Anɛ O Le Lo?
Mɛni he je nɛ e hi kaa Yehowa ngmɛ blɔ nɛ a ngɔ lahuɛ loo okpo kɛ beleku lahuɛ kɛ sã afɔle ɔ?
NGƐ Mose mlaa a mi ɔ, Yehowa ngmɛ blɔ kaa a ngɔ lahuɛ loo okpo kɛ beleku lahuɛ tsuo kɛ sã afɔle. Ngɛ mlaa a mi ɔ, a tsɛɔ lohwe pɛlitsɛmɛ enyɔ nɛ ɔmɛ tsuo a biɛ ke a ngɛ afɔle sami he munyu tue, nɛ a nyɛɔ nɛ a kɛ eko fɛɛ eko sãa afɔle. (3 Mose 1:14; 12:8; 14:30) Mɛni he je nɛ e hi kaa Yehowa pee jã a? Yi mi tomi kake ji kaa pi be fɛɛ be nɛ a náa lahuɛ loo okpo. Mɛni he je?
Lahuɛ loo okpo
Ke e su latsa be ɔ, lahuɛhi loo okpohi hiɔ Israel zugba a nɔ tsuo. Ngɛ October mi ɔ, a yaa mahi nɛ a ngɛ Israel zugba a woyi je nɛ a nɔ dɔla a nɔ, nɛ ke e su latsa be ɔ, a kpaleɔ a se kɛ baa Israel. (Lahi 2:11, 12; Yer. 8:7) Enɛ ɔ tsɔɔ kaa ngɛ blema Israel ɔ, ke e su fĩɛ be ɔ, e he waa kaa Israel bi ɔmɛ ma ná lahuɛ loo okpo nɛ a kɛ sã afɔle.
Beleku Lahuɛ
Se beleku lahuɛhi lɛɛ a pɔɛ blɔ hiami. Ngɛ jeha a mi tsuo ɔ, a naa beleku lahuɛhi ngɛ Israel. Jehanɛ hu ɔ, a lɛɛ mɛ ngɛ we mi. (Kɛ to Yohane 2:14, 16 he.) Womi nɛ ji, Bible Plants and Animals ɔ de ke, “a lɛɛ beleku lahuɛhi ngɛ mahi kɛ kɔpehi tsuo nɛ a ngɛ Palestina mi, nɛ wetsɛ fɛɛ wetsɛ ngɛ beleku lahuɛhi a tsu ngɛ e we mi.”—Kɛ to Yesaya 60:8 ɔ he.
Beleku lahuɛ ngɛ e tsu mi
Enɛ ɔ tsɔɔ kaa Yehowa ngɛ suɔmi, nɛ e susuɔ nɔ he, ejakaa e kplɛɛ nɔ kaa a ngɔ lohwe pɛlitsɛmɛ nɛ a ma ná ngɛ Israel be fɛɛ be ngɛ jeha a mi ɔ kɛ sã afɔle.