KRISTOFOHI A SI HIMI
Fɔli—Nyɛɛ Ye Bua Nyɛ Bimɛ Konɛ A Kɛ Nɔ́ Nɛ Yehowa Ngɛ Mɛ Tsɔɔe ɔ Nɛ Tsu Ní
Blɔ nɛ hi pe kulaa nɛ fɔli ma nyɛ maa gu nɔ kɛ ye bua a bimɛ konɛ a kɛ nɔ́ nɛ Yehowa ngɛ mɛ tsɔɔe ɔ nɛ tsu ní ji kaa, nɛ a maa ye bua mɛ konɛ a ná Kristofohi a kpehi nɛ a yaa he se. Nɔ́ nɛ nihewi kɛ yihewi naa, nɔ́ nɛ a nuɔ kɛ bɔ nɛ a jeɔ a tsui mi kɛ haa sanehi a heto ngɛ kpehi a sisi ɔ ma nyɛ maa ye bua mɛ nɛ a kase Yehowa he ní konɛ a kɛ lɛ huɛ bɔmi ɔ mi nɛ wa. (5Mo 31:12, 13) Ke fɔlɔ ji mo ɔ mɛni blɔ nɔ o maa gu kɛ ye bua o bi ɔ konɛ e ná asafo mi kpehi nɛ e yaa he se?
Bɔɔ mɔde nɛ o ya asafo mi kpehi ngɛ Matsɛ Yemi Asa a nɔ.—La 22:22
Ke o ya Matsɛ Yemi Asa a nɔ ɔ, mo ná be nɛ o kɛ nyɛmimɛ nɛ sɛɛ ní loko kpe ɔ nɛ je sisi kɛ jehanɛ ɔ se hu ke a kpa kpe ɔ.—Heb 10:25
Moo bɔ mɔde kaa o ma ha nɛ o weku mi bi ɔmɛ a kpɛti nɔ fɛɛ nɔ nine nɛ su womihi nɛ wa kase ɔ ngɛ asafo mi kpehi a sisi ɔ nɔ, nɔ́ nɛ a print ɔ jio nɔ́ nɛ a gbla kɛ fɔ klama nɔ jio
Ye bua o bi ɔ konɛ e ngɔ lɛ nitsɛ e munyuhi kɛ ha sane heto.—Mat 21:15, 16
Moo tu asafo mi kpe ɔmɛ kɛ blɔ tsɔɔmi nɛ wa nine suɔ nɔ ngɛ lejɛ ɔ he munyu kpakpa
Ye bua o bimɛ ɔmɛ nɛ a ngɔ a he kɛ wo ní tsumi komɛ kaa Matsɛ Yemi Asa a nɔ dlami mi nɛ́ a kɛ nihi nɛ a wa ngɛ jeha mi ɔ nɛ́ sɛɛ ní
E biɔ mɔde bɔmi wawɛɛ loko o ma nyɛ maa ye bua o bimɛ nɛ a hɛ kɛ su Yehowa he nɛ be komɛ po ɔ, jã a peemi he waa. Se kɛ ɔ, o ma nyɛ ma ná nɔmi mami kaa Yehowa maa ye bua mo.—Yes 40:29.
NYƐƐ HYƐ VIDEO NƐ JI FƆLI, NYƐƐ NGƆ NYƐ HƐ KƐ FƆ YEHOWA KƐ HE WAMI NƐ E HAA NYƐ Ɔ NƆ LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Kɛ pɔ nɛ tɔɔ Zack kɛ Leah he ɔ ngɛ a nɔ he wami nae ha kɛɛ?
Mɛni he je nɛ e sa nɛ fɔli nɛ a bi Yehowa konɛ e ye bua mɛ ɔ?
Mɛni blɔhi a nɔ nɛ Zack kɛ Leah ngɔ a hɛ kɛ fɔ Yehowa nɔ konɛ e ye bua mɛ nɛ a nyɛ nɛ a ye manye?