihi babauu nɛ wa ma nyɛ nine kɛ ba.—Yoh. 3:16.