‘A Maa Fiɛɛ Sane Kpakpa Nɛ ɔ’!
1. Kɛ wa plɛ kɛ le kaa nɔ ko nɔ ko be nyɛe maa tsi fiɛɛmi nítsumi ɔ nya kɛɛ?
1 Nɔ́ ko nɔ́ ko be nɛ ma nyɛ ma puɛ Yehowa yi mi tomi. (Yes. 14:24) Nihi ma nyɛ ma susu kaa Manyadalɔ Gideon kɛ nyumuhi 300 nɛ piɛɛ e he ɔ be nyɛe maa ye Midian ta buli 135,000 a nɔ kunimi mohu, se Yehowa de lɛ ke: “Ya kpɔ Israel kɛ je Midian dɛ mi. Imi nitsɛ lɛ i tsɔ mo.” (Many. 6:14) Mɛni ji nítsumi nɛ Yehowa fiɔ se mwɔnɛ ɔ? Yesu de ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo.” (Mat. 24:14) Nɔ ko nɔ ko be nyɛe maa tsi nítsumi nɛ ɔ nya!
2. Mɛni heje nɛ wa ma nyɛ maa hyɛ blɔ kaa Yehowa maa ye bua wɔ kaa ni kakaakahi ngɛ wa sɔmɔmi nítsumi ɔ mi ɔ?
2 Yehowa Yeɔ Bua Wɔ Kaa Ni Kakaakahi: Ngɛ be mi nɛ wa ngɛ nɔ mi mami kaa Yehowa ma ha nɛ e we Odasefoli ɔmɛ maa ye manye kaa kuu ɔ se ɔ, anɛ wa ma nyɛ maa hyɛ blɔ kaa Yehowa maa ye bua wɔ kaa ni kakaakahi lo? Benɛ bɔfo Paulo ya je si himi nɛ mi wa mi ɔ, e nu he kaa Yehowa gu Yesu nɔ kɛ ye bua lɛ. (2 Tim. 4:17) Jã nɔuu kɛ̃ nɛ wɔ hu wa ma nyɛ ma ná nɔ mi mami kaa Yehowa maa jɔɔ mɔde nɛ wa ti nɔ tsuaa nɔ ngɛ bɔe kakaaka kaa e maa pee Yehowa suɔmi nya ní ɔ nɔ.—1 Yoh. 5:14.
3. Mɛni si fɔfɔɛ komɛ a mi lɛ Yehowa yeɔ bua wɔ ngɛ?
3 Anɛ daa ligbi si himi mi hiami níhi a he susumi haa nɛ o kɔni mi jɔɔ ngɛ sɔmɔmi nítsumi ɔ he lo? “Ni nɛmɛ nɛ gbɔjɔ, nɛ pɔ tɔ mɛ ɔ, e haa mɛ he wami.” (Yes. 40:29-31) Anɛ o kɛ yi mi wami, loo si temi kɛ womi ngɛ kpee lo? ‘Ngɔɔ o haomi ɔmɛ kɛ ha Yehowa nɛ e maa bu o he.’ (La 55:22) Anɛ be komɛ ngɛ nɛ gbeye nuɔ mo lo? “Moo ya. Ma ha o nya mi ma tsɔ.” (2 Mose 4:11, 12) Anɛ hiɔ ha nɛ o nyɛ we nɛ́ o pee babauu ngɛ sɔmɔmi nítsumi ɔ mi lo? Yehowa bua jɔɔ bɔɔ nɛ o jeɔ o tsui tsuo mi kɛ tsuɔ ɔ he.—1 Kor. 3:6, 9.
4. Hɛ kɛ nɔ fɔmi nɛ́ wa ma ná ngɛ Yehowa mi ɔ ma ha nɛ waa pee mɛni?
4 ‘Yehowa kpa e nine mi nɛ mɛnɔ ma nyɛ maa kɔ mi?’ (Yes. 14:27) Akɛnɛ wa ngɛ nɔ mi mami kaa Yehowa maa jɔɔ wa sɔmɔmi nítsumi ɔ nɔ heje ɔ, nyɛ ha nɛ waa ya nɔ nɛ waa kɛ ‘kã nɛ fiɛɛ’ daa.—Níts. 14:3.