‘A Woɔ Nile Nguɔ Kɛ Guu E Nítsumi Nɔ’
1. Kɛ ni komɛ buu wɔ ha kɛɛ?
1 Be komɛ ɔ, eko ɔ, nihi nɛ wa fiɛɛɔ kɛ haa mɛ ɔ maa tu munyu yayahi kɛ si wɔ akɛnɛ a nui wɔ sisi loo nihi tu Yehowa Odasefoli a he munyu yaya kɛ ha mɛ ɔ heje. Eko ɔ, ní yayahi nɛ a de kɛ kɔ wa he ngɛ adafi fiami womihi a mi, TV loo radio nɔ heje nɛ mɛ hu a ná wa he juɛmi yaya a nɛ. Ngɛ he komɛ po ɔ, a wo wɔ biɛ kaa wa ji “kuu nɛ he ngɛ gbeye.” Kɛ e sa kaa waa pee wa ní ha kɛɛ ke a tu munyu yayahi kaa kikɛ ɔ kɛ si wɔ?
2. Ke nihi tu munyu yayahi kɛ si wɔ ɔ, mɛni ma nyɛ maa ye bua wɔ nɛ wa kɔni mi be jɔe?
2 O Kɔni Mi Nɛ Ko Jɔ: Nihi pɔɔ Yesu kɛ Yehowa sɔmɔli kpahi nɛ a hi si blema a, a he munyu yaya tumi nɛ a gbeɔ a he guɛ akɛnɛ a nui mɛ sisi ɔ heje. (Níts. 28:22) Se a ha we nɛ munyu yaya nɛ ɔmɛ nɛ ha nɛ a sɔmɔmi nítsumi ɔ he zo nɛ pee mɛ. Yesu de ke: “Nile ɔ lɛɛ níhi nɛ e tsuɔ ɔ, lɔ ɔmɛ a kɛ woɔ lɛ nguɔ.” (Mat. 11:18, 19) E ya nɔ nɛ e pee e Tsɛ ɔ suɔmi nya ní kɛ kã kɛ nɔ mi mami kaa nihi nɛ ngɛ anɔkuale ɔ se blɔ hlae ɔ maa na bɔnɛ sane kpakpa a he jua wa ha. Ke wa kaii kaa Mawu nitsɛ e Bi ɔ kɛ si himi kaa kikɛ ɔ kpe ɔ, lɔɔ ma ha nɛ wa kɔni mi be jɔe.
3. Mɛni heje nɛ e sɛ nɛ munyu yayahi nɛ nihi tuɔ ngɛ wa he, kɛ si nɛ a teɔ kɛ woɔ wɔ ɔ nɛ pee wɔ nyakpɛ ɔ?
3 Yesu tsɔɔ kaa je ɔ maa nyɛ e se nyɛɛli ɔmɛ kaa bɔnɛ je ɔ nyɛ lɛ ɔ. (Yoh. 15:18-20) Enɛ ɔ heje ɔ, e sɛ nɛ e pee wɔ nyakpɛ kaa nihi tuɔ munyu yayahi ngɛ wa he nɛ a teɔ si kɛ woɔ wɔ. Ngɛ anɔkuale mi ɔ, e sa kaa waa hyɛ blɔ kaa be mi nɛ wa ngɛ nyagbe ligbi ɔmɛ a mi sɛe vii nɛ ɔ, Satan mi mi ma fu wawɛɛ nɛ e ma ha nɛ a tu wa he munyu yayahi nɛ a te si kɛ wo wɔ. (Kpoj. 12:12) E sa nɛ wa bua nɛ jɔ, ejakaa enɛ ɔmɛ ji odase yemi nɛ tsɔɔ kaa e be kɛe nɛ a ma kpata Satan je ɔ hɛ mi.
4. Ke wa ngɛ sane kpakpa a fiɛɛe nɛ nihi tu wa he munyu yayahi ɔ, kɛ e sa kaa wa ha mɛ heto ha kɛɛ?
4 O Kɛ Gbi Blɛuu Nɛ Ha Heto: Be tsuaa be nɛ nihi maa tu munyu yaya kɛ si wɔ ɔ, e sa nɛ waa kɛ munyu nɛ ngɔɔ kɛ gbi blɛuu nɛ ha mɛ heto. (Abɛ 15:1; Kol. 4:5, 6) Ke si himi ɔ maa ngmɛ blɔ ɔ, wa ma nyɛ maa tsɔɔ wetsɛ ko nɛ e suɔ nɛ e le anɔkuale ɔ kaa nihi tuɔ munyu yayahi fuu kɛ siɔ Yehowa Odasefoli, loo wa ma nyɛ ma bi lɛ nɛ e tsɔɔ wɔ nɔ́ heje nɛ e pee e ní kaa bɔnɛ e pee ɔ. Ke wa ha lɛ heto kɛ gbi blɛuu ɔ, lɔɔ ma ha nɛ e maa na kaa nɔ́ nɛ e nu kɛ kɔ Yehowa Odasefoli a he ɔ be mi, nɛ ke Yehowa Odasefoli ba slaa lɛ be kpa a, e maa bu mɛ tue. Se ke wetsɛ ɔ mi mi fu wawɛɛ ɔ, lɛɛ e maa hi kaa wa ma si lɛ. Ngɛ bɔnɛ nihi naa wɔ ha a tsuo se ɔ, wa ngɛ nɔ mi mami kaa Yehowa buu wa sɔmɔmi nítsumi ɔ kaa nɔ́ nɛ he jua wa.—Yes. 52:7.