Sane Bimi He

◼ Mɛni e sa nɛ e hi wa juɛmi mi ke wa suɔ kaa ke wa gbo ɔ, a kɛ wa weto níhi tsuo aloo fã ko nɛ ha Yehowa asafo ɔ?

Ke adesahi gbo ɔ, a be helo nya níhi nɛ a ngɛ ɔ nɔ he wami hu. (Fiɛlɔ 9:5, 6) Enɛ ɔ he ɔ, ngɛ nihi fuu a blɔ fa mi ɔ, loko a ma gbo ɔ, a peeɔ mlaa nya womi kɛ tsɔɔ bɔnɛ a suɔ kaa a gba a weto níhi ha kɛ fɔɔ si. (2 Ma. 20:1) Behi fuu ɔ, a tsɔɔ nɔ nɛ ma gba weto ní ɔ loo nɔ nɛ a maa to weto ní ɔ kɛ wo e dɛ ɔ ngɛ womi nɛ a pee ɔ nɔ. Ngɛ mahi fuu a nɔ ɔ, ke nɔ ɔ pee we womi ɔ, amlaalo ɔ tsɔɔ bɔnɛ e sa kaa a gba e weto ní ɔ ha. Enɛ ɔ he ɔ, ke wa suɔ kaa ke wa gbo ɔ nɛ a kɛ wa weto níhi tsuo loo fã ko nɛ ha Yehowa asafo ɔ, e he maa hia nɛ waa pee mlaa nya womi ngɛ nɔ, nɛ́ waa tsɔɔ nɔ nɛ e sa kaa e gba weto ní ɔ aloo nɔ nɛ e sa kaa a to weto ní ɔ kɛ wo e dɛ ɔ ngɛ womi ɔ nɔ.

Blɔ nya nítsumi ngua fɔɔ si ngɛ nɔ nɛ a maa to weto ní ɔ kɛ wo e dɛ aloo nɔ nɛ ma gba weto ní ɔ nɔ. E ngɛ bɔnɛ weto ní ɔ klemi maa hi ha nɛ e ma bi nɛ a tsu ní fuu ngɛ he. Weto ní ɔ nya buami kɛ e gbami ma nyɛ maa ngɔ be fuu. Jehanɛ se hu ɔ, behi fuu ɔ, amlaalo ɔ ngɛ blɔ tsɔɔmi nɛ kɔɔ bɔnɛ e sa kaa a tsu weto ní ko he ní ha a he. Pi nɔ tsuaa nɔ nɛ ngɛ asafo ɔ mi ɔ nɛ wa ma nyɛ maa hla lɛ kaa nɔ nɛ e sa kaa waa to wa weto níhi kɛ wo e dɛ aloo e gba wa weto níhi. E sa nɛ nɔ nɛ wa maa hla a nɛ pee nɔ ko nɛ wa ma nyɛ maa fĩa kɛ fɔ e nɔ aloo wa ngɛ hɛ kɛ nɔ fɔmi ngɛ e mi kaa e kɛ bɔnɛ wa suɔ kaa e tsu níhi a he ní ha wɔ ha a ma tsu ní.—Hyɛ munyu nɛ ji “The Wisdom and Benefits of Estate Planning,” nɛ ngɛ December 8, 1998, Awake! ɔ mi ɔ.

Ke Nɔ Ko Hla Mo Kaa Ke E Gbo ɔ, A To E Weto Níhi Kɛ Wo O Dɛ Aloo O Gba Kɛ Ha Nihi: Ke nɔ ko hla mo kaa o pee nɔ́ ko kaa jã a, loko o maa kplɛɛ nɔ aloo o be nɔ kplɛɛe ɔ, kekleekle ɔ, o kɛ sɔlemi nɛ susu blɔ nya nítsumi nɛ lɔɔ ma bi kaa o tsu he ní ɔ he saminya. (Luka 14:28-32) Ke nɔ ɔ gbo ɔ, e maa hia nɛ o ha nihi tsuo nɛ e sa kaa a gba weto ní ɔ kɛ ha mɛ ɔ lemi. Lɔɔ se ɔ, akɛnɛ a ha mo he blɔ kaa o gba weto ní ɔ heje ɔ, e ji o blɔ nya kaa o maa hyɛ konɛ o gba ní ɔmɛ ngɛ mlaa nya nɛ e kɛ bɔnɛ nɔ ɔ ngma ngɛ womi nɛ e pee ɔ mi ɔ nɛ kɔ. Weto ní ɔ kle jio, e klee we jio ɔ, e sa nɛ nɔ nɛ a maa to weto ní ɔ kɛ wo e dɛ aloo nɔ nɛ ma gba a, nɛ e hyɛ nɛ e kɛ blɔ tsɔɔmi nɛ a ngma ngɛ womi nɛ a pee ɔ mi ɔ nɛ tsu ní kɛ pi si. Nike ní saisaa nɛ nɔ ko maa tsɔɔ kaa a kɛ ha Watch Tower Bible and Tract Society of Ghana a ji nike ní nɛ nihi je a tsui mi nɛ a kɛ ha Yehowa asafo ɔ, nɛ e peeɔ asafo ɔ nɔ́.—Luka 16:10; 21:1-4.