Poo O He Nile He Piɛ
1. Mɛni ji ligbi kake kpe klɛdɛɛ ngɛ 2013 sɔmɔmi jeha a mi ɔ munyuyi, nɛ mɛni ji yi mi tomi heje nɛ a to kpe ɔ he blɔ nya?
1 Daa ligbi ɔ, waa kɛ si fɔfɔɛhi nɛ ma nyɛ ma puɛ wa he nile kpeɔ. Enɛ ɔ heje nɛ ligbi kake kpe klɛdɛɛ nɛ wa maa pee ngɛ 2013 sɔmɔmi jeha a mi ɔ yi ji, ‘Poo O He Nile He Piɛ’ ɔ nɛ. (1 Tim. 1:19) A to kpe ɔ he blɔ nya nɛ e ye bua wa ti nɔ tsuaa nɔ nɛ e kɛ hɛdɔ nɛ susu bɔnɛ e kɛ nike ní nɛ se be nɛ wa Bɔlɔ ɔ kɛ ha wɔ ɔ ngɛ ní tsue ha a he.
2. Mɛni sane bimihi nɛ a he hia nɛ a ma ha a heto ngɛ kpe ɔ sisi?
2 Hyɛ Kaa O Maa Na Oti Nɛ Ɔmɛ Lo: A ma ha sane bimihi kpaago nɛ a he hia nɛ kɔɔ he nile he ɔ a heto:
• Mɛni ma nyɛ ma puɛ wa he nile?
• Kɛ wa ma plɛ kɛ tsɔse wa he nile ha kɛɛ?
• Mɛni wa maa pee konɛ wa ko ye nihi a muɔ he fɔ?
• Kɛ Baiblo ɔ mi sisi tomi mlaahi nɛ wa susuɔ he nɛ wa kɛ tsuɔ ní ɔ haa nɛ a naa wɔ kɛɛ?
• Mɛni wa maa pee konɛ wa ko hao ni kpahi ngɛ níhi nɛ kɔɔ he nile he ɔ mi?
• Nihewi kɛ yihewi, kɛ nyɛ maa pee kɛɛ konɛ nyɛɛ da nɔ nyɛmi nya?
• Mɛni jɔɔmihi nɛ nihi nɛ a nyɛɛɔ a he nile nɛ mumi ɔ kudɔɔ ɔ se ɔ ma ná?
3. Mɛni blɔ nɔ wa maa gu kɛ ná kpe ɔ he se?
3 Ngɛ Yehowa yemi kɛ buami nya a, wa ma nyɛ maa da mɔde nɛ Satan ngɛ bɔe kaa e ma puɛ wa he nile ɔ nya. Kɛ gu Mawu Munyu ɔ kɛ asafo ɔ nɔ ɔ, wa hiɔwe Tsɛ nɛ ngɛ suɔmi ɔ ngɛ wɔ dee ke: ‘Blɔ ɔ ji nɛ ɔ nɛ. Nyɛɛ nyɛɛ nɔ.’ (Yes. 30:21) Kpe nɛ ɔ ji blɔhi nɛ Yehowa guu nɔ kɛ tsɔɔ wɔ blɔ ɔ a kpɛti kake. Enɛ ɔ he ɔ, moo to blɔ nya konɛ o ya kpe ɔ. Bu munyuhi nɛ a maa tu ngɛ kpe ɔ sisi ɔ tue saminya, nɛ o susu bɔnɛ o kɛ munyu ɔmɛ ma tsu ní ha a he. Nyɛɛ sɛɛ munyuhi nɛ a maa tu ngɛ kpe ɔ sisi ɔ he ní kaa weku. Ke waa kɛ níhi nɛ a maa tsɔɔ wɔ ɔ tsu ní ɔ, e maa wo wɔ he wami nɛ́ waa ya nɔ nɛ waa ‘hɛɛ he nile kpakpa’ mi, nɛ e maa ye bua wɔ konɛ wa ko ha nɛ Satan je ɔ mi akɔnɔ níhi nɛ ha nɛ waa pee nɔ́ ko nɛ ma puɛ huɛ bɔmi nɛ ngɛ waa kɛ Yehowa wa kpiti ɔ.—1 Pet. 3:16.