Koo Gbla O Nane Si
1. Ja wa pee kã loko wa ma nyɛ maa pee mɛni, nɛ mɛni heje?
1 Anɛ e ye ha mo hyɛ kaa o maa ye odase ngɛ sukuu akɛnɛ o ye gbeye kaa nihi maa ye o he fɛu ɔ heje lo? Ngɛ anɔkuale mi ɔ, ja o pee kã loko o ma nyɛ maa ye odase ngɛ sukuu, titli ɔ, ke o ji nɔ ko nɛ e gboɔ zo. Mɛni maa ye bua mo konɛ o ná kã kɛ pee jã?
2. Mɛni blɔ nɔ waa kɛ nile ma nyɛ ma tsu ní ke wa ngɛ fiɛɛe ngɛ sukuu?
2 O Kɛ Nile Nɛ Tsu Ní: E ngɛ mi kaa he nɛ o yaa sukuu ngɛ ɔ ma nyɛ maa pee o zugba kpɔ mohu lɛɛ, se mo kai kaa pi nɔ tsuaa nɔ nɛ o kɛ ma nyɛ maa sɛɛ Baiblo mi ní kaa bɔnɛ o peeɔ ke o ngɛ fiɛɛe ngɛ wehi a mi ɔ. O kɛ nile nɛ tsu ní konɛ o le be nɛ o kɛ maa tu munyu. (Fiɛlɔ 3:1, 7) Nɔ́ nɛ nyɛ ngɛ kasee ngɛ sukuu tsu ɔ mi loo sukuu nítsumi nɛ a ma ha mo ɔ, ma nyɛ ma bli blɔ ha mo konɛ o tu o hemi kɛ yemi ɔ he munyu. Aloo eko ɔ, nɔ ko nɛ o kɛ lɛ yaa sukuu ɔ ma bi mo sane ko nɛ kɔɔ nɔ́ heje nɛ o kɛ o he wui ní peepee komɛ a mi ɔ he. Kristofoli komɛ sɛɛ hlami nɛ a deɔ a tsɔɔli ɔmɛ ngɛ sukuu jeha a sisije kaa a ji Yehowa Odasefoli, nɛ a haa a tsɔɔli ɔmɛ womi nɛ tuɔ a hemi kɛ yemi ɔ he munyu. Ni komɛ hu kɛ Baiblo kasemi womihi fɔɔ a okplɔɔhi a nɔ bɔnɛ pee nɛ a sukuubi ɔmɛ nɛ a bi mɛ he munyu.
3. Kɛ o ma plɛ kɛ dla o he kɛ ye odase ngɛ sukuu ha kɛɛ?
3 Mo Dla O He: Ke o dla o he ɔ, o ma ná kã kɛ tu munyu. (1 Pet. 3:15) Enɛ ɔ he ɔ, mo susu sanehi nɛ eko ɔ, o sukuubi ɔmɛ ma bi mo ɔ he, nɛ o susu bɔnɛ o ma plɛ kɛ ha mɛ heto ha a he. (Abɛ 15:28) Ke e maa hi ɔ, moo hɛɛ o Baiblo ɔ kɛ Baiblo kasemi womi komɛ kaa Reasoning womi ɔ, kɛ Young People Ask womi ɔmɛ, kɛ womihi nɛ kɔɔ adebɔ níhi a he kɛ ya sukuu ɔ, bɔnɛ pee nɛ o nyɛ nɛ o kɛ tsu ní ke e he hia kaa o pee jã. Mo de o fɔli ɔmɛ konɛ a kɛ bɔnɛ a plɛɔ kɛ yeɔ odase ngɛ sukuu ha a he peemi kɛ tsɔɔ nɛ piɛɛ nyɛ weku Mawu jami ɔ he.
4. Mɛni heje nɛ e sa kaa o ya nɔ nɛ o ye odase ngɛ sukuu ɔ?
4 Moo Hɛɛ Juɛmi Kpakpa: Mo ko susu kaa be tsuaa be nɛ o maa tu anɔkuale ɔ he munyu kɛ tsɔɔ o sukuubi ɔmɛ ɔ, a maa ye o he fɛu. Eko ɔ, a ti ni komɛ a bua maa jɔ o he ngɛ kã nɛ o peeɔ ɔ heje nɛ a maa bu mo tue. Se ke nɔ ko bui mo tue ɔ, o kɔni mi nɛ ko jɔ. Yehowa bua maa jɔ kaa o pee jã. (Heb. 13:15, 16) Moo ya nɔ nɛ o bi Yehowa konɛ e ye bua mo nɛ o ‘ya nɔ nɛ o jaje munyu ɔ kɛ kã.’ (Níts. 4:29; 2 Tim. 1:7, 8) Hyɛ bɔnɛ o bua maa jɔ wawɛɛ ha ke nɔ ko bu mo tue! Eko ɔ, jamɛatsɛ ɔ po ma ba piɛɛ wa he kɛ sɔmɔ Yehowa!