Anɛ O Bimɛ Ɔmɛ Dla A He Lo?
1. Mɛni heje nɛ e he hia kaa jokuɛwi nɛ a ngɛ sukuu yae ɔ nɛ a dla a he?
1 E piɛ bɔɔ nɛ a maa je sukuu jeha ehe sisi. Atsinyɛ jemi ko be he kaa o bimɛ ɔmɛ kɛ haomi kɛ nɔ nyɛmi ehehi maa kpe. A ma ná he blɔ kɛ maa ‘ye anɔkuale ɔ he odase’ hulɔ. (Yoh. 18:37) Anɛ a dla a he lo?
2. Bɔnɛ pee nɛ o bimɛ ɔmɛ nɛ a nyɛ nɛ a dla a he kɛ ha sukuu jeha ehe ɔ, mɛni e sa kaa a le?
2 Anɛ o bimɛ ɔmɛ le níhi nɛ kɔɔ ma gbijlɔ yemi kɛ gbijlɔhi nɛ kɔɔ wɔ jami he ɔ a he, kɛ nɔ́ heje nɛ e sɛ kaa a kɛ a he woɔ gbijlɔ nɛ ɔmɛ a yemi mi ɔ lo? Anɛ a dla a he kɛ ha nɔ nyɛmi nɛ a kɛ maa kpe nɛ ekomɛ ji, nɛ a maa nyɛ a nɔ konɛ a ya sukuu ngua, loo nɛ a maa nyɛ a nɔ nɛ a kɛ nihewi kɛ yihewi nɛ je kpo, loo a kɛ a he nɛ wo tsopa yaya kɛ nítsumi mi lo? Anɛ a ma de kɛkɛ kaa ní peemi nɛ ɔmɛ teɔ si kɛ woɔ a Mawu jami, aloo a le bɔnɛ a ma plɛ kɛ tsɔɔ nihi a hemi kɛ yemi ɔmɛ a nya ha lo?—1 Pet. 3:15.
3. Mɛni blɔ nɔ fɔli maa ngɔ a gbɔkuɛ Weku Mawu Jami ɔ kɛ dla a bimɛ ɔmɛ ngɛ?
3 O Kɛ Gbɔkuɛ Weku Mawu Jami ɔ Nɛ Tsu Ní: Eko ɔ, o kɛ o bimɛ ɔmɛ susuɔ haomihi nɛ a kɛ kpeɔ ngɛ sukuu ɔ a he. Ke o bɔ mɔde nɛ o kɛ mɛ susu haomihi nɛ a kɛ ma nyɛ maa kpe ngɛ sukuu ɔ he loko a bli blɔ ɔ, lɔɔ ma ha nɛ o bimɛ ɔmɛ ma ná kã kɛ da haomihi nɛ a ma kɛ kpe ɔ a nya. Mɛni heje nɛ o ngɔɛ gbɔkuɛ Weku Mawu Jami be ɔ kake loo enyɔ kɛ pee we enɛ ɔ? O ma nyɛ ma bi mɛ konɛ a de mo haomi komɛ nɛ a yeɔ gbeye kaa a kɛ maa kpe ke a kpale kɛ ho sukuu ya. Nyɛ ma nyɛ maa kpale ma susu níhi nɛ nyɛ susu a he jeha komɛ nɛ be ɔ a he akɛnɛ amlɔ nɛ ɔ lɛɛ jokuɛwi ɔmɛ a wa, nɛ a ma nyɛ maa nu níhi a sisi saminya a heje. (La 119:95) O ma nyɛ maa pee o he kaa tsɔɔlɔ, aloo sukuubi a ga wolɔ, loo sukuuno konɛ nyɛɛ pee bɔnɛ o bi ɔ maa tsɔɔ e hemi kɛ yemi nya ha a he peemi kɛ tsɔɔ. Moo tsɔɔ o bimɛ ɔmɛ bɔnɛ a kɛ Baiblo ɔ loo Baiblo kasemi womi komɛ kaa Reasoning kɛ Young People Ask womi ɔmɛ ma ha sanehi a heto ha. Fɔlɔ ko gu peemi kɛ tsɔɔ nɔ kɛ dla e bimɛ ɔmɛ ngɛ bɔnɛ a ma plɛ nɛ a kɛ a tsɔɔli ehehi maa sɛɛ ní ha nɛ a ha nɛ a le kaa a ji Yehowa Odasefoli ɔ he.—Hyɛ Watchtower, December 15, 2010, bafa 3-5.
4. Mɛni fɔli nɛ a ngɛ nile maa sɛ hlami maa pee?
4 Haomihi nɛ nihewi kɛ yihewi nɛ a ji Kristofoli kɛ ngɛ kpee ngɛ nyagbe ligbi nɛ ɔmɛ a mi ɔ ‘mi ngɛ wae’ wawɛɛ. (2 Tim. 3:1) Fɔli nɛ a ngɛ nile ɔ ma susu haomihi nɛ a bimɛ ɔmɛ kɛ maa kpe ɔ a he, nɛ a maa da lɔɔ nɔ kɛ dla mɛ. (Abɛ 22:3) Loko sukuu jeha ehe ɔ maa je sisi ɔ, nyɛɛ bɔ mɔde wawɛɛ nɛ nyɛ dla nyɛ bimɛ ɔmɛ.