Nyɛɛ Kase Gbali Ɔmɛ A Nɔ Hyɛmi Nɔ́ ɔ—Hosea
1. Mɛni sane nɛ eko ɔ, o bi o he?
1 ‘Mɛni ji níhi nɛ i suɔ kaa i kɛ maa sã afɔle kɛ ha Yehowa?’ Eko ɔ, o bi o he sane nɛ ɔ benɛ o ngɛ Yehowa kpakpa peemi kɛ e mɔbɔ nami babauu ɔ he susue ɔ. (La 103:2-4; 116:12) E ngɛ mi kaa nɔ́ nɛ Yehowa fa Hosea kaa e pee ɔ biɔ nɛ e ngɔ ní komɛ kɛ sã afɔle mohu, se e je e tsui mi faa nɛ e pee. Mɛni blɔ nɔ wa maa gu kɛ kase Hosea?
2. Mɛni blɔ nɔ wa maa gu kɛ kase nɔ hyɛmi nɔ́ kpakpa nɛ Hosea pee ngɛ fiɛɛmi nɛ e fiɛɛ daa a he?
2 Moo Fiɛɛ Ngɛ Haomi Behi A Mi: Nihi nɛ Hosea sɛ gbi ɔ kɔɔ a he titli ji Israel wɛtso nyɔngma matsɛ yemi ɔ. E piɛ bɔɔ jinɛ a po anɔkuale jami se ngɛ lejɛ ɔ. Matsɛ Yeroboam nɛ ji enyɔne ɔ pee yayami kɛ si Yehowa. E ha nɛ na bi amaga jami nɛ Yeroboam nɛ sɛ hlami ɔ to sisi ɔ ya nɔ. (2 Ma. 14:23, 24) Matsɛmɛ nɛ a ba ngɛ Yeroboam nɛ ji enyɔne ɔ se ɔ hu ha nɛ wɛtso nyɔngma matsɛ yemi ɔ puɛ ngɛ Mawu jami blɔ fa mi kɛ ya si be nɛ a kpata ma a hɛ mi ngɛ jeha 740 L.M.B. Se ngɛ lakpa jami nɛ he si ɔ tsuo se ɔ, Hosea ya nɔ nɛ e kɛ anɔkuale yemi sɔmɔ kaa gbalɔ jeha 59. Ke nihi bui munyu ɔ tue aloo a te si kɛ wo wɔ ɔ, anɛ wa ma wa juɛmi nya si kaa wa maa fiɛɛ daa nɛ wa be kpae lo?—2 Tim. 4:2.
3. Mɛni blɔ nɔ nɛ Hosea si himi pee Yehowa mɔbɔ nami ɔ he foni ngɛ?
3 Ngɔɔ O Juɛmi Kɛ Ma Yehowa Mɔbɔ Nami ɔ Nɔ: Yehowa de Hosea ke e ya ngɔ e “yo gba puɛlɔ” ɔ. (Hos. 1:2) E ngɛ mi kaa Hosea kɛ e yo Gomer fɔ binyumu mohu, se pee se ɔ, Gomer je Hosea se nɛ e ya fɔ ajuama bimɛ enyɔ. Hosea tsui mi nɛ e je nɛ e kɛ e yo ɔ yayami pa lɛ ɔ pee mɔbɔ nami agbo nɛ Yehowa je kpo kɛ tsɔɔ Israelbi tue gboli nɛ a tsake a tsui ɔ he foni. (Hos. 3:1; Rom. 9:22-26) Anɛ wa suɔ nɛ waa ngɔ níhi nɛ wa ngɛ ɔ kɛ sã afɔle konɛ wa ha nihi tsuo nɛ a le Yehowa mɔbɔ nami ɔ lo?—1 Kor. 9:19-23.
4. Mɛni ji ní komɛ nɛ wa ma nyɛ kɛ maa sã afɔle kɛ ha Yehowa?
4 Yehowa sɔmɔli komɛ ngɔ nítsumi nɛ ma ha nɛ a ná sika fuu kɛ sã afɔle konɛ a ná be babauu nɛ a kɛ tsu sɔmɔmi nítsumi ɔ. A ti ni komɛ hu sɛ we gba si himi mi, nɛ ni komɛ hu sɛ gba si himi mi se a fɔ we bɔnɛ pee nɛ a nyɛ nɛ a di Matsɛ Yemi ɔ he níhi a se. Ke wa ngɛ Hosea si himi he susue ɔ, eko ɔ, wa ma de ke, ‘I be nyɛɛ nɛ ma pee nɔ́ nɛ Hosea pee ɔ.’ Se ke wa bua jɔ Yehowa dloomi ɔ he wawɛɛ, nɛ waa kɛ wa he fɔ e mumi klɔuklɔu ɔ nɔ konɛ e wo wɔ he wami ɔ, e ma nyɛ maa ngɔ wɔ kɛ tsu ní ngɛ blɔ nɛ wa susuu we he hyɛ nɔ kaa bɔnɛ e kɛ Hosea tsu ní ɔ.—Mat. 19:26; Filip. 2:13.