Womi Hehi Nɛ Wa Maa Kase Ngɛ Asafo Baiblo Mi Nikasemi Sisi!
1. (a) Mɛni be a maa je Asafo Baiblo Mi Nikasemi blɔ nya tomi ehe ɔ sisi? (b) Mɛni womiyo lɛ wa maa kase kekle nɛ mɛni blɔ nɔ nɛ e maa ye bua wɔ ngɛ?
1 Kɛ je otsi nɛ je sisi March 14, 2011 kɛ yaa a, wa maa je Asafo Baiblo Mi Nikasemi blɔ nya tomi ehe sisi. Kekleekle ɔ, wa maa ngɔ otsi 16 kɛ kase womiyo nɛ ji, “Blɔ nɛ Yaa Neneene Wami Mi” ɔ. Kaa bɔnɛ Yesu de ɔ, Mawu jami ngɛ kaa blɔ enyɔ nɛ a ngɛ nɔ nyɛɛe. Blɔ kake kɛ nɔ yaa neneene wami mi, se kake lɛɛ e kɛ nɔ yaa hɛ mi kpatami mi. (Mat. 7:13, 14) Blɔ te nɛ kɛ nɔ yaa wami mi nɛɛ? Te nɛ nɔ o ngɛ nyɛɛe nɛɛ? Kɛ o maa pee kɛ ye bua nihi nɛ a na blɔ nɛ da a kɛɛ? Womi nɛ ɔ nɛ wa maa kase ɔ maa wo wa hemi kɛ yemi mi he wami konɛ waa na kaa wa ngɛ anɔkuale blɔ ɔ nɔ nyɛɛe, nɛ e maa wo wɔ gɛjɛmi konɛ waa ye bua nihi babauu nɛ a ba piɛɛ wa he kɛ nyɛɛ blɔ nɛ ɔ nɔ.
2. Mɛni munyu nɛ he hia lɛ womiyo nɛ ji, “Nyɛɛ Ya Nɔ nɛ Nyɛɛ Hwɔɔ!” ɔ maa ma nɔ mi?
2 Lɔɔ se ɔ, wa maa kase womiyo nɛ ji, “Nyɛɛ Ya Nɔ nɛ Nyɛɛ Hwɔɔ!” ɔ. Womiyo nɛ ɔ nɛ wa maa kase ɔ maa ye bua wɔ nɛ ‘waa ya nɔ nɛ waa hwɔɔ’ konɛ wa dla wa he kɛ to. E sɛ nɛ wa yi mi peeɔ wɔ enyɔɔnyɔ kɔkɔɔkɔ kaa “nyagbe ligbi ɔmɛ” a mi nɛ wa ngɛ nɛ ɔ nɛ. Nyɛ ha nɛ waa bɔ mɔde wawɛɛ konɛ waa kɛ oya yemi nɛ tsu sɔmɔmi nítsumi ɔ kɛ tsɔɔ kaa waa kɛ munyu nɛ ɔ nɛ bɔfo ɔ tu ɔ kpa gbi. E ke: “Nyɛɛ ye Mawu gbeye, nɛ nyɛɛ wo e hɛ mi nyami! Ejakaa be ɔ su nɛ e maa kojo nihi tsuo nɛ ngɛ je ɔ mi.”—Mat. 24:42, 44; Kpoj. 14:7.
3. Moo tsɔɔ yi mi tomi nɛ a kɛ pee “Nyɛɛ To Nyɛ He ngɛ Mawu Suɔmi ɔ Mi” womi ɔ. Mɛni blɔ nɔ e maa ye bua mo ngɛ?
3 Ke wa kase womiyo nɛ ɔ ta a, wa maa kase womi nɛ ji, “Nyɛɛ To Nyɛ He ngɛ Mawu Suɔmi ɔ Mi.” Mɛni ji yi mi tomi nɛ a kɛ pee womi nɛ ɔ? Nɔyemi Kuu ɔ tsɔɔ yi mi tomi nɛ ɔ heii ngɛ sɛ womi nɛ a ngma ngɛ womi ɔ mi ɔ nyagbe. E ke: “Wa hɛ nɔ kami ji kaa womi nɛ ɔ maa ye bua mo konɛ o ya nɔ nɛ o nyɛɛ ngɛ anɔkuale ɔ nya, bɔnɛ pee nɛ o ‘to o he ngɛ Mawu suɔmi ɔ mi, nɛ o ná neneene wami.’—Yuda 21.” Wa maa na bɔnɛ Baiblo sisi tomi mlaahi kɔɔ huɛ bɔmi, hɛja jemi, bumi nɛ wa ma je kpo ha nihi nɛ hɛɛ blɔ nya, wa suhi, gba si himi, wa munyu tutui, kɛ kusumihi a he ha. Ke wa le Yehowa tɛ pomihi nɛ a nɔ kuɔ ɔmɛ ɔ, e ma tsɔse wa he nile ɔ nɛ e maa ye bua wɔ konɛ waa pee e suɔmi nya ní. (La 19:7, 8) Nɛ ke wa nu Yehowa susumi ngɛ níhi a he sisi ɔ, lɔɔ ma ha nɛ wa maa bu lɛ tue ngɛ nɔ́ tsuaa nɔ́ mi ejakaa wa ngɛ suɔmi ngɛ wa tsui mi kaa wa maa pee e suɔmi nya ní.—Abɛ 27:11; 1 Yoh. 5:3.
4. Mɛni blɔ nɔ wa maa gu kɛ ná womi ɔmɛ nɛ wa maa kase ɔ a he se kɛ pi si?
4 Moo Mwɔ O Yi Mi Kpɔ Kaa O Kɛ O He Maa Wo Mi: Ke o ngɛ hlae nɛ o ná womi nɛ ɔmɛ nɛ wa maa kase ɔ a he se nitsɛ ɔ, bɔɔ mɔde kaa o ma ná mo nitsɛ o nɔ́. Moo sɛ hlami nɛ o kase nɛ o dla o he kaa o kɛ o he maa wo asafo nikasemi ɔ mi. Moo ya nikasemi be tsuaa be, nɛ o susu bɔnɛ o maa ngɔ ní nɛ o maa kase ɔ kɛ tsu ní ngɛ o si himi kɛ fiɛɛmi nítsumi ɔ mi ha a he. Ngɛ womiyohi enyɔ kɛ “Mawu Suɔmi” womi ɔ yemi kɛ buami nya a, a maa lɛ wɔ saminya ngɛ mumi mi nɛ wa ma fi si wawɛɛ kaa waa kɛ Baiblo mi sisi tomi mlaahi ma tsu ní ngɛ wa si himi mi konɛ ‘waa hi Mawu suɔmi ɔ mi.’—Yuda 21.