Níhi Etɛ Nɛ Wa Maa Pee Kɛ Tsɔɔ Kaa Wa Ngɔɔ Wa Hɛ Kɛ Fɔɔ Yehowa Nɔ

David gbe Goliat ejakaa e ngɔ e hɛ kɛ fɔ Yehowa nɔ. (1Sam 17:45) Yehowa suɔ kaa e maa ye bua e sɔmɔli tsuo. (2Kron 16:9) Mɛni wa ma nyɛ maa pee kɛ tsɔɔ kaa wa ngɔɔ wa hɛ kɛ fɔɔ Yehowa nɔ kaa e ye bua wɔ mohu pe nɛ waa kɛ wa hɛ maa fɔ wɔ nitsɛmɛ wa níhi a si kpami kɛ wa nyɛmihi a nɔ? Wa ma nyɛ maa pee níhi etɛ nɛ ɔmɛ:

• Moo sɔle be fɛɛ be. Pi tɔmi ko nɛ wa tɔ̃ ɔ pɛ he nɛ e sa nɛ waa sɔle ngɛ kaa Yehowa nɛ e kɛ ke wɔ, mohu ɔ, e sa nɛ waa sɔle nɛ Yehowa nɛ ha wɔ he wami nɛ wa kɛ da ka ko nɛ ma ha nɛ waa pee yayami ɔ nya. (Mat 6:12, 13) Jehanɛ ɔ hu pi yi mi kpɔhi nɛ wa mwɔ momo ɔ pɛ nɛ wa maa sɔle ngɛ he kaa Yehowa nɛ jɔɔ nɔ, se mohu, e sa nɛ waa sɔle kaa Yehowa nɛ tsɔɔ wɔ blɔ nɛ e ha wɔ juɛmi loko waa mwɔ yi mi kpɔ ngɛ níhi a he.​—Yak 1:5

• Moo to blɔ nya kɛ ha Baiblo ɔ kanemi kɛ e kasemi. Moo kane Baiblo ɔ daa ligbi. (La 1:2) Mo pue o yi mi tɛ ngɛ Baiblo mi nɔ hyɛmi níhi a he nɛ́ o kɛ nɔ́ nɛ o kase ngɛ mi ɔ nɛ tsu ní. (Yak 1:23-25) Mo dla o he loko o ya fiɛɛmi mohu pe nɛ o kɛ o hɛ maa fɔ níhi a si kpami nɛ o ngɛ ɔ nɔ. Mo dla o he loko o ya asafo mi kpehi konɛ o ná asafo mi kpe ɔmɛ a he se kɛ pi si

• O kɛ Yehowa asafo ɔ nɛ nyɛɛ be fɛɛ be. Moo le blɔ tsɔɔmi ehehi nɛ asafo ɔ kɛ baa a nɛ o bɔ mɔde kaa o kɛ ma tsu ní pɛpɛɛpɛ. (4Mo 9:17) Ke asafo mi nikɔtɔmahi kɛ ga womi loo blɔ tsɔɔmi ko ha a, moo bu tue.​—Heb 13:17

NYƐƐ HYƐ VIDEO NƐ JI, E SƐ NƐ WAA YE YI MI WAMI GBEYE, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni ji ní komɛ nɛ wo wa nyɛmimɛ nyumu ɔmɛ kɛ yi ɔmɛ a he gbeye?

• Mɛni lɛ ye bua mɛ nɛ a nyɛ nɛ a da a gbeye yemi ɔ nya?