‘Ye Odase Kɛ Pi Si’
1. Mɛni nɔ hyɛmi nɔ́ kpakpa bɔfo Paulo pee ngɛ fiɛɛmi nítsumi ɔ mi?
1 “Bɔɔ sane kpakpa a fiɛɛmi he mɔde wawɛɛ.” (2 Tim. 4:5) Ngɛ anɔkuale mi ɔ, bɔfo Paulo kɛ he nile kpakpa lɛ wo Timoteo ga nɛ ɔ nɛ. Niinɛ, kɛ je jeha 47 kɛ ya si jeha 56 M.B. mi ɔ, Paulo gbe ma se sane kpakpa fiɛɛmi blɔ hiami etɛ nya. A tu Paulo he munyu ngɛ Baiblo ɔ mi womi nɛ ji Bɔfo Ɔmɛ A Nítsumi ɔ mi si abɔ kaa e ‘ye odase kɛ pi si.’ (Níts. 23:11; 28:23) Mɛni blɔ nɔ wa maa gu kɛ pee jã ngɛ wa be nɛ ɔ mi?
2. Mɛni blɔ nɔ wa maa gu kɛ ye odase kɛ pi si ke wa ngɛ fiɛɛe ngɛ wehi a mi?
2 Ngɛ Wehi A Mi: Bɔnɛ pee nɛ waa na nihi nɛ a nui sane kpakpa a gble ɔ, e he maa hia nɛ waa tsake be nɛ wa yaa a ngɔ ngɛ ligbi ɔ mi ɔ. Wetsɛ ɔ ma nyɛ maa hi we mi gbɔkuɛ nya si loo Hɔ kɛ Hɔgba. E sa nɛ waa bɔ mɔde kaa waa kɛ nɔ ko maa tu munyu ngɛ we tsuaa we mi, nɛ waa ya wehi nɛ wa nɛ́ nihi ngɛ mi ɔmɛ a mi si abɔ. Nɛ ke o mɔde bɔmi ɔ yi manye hu nɛɛ? Eko ɔ, sɛ womi nɛ o maa ngma loo tɛlifoo nɛ o maa fia mɛ ɔ maa ye manye.
3. Mɛni he blɔ o ngɛ nɛ o kɛ maa ye odase ngɛ ma hɛ mi kɛ be mi nɛ o be fiɛɛmi tso mi?
3 Ma Hɛ Mi Kɛ Be Mi Nɛ A Be Fiɛɛmi Tso Mi: Mwɔnɛ ɔ, Yehowa webi ha nɛ nihi nɛ a suɔ kaa a maa bu mɛ tue ɔ ngɛ “nile” nae. Be komɛ ɔ, e enɛ ɔ yaa nɔ ngɛ “gbɛjegbɛ” loo ‘magbɛhi a nɔ.’ (Abɛ 1:20, 21) Ngɛ wa daa ligbi yami kɛ bami mi ɔ, anɛ e hiɔ wa juɛmi mi kaa wa maa ye odase lo? Anɛ wa ma nyɛ ma de kaa ‘wa ngɔ wa be tsuo kɛ ngɛ fiɛɛ’ lo? (Níts. 18:5) Ke jã a, lɛɛ wa ngɛ wa blɔ nya nítsumi kaa waa ‘ye odase kɛ pi si’ ɔ he ní tsue.—Níts. 10:42; 17:17; 20:20, 21, 24.
4. Mɛni blɔ nɔ nɛ sɔlemi kɛ nɔ́ he juɛmi maa ye bua wɔ konɛ waa ye odase kɛ pi si ngɛ?
4 Be komɛ ɔ, wa gbɔjɔmi ko loo zo gbomi ma ha nɛ wa be odase yee. Anɔkuale mi ɔ, Yehowa le wa gbɔjɔmi ɔmɛ. (La 103:14) Se kɛ̃ ɔ, ke wa ya je si fɔfɔɛ nɛ ɔmɛ a mi ɔ, wa ma nyɛ maa sɔle kɛ bi kã nɛ wa kɛ tu munyu. (Níts. 4:29, 31) Jehanɛ hu, ke wa ngɛ dɛhe nikasemi pee nɛ wa ngɛ Mawu Munyu ɔ he juɛe ɔ, wa ma nyɛ maa susu bɔnɛ wa ma ná sane kpakpa a nɛ he jua wa a he hɛsa ha a he. (Filip. 3:8) Enɛ ɔ maa wo wɔ gɛjɛmi konɛ waa fiɛɛ kɛ kã!
5. Mɛni wa ma nyɛ maa pee kɛ ha nɛ Yoel gbami ɔ nɛ ba mi?
5 Yoel gba kaa loko Yehowa ligbi ngua a nɛ ngɛ gbeye ɔ maa ba a, Mawu webi maa ‘ya a hɛ kpɛ tɛɛ’ nɛ a be hae nɛ nɔ́ ko nɛ tsi a fiɛɛmi ɔ blɔ. (Yoel 2:2, 7-9) Nyɛ ha nɛ waa pee nɔ́ nɛ wa ma nyɛ ngɛ nítsumi nɛ a be tsue ekohu nɛ ɔ mi!