E He Hia Nɛ Waa Kɛ Tsui Si Tomi Nɛ Tsu Wa Sɔmɔmi Nítsumi ɔ
1. Mɛni blɔ nɔ Yehowa gu kɛ tsɔɔ kaa e ngɛ tsui si tomi kɛ ha adesahi?
1 Mawu ngɛ tsui si tomi kɛ ha adesahi wawɛɛ. (2 Mose 34:6; La 106:41-45; 2 Pet. 3:9) Matsɛ Yemi fiɛɛmi nítsumi ɔ nɛ e ha nɛ e ngɛ nɔ yae ngɛ je kɛ wɛ ɔ ji nɔ hyɛmi nɔ́ kake nɛ tsɔɔ kaa e ngɛ tsui si tomi wawɛɛ. Maa pee jeha 2,000 sɔuu ji nɛ ɔ nɛ Yehowa to e tsui si nɛ e ngɛ adesahi gblae kɛ ngɛ e he sue, nɛ loloolo ɔ, e ngɛ nɔ yae nɛ e ngɛ jã pee. (Yoh. 6:44) Kɛ wa ma plɛ kɛ kase Yehowa tsui si tomi ɔ ngɛ wa fiɛɛmi nítsumi ɔ mi ha kɛɛ?
2. Ke wa ngɛ wa zugba kpɔ ɔ mi ní tsue ɔ, mɛni blɔ nɔ wa ma nyɛ maa gu kɛ je tsui si tomi kpo?
2 Wehi A Mi Fiɛɛmi: Ke wa yaa nɔ nɛ wa fiɛɛɔ ngɛ wa zugba kpɔ ɔ mi hehi nɛ nihi a bua jɔɛ wa munyu ɔ he ngɛ ɔ, lɔɔ tsɔɔ kaa wa ngɛ Yehowa tsui si tomi ɔ kasee. (Níts. 5:42) Wa toɔ wa tsui si kɛ haa nihi nɛ a bua jɔɛ wa munyu ɔ he, kɛ nihi nɛ a yeɔ wa he fɛu, kɛ nihi nɛ a waa wɔ yi mi ngɛ sɔmɔmi nítsumi ɔ nɛ wa ngɛ tsue ɔ he. (Mar. 13:12, 13) Jehanɛ se hu ɔ, ke wa pɔɛ nihi nɛ wa du anɔkuale wuhi kɛ wo a tsui mi ɔ nami ngɛ a wehi a mi se ngɛ lɔɔ tsuo se ɔ, wa bɔɔ mɔde nɛ wa yaa nɔ nɛ wa pueɔ nɔ́ nɛ wa duɔ ɔ nɔ nyu ɔ, lɔɔ tsɔɔ kaa wa toɔ wa tsui si.
3. Mɛni heje nɛ wa se nɛ wa maa kpale kɛ ya slaa nihi kɛ Baiblo mi nikasemi nɛ wa maa pee ɔ biɔ tsui si tomi ɔ?
3 Baiblo Mi Nikasemi: Loko wa ma du ní nɛ e maa wa a, e biɔ tsui si tomi. Wa ma nyɛ maa hyɛ nɔ mohu lɛɛ, se wa be nyɛe maa wo lɛ fo kaa e wa. (Yak. 5:7) Jã kɛ̃ nɛ mumi mi wami hu baa bɔɔbɔɔbɔɔ. (Mar. 4:28) Eko ɔ, e he maa wa ha nihi nɛ waa kɛ mɛ kaseɔ Baiblo ɔ kaa a maa ngmɛɛ lakpa jami mi hemi kɛ yemihi aloo kusumihi nɛ Ngmami ɔ kplɛɛ we nɔ ɔ a he. E sɛ nɛ waa wo nihi nɛ waa kɛ mɛ kaseɔ Baiblo ɔ fo kaa a wa ngɛ mumi mi, enɛ ɔ tsɔɔ kaa e sɛ nɛ waa nyɛ a nɔ kaa a pee tsakemihi ngɛ a si himi mi. E sa kaa waa to wa tsui si konɛ Mawu mumi ɔ nɛ e tsu ní ngɛ ní kaselɔ ɔ tsui mi.—1 Kor. 3:6, 7.
4. Ngɛ mɛni blɔ nɔ nɛ tsui si tomi ma nyɛ maa ye bua wɔ nɛ waa ye wa wekuli nɛ a pi odasefoli ɔ odase?
4 Wekuli Nɛ A Pi Odasefoli: E ngɛ mi kaa wa suɔ wawɛɛ kaa wa wekuli nɛ tsa pi odasefoli ji mɛ ɔ nɛ a kase anɔkuale ɔ lɛɛ, se wa toɔ wa tsui si nɛ waa kɛ mɛ susuɔ wa hemi kɛ yemi ɔ he ngɛ be nɛ sa mi, nɛ waa kɛ munyuhi fuu hɛwi mɛ hulɔ. (Fiɛlɔ 3:1, 7) Wa pee klaalo kaa wa maa tsɔɔ mɛ wa hemi kɛ yemi ɔ nya ngɛ mi mi jɔmi kɛ bumi nya mohu lɛɛ, se loko wa ma ná he blɔ kɛ pee jã a, waa kɛ wa ní peepee yeɔ mɛ odase. (1 Pet. 3:1, 15, 16) Ngɛ anɔkuale mi ɔ, ke wa toɔ wa tsui si ngɛ wa sɔmɔmi nítsumi ɔ mi ɔ, lɔɔ ma ha nɛ wa sɔmɔmi nítsumi ɔ maa pi si, nɛ e maa sa wa hiɔwe Tsɛ ɔ hɛ mi.