Wa He Nɛ Maa Be Ngɛ Fiɛɛmi Ní Tsumi ɔ Mi—Moo Fiɛɛ Ngɛ Ní Tsumi Hehi

Nɔ́ He Je Nɛ E He Hia: Akɛnɛ nihi fuu a se kɛɛ ngɛ a ní tsumi hehi he je ɔ, jã wa fiɛɛ sane kpakpa a ngɛ ní tsumi hehi loko wa nine maa su a nɔ. Odase nɛ a yeɔ ngɛ ní tsumi hehi ɔ ngɛ bua jɔmi nɛ e woɔ yiblii hulɔ, ejakaa nihi hiɔ ní tsumi hehi be fɛɛ be. Jehanɛ se hu ɔ, ní tsuli jeɔ bumi kpo kɛ haa nihi nɛ baa a ngɔ ɔ, ejakaa a susuɔ kaa a kɛ mɛ ma jua yemi. Loko wa fiɛmi ní tsumi ɔ maa nu tso ngɛ ní tsumi hehi ɔ, ja wa tade womi kɛ wa he dlami sa saminya, nɛ waa kɛ nɔ́ se yomi tsu ní. (2 Kor. 6:3) Enɛ ɔ he ɔ, e sa nɛ sɔmɔmi ní tsumi nɔ hyɛlɔ ɔ nɛ hyɛ behi nɛ e sa kaa a ya fiɛɛ ngɛ ní tsumi hehi, kɛ fiɛɛli nɛ e ma ha nɛ a tsu ní ngɛ lejɛ ɔmɛ.

Blɔ Nɔ Nɛ O Maa Gu Kɛ Pee:

Ha nɛ o munyu ɔ nɛ pee kpiti. Ke wa ye ní tsulɔ ko be fuu ɔ, e be wɔ blɔ ngmɛe nɛ waa kɛ lɛ nɛ sɛɛ ní pee se.
Moo ya a ngɔ ngɛ be nɛ ní tsumi fuu be a nɔ mi, eko ɔ mɔtu mla benɛ a je ní tsumi sisi pɛ.
Bɔɔ mɔde nɛ o kɛ ní tsumi nɔkɔtɔma a nɛ tu munyu kekle. Mo je suɔmi, kɛ huɛ bɔmi su kpo. O ma nyɛ ma de lɛ ke, “Akɛnɛ wa pɔɛ nyɛ nami ngɛ we mi he je ɔ, wa ba slaa nyɛ ngɛ nyɛ ní tsumi he ɔ konɛ waa kɛ nyɛ nɛ susu sane ko he kpiti.” Ha nɛ o munyu ɔ nɛ pee kpiti, nɛ o ha lɛ dɛ womi, aloo womi tɛtlɛɛ, aloo womi kpa nɛ o kɛ ya a eko. E maa hi kaa o be yemi kɛ buami nɔ ta woe, bɔ nɛ pee nɛ a ko susu kaa o ma ní juami ha mɛ. Se ke nɔ ɔ bi mo he sane lɛɛ o ma nyɛ maa tu he munyu.
Ke nɔ nɛ ngɛ ní tsumi ɔ nya a tsɔ e hɛ mi ha mo ɔ, mo de lɛ kaa o suɔ nɛ o kɛ ní tsuli kpa amɛ maa tu munyu kpiti. Ngɛ ní tsumi he komɛ ɔ, o ma nyɛ ma bi blɔ konɛ o si wa womi ɔmɛ eko ngɛ he nɛ ní tsuli ɔmɛ pɔɔ a he mi jɔɔmi ngɛ.
O kɛ hɛ si kami, kɛ nɔ́ se yomi nɛ tsu ní. Kaa nɔ hyɛmi nɔ́ ɔ, ke o na kaa ní tsulɔ ɔ kɛ nɔ ko ngɛ munyu tue, aloo e be deka a, e sa nɛ o mlɛ nɛ e gbe nya loko o ya e ngɔ.

Moo Ka Enɛ ɔ Ngɛ Nyɔhiɔ ɔ Mi:

Ke nyɛ ngɛ nyɛ gbɔkuɛ Weku Mawu Jami pee ɔ, nyɛɛ pee bɔ nɛ nyɛ ma plɛ kɛ ye nihi odase ha ke nyɛ ngɛ fiɛɛe ngɛ ní tsumi hehi ɔ he peemi kɛ tsɔɔ.