Sɛ Womi Nɛ Je Nɔyemi Kuu ɔ Ngɔ
Wa Nyɛmimɛ Yehowa Odasefoli Nɛ Wa Suɔ:
Wa bua jɔ wawɛɛ kaa wa maa ngma nyɛ nɛ nyɛ ji Yehowa sɔmɔli nɛ nyɛ yeɔ anɔkuale, nɛ wa suɔ nyɛ, nɛ amlɔ nɛ ɔ, nyɛ he hiɛ pe ayɔ kpaago ɔ sɛ womi nɛ ɔ. Ke waa kɛ wa nyɛmi Kristofono ko nɛ e je ma kpa nɔ kpe ɔ, wa náa suɔmi nɛ mi wa kɛ haa lɛ amlɔ nɔuu. (Yoh. 13:34, 35) Atsinyɛ jemi ko be he kaa ke nyɛ kane Yearbook ɔ mi munyuhi nɛ a ngɛ bua jɔmi nɛ kɔɔ hemi kɛ yemi nɛ wa nyɛmimɛ nyumuhi kɛ yihi nɛ a ngɛ ma slɔɔtohi a nɔ ɔ jeɔ kpo, kɛ anɔkuale nɛ a yeɔ ɔ he ɔ, lɔɔ ma ha nɛ suɔmi nɛ nyɛ ngɛ ha mɛ ɔ mi maa wa ekohu.
Amaniɛ bɔmi nɛ wa nine su nɔ kɛ je je kɔnya eywiɛ ɔmɛ ɔ tsɔɔ kaa nyɛ ti nihi fuu kɛ nyɛ Weku Mawu Jami ɔ fiɛ we kulaa. Ngɛ nyɛ nihi nɛ nyɛ ngɛ bimɛ tsɔwi ɔ nyɛ blɔ fa mi ɔ, nyɛ guɔ blɔhi nɛ a ngɛ bua jɔmi a nɔ kɛ haa nɛ nyɛ bimɛ ɔmɛ a juɛmi hiɔ níhi nɛ nyɛ ngɛ kasee ɔ nɔ nɛ a nuɔ sisi. (Efe. 6:4) Weku Mawu Jami nɛ ɔ ha nɛ suɔmi nɛ ngɛ hunomɛ kɛ a yihi a kpɛti ɔ mi wa wawɛɛ. (Efe. 5:28-33) Ngɛ anɔkuale mi ɔ, ni kakaakahi kɛ wekuhi tsuo ngɛ blɔ nya tomi nɛ ɔ he se náe akɛnɛ a kaseɔ Mawu Munyu ɔ saminya a heje.—Yosh. 1:8, 9.
Nyɛ nihi tsuo nɛ lingmi nɛ ɔ, adebɔ mi oslaahi puɛ nyɛ níhi ɔ, wa mi mi sãa wɔ ngɛ nyɛ he. Waa kɛ he blɔ nɛ ɔ ngɛ nyɛ nihi tsuo nɛ nyɛ ye oya kɛ ya ye bua nihi nɛ oslaa ná mɛ ngɛ be nɛ mi wa nɛ ɔmɛ a mi ɔ si nae. (Níts. 11:28-30; Gal. 6:9, 10) Jehanɛ se hu ɔ, ngɛ asafo tsuaa asafo mi ɔ, nyɛ ti ni komɛ ngɛ nɛ a naa kaa e he hia nɛ a ye bua wa nyɛmimɛ ɔmɛ ngɛ helo nya, nɛ a peeɔ jã nɛ nɔ ko li he nɔ́ ko. Kaa bɔnɛ Dorka pee blema a, nyɛ hu ‘kpakpa sɔuu nyɛ peeɔ, titli ɔ, nyɛ hyɛɔ dɛgutsɛmɛ a nɔ.’ (Níts. 9:36) Nyɛ ná nɔ mi mami kaa Yehowa naa kpakpa nɛ nyɛ peeɔ ɔ, nɛ e maa jɔɔ nyɛ ngɛ he.—Mat. 6:3, 4.
Ngɛ mahi nɛ nyɛ ti ni komɛ ngɛ nɔ ɔ a mi ɔ, nihi nɛ a yi dami sane nɛ a “woɔ mlaa yaya” a tsiɔ nyɛ nya ngɛ níhi nɛ nyɛ ngɛ he blɔ kaa nyɛ peeɔ ɔ mi. (La 94:20-22) Akɛnɛ nyɛ le kaa Yesu gba kɛ fɔ si kaa nihi maa wa nyɛ yi mi heje ɔ, nyɛɛ kɛ kã ngɛ nyɛ tsui si toe, nɛ nyɛɛ kɛ Yehowa pee nyɛ wesa he. (Yoh. 15:19, 20) Wa ngɛ hlae nɛ nyɛɛ le kaa wa sɔleɔ kɛ haa nyɛ daa be mi nɛ nyɛ yaa nɔ nɛ ‘nyɛ haa nihi nɛ a biɔ nyɛ nɔ́ pɔtɛɛ nɛ nyɛ heɔ yeɔ kaa nyɛ nine maa su nɔ hwɔɔ se ɔ heto ɔ.’—1 Pet. 3:13-15.
Waa kɛ bua jɔmi ngɛ nyɛ nihi ayɔhi abɔ nɛ́ ngɛ mɔde nɛ Satan bɔɔ wawɛɛ konɛ e ha nɛ nihi a je mi bami nɛ puɛ, kɛ blɔhi nɛ a yɔsemi yee a nɔ nɛ e guu kɛ haa nɛ nihi fuu kɛ a he woɔ mi ɔ tsuo se ɔ, nyɛ yaa nɔ nɛ nyɛ hɛɛɔ je mi bami nɛ he tsɔ mi ɔ yi jee. Ngɛ be mi nɛ je ɔ je mi bami ngɛ puɛe kulaa a, nyɛɛ lɛɛ ‘nyɛ ha nɛ Nyɔmtsɛ ɔ he wami kpetekpleenyɛ ɔ nɛ ngɛ nyɛ mi ɔ ngɛ nyɛ he wami woe.’ (Efe. 6:10) Nyɛ “kpla tahwu ní ɔmɛ tsuo nɛ Mawu ha nyɛ ɔ,” nɛ enɛ ɔ ha nɛ nyɛ nyɛ́ ngɛ “Abosiami ga tsɔmi ɔmɛ” a nya dae. (Efe. 6:11, 12) Nyɛ ná nɛ nyɛɛ le kaa Yehowa da nɔ hyɛmi nɔ́ nɛ nyɛ ngɛ pee ɔ nɔ kɛ ngɛ ahlua bɔlɔ nɛ ji Satan ɔ heto hae!—Abɛ 27:11.
Wa bua jɔ wawɛɛ kaa nihi nɛ a ya Nyɔmtsɛ ɔ gbenɔ ɔ Kaimi ngɛ jeha 2011 ɔ a yibɔ su 19,374,737. Nyɛ he nɛ nyɛɛ kɛ wo blɔ gbali a wami nítsumi ɔ mi ngɛ April nyɔhiɔ ɔ mi ɔ heje nɛ wa ná yibɔ ngua nɛ ɔ nɛ. Nimli ayɔhi abɔ nɛ a ngɛ je kɛ wɛ ɔ nu Yehowa we anɔkuale Odasefoli nɛ a pee kake ɔ a gbi nɛ jije ɔ he! (Rom. 10:18) O piɛɛ nimli nɛ a yibɔ su 2,657,377 nɛ a sɔmɔ kaa blɔ gbali a wali ngɛ jamɛ a nyɔhiɔ ɔ mi ɔ a he jio, o ha nɛ ngmlɛfia nɛ o kɛ fiɛɛ ɔ ya hɛ mi jio, nyɛ tsuo nyɛ piɛɛ he nɛ wa ná bua jɔmi ngua nɛ ɔ nɛ, ejakaa nyɛɛ kɛ nyɛ he sã afɔle nɛ nyɛ tsu nítsumi ɔ kɛ kã.—La 110:3; Kol. 3:23.
Jeha nɛ be ɔ, a baptisi ni hehi nɛ a yibɔ su 263,131 kɛ pee a he nɔ nɛ a jɔɔ kɛ ha Yehowa a he okadi. Wa naa Yehowa si ngɛ enɛ ɔ he, nɛ wa naa nyɛ tsuo si kaa nyɛ hu nyɛ ngɛ ni kpahi nine fɔe ke: “‘Ba!’ Nɔ tsuaa nɔ nɛ maa nu enɛ ɔ, lɛ hu e de ke, ‘Ba!’ Nɔ tsuaa nɔ nɛ kuma ngɛ lɛ yee ɔ, e ba; nɔ tsuaa nɔ nɛ suɔ ɔ, e ba ngɔ nyu nɛ haa nɔ wami ɔ kaa nike ní.” (Kpoj. 22:17) Titli ɔ, benɛ wa ya susu níhi nɛ kɔɔ Mawu Matsɛ Yemi ɔ he ngɛ jeha 2011 kpe ngua a sisi ɔ he ɔ, jehanɛ ɔ lɛɛ wa deɔ wawɛɛ po pe sa a ke, “Mawu Matsɛ Yemi ɔ nɛ ba!” Akɛnɛ si nɛ Yesu wo ke, “I ma nɔuu” ɔ woɔ wɔ he wami heje ɔ, waa kɛ wa tsui tsuo ngɛ munyu nɛ bɔfo Yohane tu ɔ mi tie ke: “Amen. Nyɔmtsɛ Yesu, ba!”—Kpoj. 22:20.
Wa nyɛmimɛ nyumuhi kɛ yihi, be mi nɛ nyɛ ngɛ jamɛ a be ɔ mlɛe ɔ, wa kpa nyɛ pɛɛ nɛ nyɛ ná nɔ mi mami kaa wa suɔ nyɛ ti nɔ tsuaa nɔ nɛ́ e kɛ e ‘ní peepee kɛ e we anɔkuale yemi’ tsɔɔ kaa e suɔ Yehowa a!—1 Yoh. 3:18.
Nyɛ nyɛmimɛ,
Yehowa Odasefoli A Nɔyemi Kuu ɔ