Nyɛɛ Kase Gbali Ɔmɛ A Nɔ Hyɛmi Nɔ́ ɔ—Nahum
1. Mɛni wa ma nyɛ maa kase ngɛ Nahum womi ɔ mi?
1 Kaa bɔ nɛ Nahum gba kɛ fɔ si ɔ, blema Nineve ma doku ɔ ji odase nɛ tsɔɔ kaa Yehowa ma kpata e he nyɛli a hɛ mi, nɛ he nyɛli nɛ a he ngɛ gbeye po be nyɛɛe maa da e hɛ mi. (Nah. 1:2, 6) Nahum gbami ɔ he nɛ wa ma susu ɔ ma ha nɛ wa maa kase níhi fuu nɛ ma nyɛ maa ye bua wɔ ngɛ wa fiɛɛmi ní tsumi ɔ mi.
2. Mɛni blɔ nɔ wa maa gu kɛ ha nɛ wa sɛ gbi ɔ nɛ wo nihi he wami?
2 Moo Wo Nihi A Bua: Ke o kane Nahum womi ɔ nɛ o susuu we he kɛ yɛ tsitsaa a, e maa pee mo kaa Nineve nɛ ji blema Asiria ma ngua a hɛ mi kpatami he munyu pɛ e ngɛ tue. (Nah. 1:1; 3:7) Se, sɛ gbi nɛ ɔ ji sane kpakpa kɛ ha Yehowa we bi. Nahum nɛ e biɛ ɔ sisi ji “Bua Wolɔ” ɔ wo Yuda bi ɔmɛ a bua kaa e piɛɛ bɔɔ nɛ a be a he nyɛli ɔmɛ nae hu! Nahum de hu ke, Yehowa “ngɛ kaa mɔ nɛ he wa ha nihi nɛ ngɛ haomi mi.” (Nah. 1:7) Wɔ hu ke wa ngɛ sane kpakpa a fiɛɛe ɔ, wa woɔ nihi he wami kaa a ba sa we ngɛ Yehowa ngɔ.—Nah. 1:15.
3. Mɛni blɔ nɔ wa maa gu kɛ kase nɔ hyɛmi níhi kɛ nɔ́ he tomi níhi nɛ Nahum kɛ tsu ní ɔ?
3 Ngɔɔ Nɔ Hyɛmi Níhi Kɛ Nɔ́ He Tomi Níhi Kɛ Tsu Ní: Yehowa ngɔ e mumi ɔ kɛ ye bua Nahum nɛ e gba kaa, kaa bɔ nɛ Asiria kpata Egipt matsɛ ma ngua nɛ ji Tebes hɛ mi ɔ, jã pɛpɛɛpɛ nɛ Nineve hu hɛ mi ma kpata. (Nah. 3:8-10) Ke waa kɛ nihi ngɛ je yaya nɛ ɔ nyagbe he ní sɛɛe ɔ, wa ma nyɛ maa tsɔɔ mɛ gbamihi nɛ ngɛ Baiblo ɔ mi nɛ tsɔɔ kaa Yehowa yeɔ e munyu nɔ ɔ. Kaa nɔ hyɛmi nɔ́ ɔ, be nɛ Babilon bi ɔmɛ kɛ Media bi ɔmɛ ba tua Nineve ma a ngɛ jeha 632 loko a fɔ Kristo ɔ mi ɔ, hiɔmi ngua ko nɛ, nɛ Tigris Pa a hia nɛ e ya ku Nineve gbogbo nɛ he wa a fã ko kɛ pue si. A kpata Nineve ma a hɛ mi kaa bɔ nɛ Yehowa de ngɔ to ɔ.—Nah. 1:8; 2:6.
4. Mɛni blɔ nɔ wa maa gu kɛ tsɔɔ ní nɛ nihi maa nu sisi?
4 Mo Ha Nɛ A Nu O Ní Tsɔɔmi ɔ Sisi: Nahum kale níhi, nɛ e ha nɛ ni ɔmɛ po nɔ́ nɛ maa ba a he foni ngɛ a juɛmi mi. E munyu ɔ mi tɛ heii. (Nah. 1:14; 3:1) Jã kɛ̃ nɛ e sa nɛ waa ngɔ munyuhi nɛ a sisi numi yí kɛ tsɔɔ ní. (1 Kor. 14:9) Kekleekle ligbi nɛ o maa ya wetsɛ ko ngɔ ɔ, ha nɛ e le nɔ́ he je nɛ o ba slaa lɛ ɔ. Ke o kɛ nihi ngɛ Baiblo ɔ kasee ɔ, moo ye bua mɛ nɛ a ná hemi kɛ yemi ngɛ Yehowa kɛ e Munyu ɔ mi nɛ a le bɔ nɛ a kɛ nɔ́ nɛ a kase ɔ ma tsu ní ha ngɛ a si himi mi.—Rom. 10:14.
5. Mɛni bua womi munyu nɛ ngɛ Nahum gbami ɔ mi?
5 Hemi kɛ yemi nɛ Nahum ngɛ kaa Yehowa munyu ɔ maa ba mi kokooko ɔ je kpo heii ngɛ Baiblo mi womi nɛ e ngma a mi. Be mi nɛ Satan je yaya nɛ ɔ nyagbe ngɛ sue ɔ, si nɛ Mawu wo kaa waa kɛ “haomi be kpee si enyɔne” ɔ woɔ wa bua.—Nah. 1:9, NW.