E Sa Kaa Kristofoli Nɛ A Sɔle
1. Mɛni he hia wɔ loko wa ma nyɛ ma tsu wa sɔmɔmi nítsumi ɔ?
1 Wa be nyɛe ma tsu sɔmɔmi nítsumi ɔ ngɛ wa dɛhe. Yehowa lɛ haa wɔ he wami nɛ waa kɛ tsuɔ. (Fil. 4:13) E haa nɛ e bɔfo ɔmɛ piɛɛɔ wa he kɛ hlaa nihi nɛ a ngɛ kaa jijɔhi. (Kpoj. 14:6, 7) Yehowa ji nɔ nɛ haa nɛ anɔkuale wuhi nɛ wa duɔ nɛ́ wa pueɔ nɔ nyu ɔ waa. (1 Kor. 3:6, 9) E he hia wawɛɛ kaa wɔ Kristofoli waa ngɔ wa hɛ kɛ fɔ wa hiɔwe Tsɛ ɔ nɔ ngɛ sɔlemi mi!
2. Mɛni ji ní komɛ nɛ sa kaa waa sɔle kɛ bi?
2 Kɛ Ha Wɔ Nitsɛmɛ Wa He: Be tsuaa be nɛ wa maa ya fiɛɛmi ɔ, e sa kaa waa sɔle. (Efe. 6:18) Mɛni ji ní komɛ nɛ e sa kaa waa sɔle kɛ bi? Wa ma nyɛ maa sɔle konɛ wa ná nihi nɛ a ngɛ wa zugba kpɔ ɔ mi ɔ a he juɛmi kpakpa. Wa ma nyɛ maa sɔle konɛ Mawu nɛ e wo wɔ kã hulɔ. (Níts. 4:29) Wa ma nyɛ ma de Yehowa konɛ e tsɔɔ wɔ blɔ kɛ ya nihi nɛ ngɛ anɔkuale ɔ he bua jɔmi nɛ waa kɛ mɛ ma nyɛ maa kase Baiblo ɔ a ngɔ. Ke wetsɛ ɔ bi wɔ sane ko ɔ, wa ma nyɛ maa sɔle kpiti ngɛ wa yi mi nɛ́ wa bi Yehowa nɛ e ye bua wɔ konɛ wa ha lɛ heto nɛ pi si. (Neh. 2:4) Jehanɛ se hu ɔ, wa ma nyɛ ma bi lɛ konɛ e ha wɔ nile bɔnɛ pee nɛ waa ngɔ sɔmɔmi nítsumi ɔ kɛ pee nɔ́ titli ngɛ wa si himi mi. (Yak. 1:5) Jehanɛ ɔ, ke wa naa Yehowa si ngɛ he blɔ ngua nɛ e kɛ ha wɔ kaa waa pee e sɔmɔli ɔ he ɔ, e náa bua jɔmi.—Kol. 3:15.
3. Mɛni blɔ nɔ sɔlemi nɛ wa sɔleɔ kɛ haa nihi ɔ yeɔ bua nɛ fiɛɛmi nítsumi ɔ yaa hɛ mi ngɛ?
3 Kɛ Ha Nihi: E sa kaa waa sɔle ‘kɛ ha wa sibi,’ ke e maa hi po ɔ, wa tsɛ nyɛmimɛ Kristofoli a biɛ nɛ waa sɔle kɛ ha mɛ. (Yak. 5:16; Níts. 12:5) Anɛ hiɔ ha nɛ o nyɛ we nɛ o pee babauu ngɛ fiɛɛmi nítsumi ɔ mi lo? Lɛɛ moo sɔle kɛ ha nyɛmimɛ Kristofoli nɛ a ngɛ nɔmlɔtso mi he wami ɔ. Mo ko susu kɔkɔɔkɔ kaa ke o sɔle kɛ ha nihi ɔ, e be nɔ́ ko tsue! Jehanɛ se hu ɔ, e hi kaa wa maa sɔle kɛ ha ma nɔ yeli ɔmɛ konɛ a ná wa fiɛɛmi nítsumi ɔ he bua jɔmi, bɔnɛ pee nɛ wa nyɛmimɛ ɔmɛ nɛ a ‘pee a he kpoo, nɛ a hi si ngɛ tue mi jɔmi mi.’—1 Tim. 2:1, 2.
4. Mɛni heje nɛ e sa kaa waa to wa tsui si nɛ waa sɔle daa a?
4 Sane kpakpa a nɛ wa maa jaje kɛ tsɔɔ nihi ngɛ je ɔ mi tsuo ɔ ji nítsumi agbo nitsɛ. Ke wa ‘toɔ wa tsui si nɛ wa sɔleɔ daa a,’ Yehowa maa ye bua wɔ nɛ wa maa gbe nítsumi ɔ nya.—Rom. 12:12.