Nítsumi Nɛ Haa Nɔ Bua Jɔmi Pe Kulaa
1. Mɛni nítsumi lɛ wa ngɛ tsue mwɔnɛ ɔ nɛ́ ngɛ nihi tsae ngɛ mumi mi?
1 Nihi nɛ a kɛ a hɛngmɛ na nihi nɛ a tsa mɛ nɛ́ a ná nɔmlɔtso mi he wami ngɛ kekle jeha lafa a mi ɔ bua jɔ wawɛɛ nitsɛ. (Luka 5:24-26) Ngɛ wa be nɛ ɔ mi ɔ, wɔ hu waa kɛ bua jɔmi ngɛ nihi tsae ngɛ mumi mi. (Kpoj. 22:1, 2, 17) Wa bua jɔɔ wawɛɛ nitsɛ ke wa kane níhi a si kpamihi nɛ kɔɔ bɔnɛ Yehowa Munyu ɔ kɛ e mumi klɔuklɔu ɔ tsake nihi a si himi ha a he! Se pi nítsumi nɛ ɔ he ní nɛ wa kaneɔ ɔ kɛkɛ nɛ haa nɛ wa náa bua jɔmi wawɛɛ, se mohu wa he nɛ waa kɛ woɔ mi kɛ gu Baiblo mi nikasemi nɛ pi si nɛ waa kɛ nihi peeɔ ɔ nɔ.
2. Ke wa ngɛ nɔ ko anɔkuale ɔ tsɔɔe ɔ, kɛ e peeɔ wɔ kɛɛ?
2 Kɛ a tsɛɛ Mawu kɛɛ? Mɛni heje nɛ e ngmɛ blɔ nɛ wa ngɛ nɔ́ nae? Mɛni Mawu Matsɛ Yemi ɔ ma ba pee kɛ ha adesahi? Pi sane bimi nɛ ɔmɛ a heto nɛ wa tsɔɔ nihi ɔ kɛkɛ nɛ haa nɛ wa náa bua jɔmi, mohu ɔ, wa bua jɔɔ wawɛɛ ke wa na kaa nihi nɛ waa kɛ mɛ kaseɔ ní ɔ ba le anɔkuale ɔ hulɔ. (Abɛ 15:23; Luka 24:32) Ke Baiblo kaselɔ ɔ níhi a sisi numi ngɛ hɛ mi yae ɔ, eko ɔ, e ma bɔni Yehowa biɛ ɔ ngɔmi kɛ tsu ní, nɛ e maa pee tsakemihi ngɛ e tade womi kɛ e he dlami mi, nɛ e ma je e he kɛ je je mi bami yaya ní peepeehi a he, nɛ e ma bɔni nihi odase yemi. Ke e ya e hɛ mi nɛ e jɔɔ e he nɔ kɛ ha Yehowa nɛ a baptisi lɛ ɔ, e ma ba plɛ wa nyɛmi nɛ e maa piɛɛ wa he kɛ tsu sɔmɔmi nítsumi ɔ. Ke Baiblo kaselɔ ɔ ya e hɛ mi ngɛ blɔ nɛ ɔmɛ a nɔ ɔ, wa náa bua jɔmi.—1 Tes. 2:19, 20.
3. Mɛni blɔhi pɔtɛɛ a nɔ lɛ wa ma nyɛ maa gu konɛ waa kɛ nihi nɛ je Baiblo mi nikasemi sisi?
3 O Ma Nyɛ Maa Ngɔ O He Kɛ Wo Nítsumi Nɛ ɔ Mi Lo? Ke o suɔ kaa o maa ngɔ o he kɛ wo nítsumi nɛ haa nɔ bua jɔmi pe kulaa nɛ ɔ mi ɔ, mo bi Yehowa nɛ e ye bua mo konɛ o na nihi nɛ o kɛ mɛ maa kase Baiblo ɔ, nɛ o tsu nɔ́ nɛ o sɔle kɛ bi ɔ he ní. (1 Yoh. 5:14) Moo fiɛɛ ngɛ he nɛ o maa na nihi ngɛ, kɛ be nɛ o maa na mɛ ngɛ hehi nɛ a ngɛ ɔ. Be tsuaa be nɛ he blɔ maa ba a, mo de nihi kaa o suɔ kaa o kɛ mɛ maa kase Baiblo ɔ. (Fiɛlɔ 11:6) Ke o ya na nɔ ko nɛ́ e bua jɔ munyu ɔ he nɛ o du anɔkuale wu ɔ kɛ wo e tsui mi ɔ, moo kpale kɛ ya slaa lɛ nɛ o pue anɔkuale wu ɔ nɛ o du ɔ nɔ nyu.—1 Kor. 3:6-9.
4. Mɛni heje nɛ e sɛ nɛ waa to tsle kaa wa ma de nihi kaa wa suɔ nɛ waa kɛ mɛ maa kase Baiblo ɔ?
4 Loloolo ɔ, nihi babauu ngɛ nɛ dami ní peemi he hwɔ kɛ kuma ngɛ mɛ yee. Mɛnɔ maa ye bua mɛ nɛ a kase Baiblo ɔ konɛ lɔɔ nɛ ha nɛ a ba le Yehowa? (Mat. 5:3, 6) Nyɛ ha nɛ waa je wa tsui mi nɛ waa gbe fiɛɛmi kɛ kaselɔ peemi nítsumi ɔ nya loko ní kpami be ɔ nɛ ba nyagbe.—Yes. 6:8.