Wa Maa Kase Nɔ́ Nɛ Haa Nɛ Bua Jɔmi Hii Weku Mi Womi ɔ
1. Kɛ je October 19, 2015 otsi ɔ mi ɔ, mɛni maa ye bua wɔ konɛ bua jɔmi nɛ hi wa weku si himi mi?
1 Waa kɛ bua jɔmi ngɛ nyɛ lemi hae kaa kɛ je October 19, 2015 otsi ɔ mi ɔ, wa maa kase Nɔ́ Nɛ Haa Nɛ Bua Jɔmi Hii Weku Mi womi ɔ ngɛ Asafo Baiblo Mi Ní Kasemi ɔ mi. Akɛnɛ Baiblo mi ga womihi nɛ ngɛ womi nɛ ɔ mi ɔ hi saminya, nɛ e kasemi ma ha nɛ wekuhi ma ná bua jɔmi he je ɔ, nɔ ko nɔ ko be suɔe kaa womi nɛ ɔ kasemi nɛ be ngɛ e yi. Blɔ nya nɛ a to nɛ waa kɛ maa kase womi nɛ ɔ ma ha nɛ wa ma ná be fuu kɛ susu kuku tsuaa kuku he saminya.
2, 3. Kɛ wa ma plɛ kɛ kase Nɔ́ Nɛ Haa Nɛ Bua Jɔmi Hii Weku Mi womi ɔ kɛɛ?
2 Bɔ Nɛ Wa Maa Kase Womi ɔ Ha: A ma gba yi tsuaa yi nɛ wa maa kase ɔ mi enyɔ, loo etɛ, loo eywiɛ. Lɔ ɔ ma ha nɛ wa ma ná be fuu kɛ kane ngmami otihi nɛ a tsɛ se ngɛ kuku ɔmɛ a mi ɔ. Jehanɛ hu ɔ, wa ma ná be kɛ susu bɔ nɛ waa kɛ ngmamihi nɛ a ngma a mi munyu ngɛ kuku ɔmɛ a mi ɔ ma tsu ní ha ngɛ wa si himi mi ɔ he. Wa ngɛ nɔ fɛɛ nɔ he wami woe kaa e ngɔ nɔ́ nɛ wa maa kase ngɛ otsi tsuaa otsi mi ɔ kɛ tsu ní ngɛ e si himi mi.
3 Mi nylɔmi dakahi ngɛ womi nɛ ɔ mi. Munyu nɛ ngɛ daka nɛ ɔmɛ a mi ɔ he hia wawɛɛ. Ke wa kase yi tsuaa yi ta a, wa maa susu munyuhi nɛ ngɛ daka amɛ a mi ɔ he. Enɛ ɔ he ɔ, e sa nɛ a si be nɛ a kɛ susu ngmamihi kɛ sane bimihi nɛ ngɛ daka amɛ a mi ɔ he.
4. Ke wa ngɛ womi ɔ kasee ɔ, mɛni e sa nɛ waa pee, nɛ mɛni he je?
4 Ná He Se Kɛ Pi Si: Ke o kase womi nɛ ɔ hyɛ po ɔ, moo sɛ hlami nɛ o kase lɛ saminya loko o ya asafo mi kpe. Bɔɔ mɔde nɛ o ha sane heto. Jã nɛ o maa pee ɔ maa wo Yehowa hɛ mi nyami, nɛ e ma ha nɛ o maa kai nɔ́ nɛ nyɛ kase ɔ, nɛ e maa wo nihi he wami hulɔ.—La 35:18; Heb. 10:24, 25.