O Kɛ Nile Nɛ Fia O Kɔ ɔ
1. Kɛ 1 Korintobi 9:26 kɔ wa fiɛɛmi nítsumi ɔ he kɛɛ?
1 Bɔfo Paulo ngma ke: ‘Fo nɛ i ngɛ tue nɛ ɔ, i tui lɛ yaka gu; kɔ̃ nɛ i ngɛ fiae ɔ, i fiɛ kaa nɔ ko nɛ ngɛ kɔɔhiɔ gbee.’ (1 Kor. 9:26) Paulo ngɛ Mawu jami mi otihi nɛ e kɛ ma e hɛ mi nɛ e bɔɔ mɔde kaa e maa su he ɔ a he munyu tue. Se kɛ̃ ɔ, ngɛ blɔ ko nɔ ɔ, munyu nɛ ɔ hu kɔ wa fiɛɛmi nítsumi ɔ he. Wa suɔ kaa wa maa fia ‘kɔ̃ ɔ’ ngɛ ní lemi mi, loo waa bɔ mɔde konɛ waa ye manye. Ngɛ mɛni blɔ nɔ?
2. Mɛni blɔ nɔ wa maa gu kɛ kase Paulo kɛ kekle jeha lafa a mi fiɛɛli ɔmɛ?
2 Yaa He Nɛ Nihi Ngɛ: Paulo kɛ kekle jeha lafa a mi sane kpakpa fiɛɛli ɔmɛ ya fiɛɛ ngɛ he nɛ a hyɛɛ blɔ kaa a ma na nihi ngɛ. (Níts. 5:42; 16:13; 17:17) Lɔɔ he ɔ, ke wa yɔse kaa nihi fuu nɛ a ngɛ wa zugba kpɔ ɔ mi ɔ hii we mi gbɔkuɛ he ɔ, lɛɛ eko ɔ, e maa hi wawɛɛ kaa wa maa ya wehi a mi fiɛɛmi gbɔkuɛ he. Anɛ nihi fuu hiɔ lɔle aloo tlee si dami he nɛ ngɛ nyɛ kpɔ ɔ mi ɔ mɔtu mla ke a yaa nítsumi kɛ gbɔkuɛ nya si ke a je nítsumi kɛ ma we mi lo? Mɛni be mi nɛ nihi pɔɔ ní hemi ngɛ tsuapohi nɛ ngɛ nyɛ zugba kpɔ ɔ mi ɔ a mi? Gbɛjegbɛ he odase yemi ma nyɛ maa wo yiblii ngɛ be nɛ ɔmɛ a mi.
3. Mɛni blɔ nɔ waa kɛ nile ma nyɛ maa fia kɔ̃ ngɛ bɔnɛ wa tsuɔ wa zugba kpɔ ɔ mi ní ha a he?
3 O Kɛ Nile Nɛ Tsu Ní Ngɛ Zugba Kpɔ ɔ Mi: E sa nɛ waa hyɛ nɛ hi nɛ waa kɛ nile nɛ fia kɔ ɔ ngɛ wa zugba kpɔ ɔ mi. Kaa nɔ hyɛmi nɔ́ ɔ, e maa hi wawɛɛ kaa a ma ha nɛ fiɛɛli bɔɔ ko pɛ ma ya fiɛɛ ngɛ he ko mohu pe nɛ a ma ha nɛ fiɛɛli fuu ma ya bua a he nya ngɛ he kake nɛ lɔɔ ma ha nɛ a ma puɛ be kɛ gba mɛ kɛ ha fiɛɛmi nítsumi ɔ. Jã nɔuu kɛ̃ nɛ ke wa pɔɔ nihi nɛ a be we mi ɔ a biɛ ngmami kɛ fɔɔ S-8 womi ɔ nɔ ɔ, lɔɔ maa ye bua wɔ konɛ wa ko pɔ we kake mi yami daa otsi. Anɛ wa ma nyɛ ma bi nɛ a ha wɔ zugba kpɔ nɛ e kɛ wa we he kɛ we, konɛ e gbɔ be nɛ wa kɛ hiaa blɔ kɛ yaa mi ɔ nɔ lo?
4. Mɛni maa ye bua wɔ konɛ waa ye manye kaa nimli a he ‘wo hɛli’ kpakpahi?
4 Yesu kɛ sane kpakpa fiɛɛli to ‘wo hɛli’ a he. (Mar. 1:17) Oti nɛ wo yalɔ kɛ maa e hɛ mi ji kaa e maa gbe lo se pi nɛ e maa fɔ ya a kɛkɛ. Lɔɔ heje ɔ, wo hɛli nɛ a gbeɔ lo wawɛɛ ɔ yaa he nɛ a hyɛɛ blɔ kaa lohi maa hi, nɛ a kɛ oya yemi ya gbeɔ lo. Ngɛ anɔkuale mi ɔ, a kɛ nile tsu ɔ ní. E sa nɛ waa kɛ hɛdɔ nɛ tsu wa fiɛɛmi nítsumi ɔ he ní jã nɔuu.—Heb. 6:11.