Ke O Si Sinya Nɛ Nɔ Nɛ Je Kpo ɔ Ji Jokuɛ

Ke wa si sinya ko ngɛ fiɛɛmi mi, nɛ nɔ nɛ je kpo ɔ ji jokuɛ ɔ, e sa nɛ wa de le kaa wa suɔ kaa waa kɛ e fɔli maa tu munyu. Jã nɛ wa maa pee ɔ tsɔɔ kaa wa ngɛ bumi kɛ ha e fɔli. (Abɛ 6:20) Ke jokuɛ ɔ ke waa sɛ tsu ɔ mi po ɔ, e sɛ nɛ waa sɛ mi. Ke e fɔli ɔmɛ be we ɔ mi ɔ, e sa nɛ waa je konɛ waa kpale kɛ ya lejɛ ɔ be kpa.

Ke jokuɛ ɔ ye kɛ je jeha nyɔngma kɛ enuɔ kɛ ya si nyɔngma kɛ nɛɛ po ɔ, e sa kaa wa bi e fɔli a si. Ke e fɔli be we ɔ mi ɔ, wa ma nyɛ ma bi lɛ kaa e fɔli ɔmɛ ngmɛɔ lɛ blɔ nɛ lɛ nitsɛ e kaneɔ womi nɛ e suɔ lo. Ke a ngmɛɔ lɛ blɔ nɛ e peeɔ jã a, lɛɛ wa ma nyɛ ma ha lɛ wa womi ɔmɛ eko, loo wa ma nyɛ ma de lɛ konɛ e ya jw.org.

Ke wa kpale ya slaa niheyo ko loo yiheyo ko nɛ́ e bua jɔ munyu ɔ he ɔ, e sa nɛ wa de lɛ kaa wa suɔ nɛ waa le e fɔli. Ke wa pee jã a, wa ma ná he blɔ kɛ tsɔɔ mɛ nɔ́ he je nɛ wa ba slaa mɛ ɔ. Jehanɛ hu ɔ, waa kɛ mɛ ma nyɛ ma susu Baiblo mi ga womihi nɛ wekuhi ma nyɛ ma ná he se ɔ a he. (La 119:86, 138) Ke wa je bumi kpo kɛ tsɔɔ a fɔli ɔmɛ nɛ wa susu a he ɔ, a maa na kaa nimli kpakpahi ji wɔ, nɛ wa ma ná he blɔ kɛ fiɛɛ sane kpakpa a kɛ tsɔɔ weku ɔ tsuo.​—1Pet 2:12.