Mawu Kɛ Kristo Ma Ha Nɛ Waa Ye Wa He Hwɔɔ Se

Mɛni nyagbahi nɛ o kɛ kpeɔ ngɛ o si himi mi? O ji wekuyi nɛ o ngɛ mɔde bɔe kaa o maa hyɛ o weku ɔ nɔ lo? Anɛ o ji fɔlɔ kake nɛ o ngɛ mɔde bɔe wawɛɛ kaa o maa ye bua o weku ɔ lo? Anɛ o ji niheyo loo yiheyo nɛ o ngɛ sukuu yae nɛ o juami bi doɔ o nya lo? Anɛ hiɔ aloo bwɔmi ha nɛ o ngɛ nɔ́ nae lo? Nɔ fɛɛ nɔ kɛ nyagba ko ngɛ kpee. Kristofohi fuu kɛ nyagbahi babauu ngɛ kpee ngɛ be kake mi. Se wa le kaa e be kɛe nɛ Yehowa ma ha nɛ waa ye wa he kɛ je nyagba nɛ ɔmɛ a he.​—2Ko 4:16-18.

Se loko jamɛ a be ɔ maa su ɔ, wa tsui ma nyɛ maa nɔ wa mi amlɔ nɛ ɔ po ejakaa wa le kaa Yehowa le wa nɔ́ nami ɔmɛ, nɛ e bua jɔɔ anɔkuale nɛ wa yeɔ lɛ kɛ si nɛ wa fĩɔ ɔ he, nɛ e maa jɔɔ wɔ babauu. (Yer 29:11, 12) Yesu hu susuɔ wa he. E wo si kaa e maa piɛɛ wa he be mi nɛ wa ngɛ wa blɔ nya ní tsumi kaa Kristofohi ɔ tsue ɔ. E de ke: “I kɛ nyɛ ngɛ.” (Mat 28:20) Ke wa he be kɛ susu hwɔɔ se heyemi nɛ wa ma ná ngɛ Mawu Matsɛ Yemi ɔ sisi ɔ he ɔ, e haa nɛ hɛ nɔ kami nɛ wa ngɛ kɛ wa pɛɛ si nɛ wa fia kaa wa ma fĩ si ngɛ kahi a mi ɔ mi waa.​—Ro 8:19-21.

NYƐƐ HYƐ VIDEO NƐ JI, NGƆƆ O HƐ KƐ FƆ YESU NƆ, BE MI NƐ AHUMI Ɔ NGƐ FIAE KƐ MA A!​—JƆƆMIHI NƐ MATSƐ YEMI Ɔ KƐ MAA BA HWƆƆ SE, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Ngɛ mɛni blɔ nɔ nɛ adesahi ba pee nihi nɛ a je a he kɛ je Mawu he, nɛ mɛni lɛ je mi kɛ ba?

• Mɛni si himi kpakpa nɛ nihi nɛ a yeɔ Yehowa anɔkuale ɔ ma ná hwɔɔ se?

• Mɛni ma ha nɛ si himi kpakpa nɛ ɔ maa ba?

• Mɛni jɔɔmihi nɛ́ maa ba ngɛ je ehe ɔ mi ɔ lɛ o ngɛ blɔ hyɛe kaa o ma ná?