KRISTOFOHI A SI HIMI

O Kɛ Nile Nɛ Hla Hɛja Jemi

Mɛni he je nɛ e sa kaa waa kɛ nile nɛ hla hɛja jemi ɔ? Nɔ́ he je ji kaa, ke wa hla sini nɛ wa maa hyɛ, la nɛ wa maa bu tue, wɛbsaiti ko, womi nɛ wa maa kane, aloo video nɔ fiɛmi ko ɔ, wɔ nitsɛmɛ wa ngɛ níhi nɛ waa kɛ maa wo wa juɛmi mi ɔ hlae. Níhi nɛ waa kɛ jeɔ wa hɛja a náa wa ní peepeehi a nɔ he wami. Aywilɛho sane ji kaa, ní peepeehi nɛ a sɛ Yehowa hɛ mi ɔ hiɛ ngɛ hɛja jemihi nɛ a ngɛ mwɔnɛ ɔ, a mi. (La 11:5; Gal 5:19-21) Enɛ ɔ he ɔ, Baiblo ɔ woɔ wɔ he wami kaa waa ya nɔ nɛ waa hi níhi nɛ woɔ Yehowa hɛ mi nyami ɔmɛ a he susue.—Flp 4:8.

NYƐƐ HYƐ VIDEO NƐ JI MƐNI HƐJA JEMI E SA KAA MA HLA? LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

Mɛni blɔ nɔ nɛ yi wu tso ní peepeehi nɛ yaa nɔ ngɛ blema Roma bi a hɛja jemi mi ɔ ngɛ kaa hɛja jemi komɛ nɛ a ngɛ mwɔnɛ ɔ?
Mɛni blɔ nɔ nɛ asafo ɔ mi bimɛ ma nyɛ maa gu kɛ ye bua jokuɛwi, kɛ nihewi kɛ yihewi konɛ a kɛ nile nɛ hla hɛja jemi?
Ke wa maa hla hɛja jemi ko ɔ, kɛ waa kɛ Roma Bi 12:9 ma tsu ní ha kɛɛ?
Mɛni ji hɛja jemi komɛ nɛ sa nɛ a ngɛ o kpɔ ɔ mi?

NÍHI NƐ́ NI KPAHI PEE NƐ WAA KƐ JEƆ WA HƐJA ALOO WƆ NITSƐMƐ WA PEEƆ NÍ KOMƐ KƐ JEƆ WA HƐJA?

Mwɔnɛ ɔ, nihi kaneɔ aloo a hyɛɛ hɛja jemi nɛ ni kpahi to he blɔ nya kɛ jeɔ a hɛja mohu pe nɛ mɛ nitsɛmɛ a maa pee ní komɛ kɛ je a hɛja. Ni kpahi a juɛmi kɛ a susumihi nɛ a kɛ pee níhi nɛ ngɛ sinihi kɛ womihi a mi, kɛ níhi nɛ ngɛ tiivi ɔmɛ a nɔ ɔ, se pi mo nitsɛ o nɔ́. E ngɛ mi kaa wa ma nyɛ maa hyɛ níhi nɛ ni kpahi pee kɛ je wa hɛja mohu lɛɛ, se nihi fuu na kaa ke mɛ nitsɛmɛ a pee ní komɛ kɛ je a hɛja a, se nami ngɛ he. Kaa nɔ hyɛmi nɔ́ ɔ, ni komɛ fiaa saku kɛ guitar aloo a tɛni ɔ fonihi kɛ jeɔ a hɛja. Ni komɛ hu a bua jɔɔ kaa a ma ya fia bɔɔlu, aloo hɛja jemi ní peemi kpahi. Hɛja jemi saisaa ko nɛ wa maa hla a, nyɛ ha nɛ waa “pee níhi tsuo kɛ wo Mawu hɛ mi nyami.”—1Ko 10:31.