“Nyɛ Ha Nyɛ La a Nɛ Tso”
1. Mɛni lɛ wa ngɛ he blɔ kaa wa ma ha nɛ e tso kɛ ha nihi?
1 Kɛ je mɔtu kɛ ya si gbɔkuɛ ɔ, pu la a jeɔ Yehowa Mawu yi. Se la kpa nɛ Yesu de e kaseli ɔmɛ ke a ná a nɛ, lɔɔ ji “la a nɛ haa nɔ wami ɔ.” (Yoh. 8:12) Mumi mi la a nɛ wa ná a ji he blɔ ngua nɛ wa ná, se lɔɔ hu ngɔ blɔ nya nítsumi nɛ hɛdɔ ngɛ he kɛ fɔ wa nɔ. Yesu de ke: “Nyɛ ha nyɛ la a nɛ tso ngɛ nimli a hɛ mi,” konɛ mɛ hu a ná he se. (Mat. 5:16) Mwɔnɛ ɔ ji be nɛ e he hia wawɛɛ nɛ e sa kaa wa ha nɛ la nɛ ɔ nɛ e tso ngɛ je nɛ e mi wo diblii kpii ngɛ mumi mi nɛ ɔ mi! Kaa bɔnɛ Kristo pee ɔ, mɛni blɔ nɔ wɔ hu wa maa gu kɛ ha nɛ wa la a nɛ tso?
2. Mɛni blɔ nɔ Yesu tsɔɔ kaa mumi mi la a nɛ a ma ha nɛ e maa tso kɛ ha nihi ɔ he hia ngɛ?
2 Kɛ Gu Fiɛɛmi Nítsumi ɔ Nɔ: Yesu ngɔ e be, kɛ e he wami, kɛ níhi nɛ e ngɛ ɔ kɛ ye bua nihi ngɛ a wehi a mi, magbɛhi a nɔ, yokuhi a nɔ, kɛ he tsuaa he nɛ nimli ngɛ konɛ e kɛ ha nɛ a le anɔkuale la a. E le kaa ke e ye bua mɛ nɛ a ná mumi mi la a, a ma ná he se kɛ ya neneene. (Yoh. 12:46) Akɛnɛ Yesu suɔ kaa nihi fuu nɛ a ná mumi mi la nɛ ɔ heje ɔ, e tsɔse e kaseli ɔmɛ konɛ a pee “la kɛ ha je ɔ.” (Mat. 5:14) A ha nɛ a la a tso kɛ gu ní kpakpahi nɛ a pee kɛ ha nihi kɛ mumi mi anɔkuale ɔ nɛ a tsɔɔ mɛ ɔ nɔ.
3. Mɛni blɔ nɔ wa maa gu kɛ tsɔɔ kaa wa bua jɔ anɔkuale la a he?
3 Mawu webi buɔ fami nɛ a fã mɛ kaa ‘a ba a je mi kaa nihi nɛ a kɛ la ngɛ nyɛɛe’ ɔ tue wawɛɛ, nɛ lɔɔ ha nɛ a fiɛɛɔ kɛ haa nihi ngɛ he tsuaa he nɛ a maa na mɛ ngɛ. (Efe. 5:8) Baiblo ɔ aloo asafo ɔ womi kpahi nɛ wa maa kane ngɛ hehi nɛ nihi ma nyɛ maa na wɔ ngɛ, kaa eko ɔ, nítsumi hehi aloo sukuu be mi nɛ wa ngɛ wa he jɔɔe ɔ, ma nyɛ ma ha nɛ waa kɛ nihi nɛ susu Ngmami ɔ he. Nyɛmiyo wayoo ko gu blɔ nɛ ɔ nɔ kɛ je Baiblo mi nikasemi sisi, nɛ e ha nihi 12 nɛ e kɛ mɛ ngɛ sukuu tsu kake mi ɔ womi!
4. Mɛni heje nɛ wa ‘la a nɛ wa ma ha nɛ e maa tso ɔ’ hu kɔɔ bɔnɛ wa baa wa je mi ha saminya a he?
4 Kɛ Gu Je Mi Bami Kpakpa Nɔ: Wa la a nɛ wa ma ha nɛ e maa tso ɔ hu kɔɔ bɔnɛ wa baa wa je mi ha daa ligbi ɔ he. (Efe. 5:9) Ke Kristofono ko baa e je mi saminya ngɛ nítsumi he, sukuu, kɛ he kpahi nɛ nihi ngɛ ɔ, nihi yɔseɔ, nɛ enɛ ɔ haa nɛ e nyɛɔ nɛ e tsɔɔ mɛ Baiblo ɔ mi anɔkualehi. (1 Pet. 2:12) Kaa nɔ hyɛmi nɔ́ ɔ, akɛnɛ nyumuyo ko nɛ e ye jeha enuɔ ɔ baa e je mi saminya ngɛ sukuu heje ɔ, e tsɔɔlɔ ɔ tsɛ e fɔli. Tsɔɔlɔ ɔ de mɛ ke, “I nɛ jokuɛ ko nɛ baa e je mi saminya kaa nyɛ binyumuyo nɛ ɔ hyɛ!” Ngɛ anɔkuale mi ɔ, wa sɔmɔmi nítsumi ɔ kɛ wa je mi bami kpakpa a haa nɛ nihi a bua jɔɔ “la a nɛ haa nɔ wami ɔ” he, nɛ enɛ ɔ ngɔɔ yi jemi kɛ haa Mawu.