Anɛ O kai Lo?
Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:
Ke wa ná be nɛ waa kɛ Yehowa sɛɛ ní, wa bu lɛ tue, nɛ wa susu níhi nɛ e de wɔ ɔ he ɔ, kɛ wa ma ná he se ha kɛɛ?
Wa maa mwɔ yi mi kpɔhi nɛ a da, wa maa pee tsɔɔli kpakpahi, wa hemi kɛ yemi mi maa wa, nɛ suɔmi nɛ wa ngɛ kɛ ha Yehowa a hu mi maa wa.—w22.01, bf. 30-31.
Ke wa ná hemi kɛ yemi ngɛ Yehowa kɛ nihi nɛ e hla kaa a nyɛɛ níhi a hɛ mi ngɛ asafo ɔ mi ɔ a mi ɔ, kɛ e maa ye bua wɔ ha kɛɛ?
Amlɔ nɛ ɔ ji be nɛ e sa nɛ wa ná hɛ kɛ nɔ fɔmi nɛ mi wa ngɛ blɔ nɔ nɛ Yehowa guɔ kɛ peeɔ níhi ɔ mi, nɛ wa juɛmi nɛ ko pee wɔ enyɔɔnyɔ ngɛ blɔ tsɔɔmihi nɛ asafo mi nikɔtɔma amɛ kɛ haa wɔ kɛ yi mi kpɔhi nɛ a mwɔɔ ɔ he. Jã peemi maa ye bua wɔ nɛ ngɛ amanehlu ngua a mi ɔ, ke e ba kaa wa nine su blɔ tsɔɔmi ko nɔ nɛ wa susu kaa e kɛ ní tsumi maa ye loo sisi numi be he po ɔ, wa maa bu tue.—w22.02, bf. 4-6.
Mɛni bɔfo ɔ ngɛ tsɔɔe benɛ e de Zakaria ke a maa na “sumui kɛ e nya kpa ngɛ [Amlaalo] Zerubabel dɛ” ɔ? (Zak. 4:8-10, NW)
Nina nɛ ɔ ha nɛ Mawu we bi na kaa e ngɛ mi kaa sɔlemi we ɔ be kaa blema nɔ́ ɔ mohu lɛɛ, se a maa gbe nya, nɛ e maa pee kaa bɔ nɛ Yehowa ngɛ hlae ɔ.—w22.03, bf. 16-17.
Mɛni blɔ nɔ o maa gu kɛ pee ‘nɔ hyɛmi nɔ́ ngɛ munyu tumi mi’? (1 Tim. 4:12)
Waa kɛ mi mi jɔmi tuɔ munyu ngɛ fiɛɛmi mi, wa jeɔ wa tsui mi kɛ laa, nɛ wa haa munyu heto ngɛ asafo mi kpe sisi, wa tuɔ anɔkuale, nɛ wa tuɔ munyuhi nɛ woɔ nɔ he wami, nɛ wa tui nɔ jɛmi munyu.—w22.04, bf. 6-9.
Mɛni he je nɛ lohwe awi yelɔ nɛ a tu e he munyu ngɛ Kpo Jemi 13:1, 2 ɔ ngɛ suhi tsuo nɛ lohwe awi yeli eywiɛ (nɔ yemihi) nɛ a tu a he munyu ngɛ Daniel yi 7 ɔ ngɛ ɔ eko ɔ?
Lohwe awi yelɔ nɛ a tu e he munyu ngɛ Kpo Jemi yi 13 ɔ dɛ si kɛ ha nɔ yemi kake ko, kaa eko ɔ, Roma nɔ yemi ɔ. Mohu ɔ, e daa si kɛ ha nɔ yemihi tsuo nɛ a ye adesahi a nɔ.—w22.05, bf. 9.
Mɛni ji nɔ́ titli nɛ ke wa pee ɔ, e maa tsɔɔ kaa wa ngɛ nɔ mi mami kaa Mawu maa kojo ngɛ dami mi?
Ke nɔ ko jɛ wɔ, e pee nɔ́ ko nɛ e gba wa nya, loo e pee yayami ko kɛ si wɔ ɔ, wa bɔɔ mɔde kaa wa maa ngmɛɛ abofu ɔ kɛ dɔdɔɛ ɔ he, nɛ́ wa si sane ɔ ha Yehowa. E ma je nyagbahi nɛ yayami ngɔ kɛ ba a tsuo kɛ je.—w22.06, bf. 10-11.
Ke nyɛminyumu ko ngɛ sɔlee ngɛ asafo mi kpe sisi ɔ, mɛni nɛ e sa nɛ e hi e juɛmi mi?
Ke nyɛminyumu ko ngɛ sɔlee ɔ, e sɛ nɛ e pee kaa e ngɛ asafo ɔ ga woe loo e ngɛ adafi fiae. E sɛ nɛ e tu “munyu fuu,” titli ɔ, ke e maa sɔle kɛ je asafo mi kpe sisi. (Mat. 6:7)—w22.07, bf. 24-25.
Mɛni blɔ nɔ nɛ “nihi nɛ a pee ní yayamihi” ɔ ma ná “kojomi he gbogboehi a si tlemi” ɔ? (Yoh. 5:29)
Tsa pi níhi nɛ a pee loko a gbo ɔ nɔ nɛ a maa da kɛ kojo mɛ. Mohu ɔ, ke a tle mɛ si ɔ, a maa da bɔ nɛ a maa pee a ní ha a nɔ kɛ kojo mɛ.—w22.09, bf. 18.
Mɛni munyu nɛ ngɛ bua jɔmi nɛ J. F. Rutherford tu ngɛ kpe ko sisi ngɛ September 1922?
A de ngɛ kpe nɛ a pee ngɛ Cedar Point, Ohio, U.S.A. ɔ sisi ke: “Matsɛ ɔ ngɛ nɔ yee! Nyɛ ji e nane mi dali nɛ nyɛ fiɛɛɔ sane kpakpa a nɛ. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e Matsɛ Yemi ɔ he gɔgɔ!”—w22.10, bf. 3-5.
Yesaya yi 30 ɔ tsɔɔ kaa Mawu yeɔ bua wɔ konɛ wa nyɛ nɛ wa fĩ si. Mɛni blɔ nɔ nɛ e guɔ kɛ peeɔ jã?
Yesaya yi 30 ɔ tsɔɔ kaa Yehowa (1) buɔ wa sɔlemi tue wawɛɛ nɛ e haa wɔ heto, (2) e kɛ blɔ tsɔɔmi haa wɔ, nɛ (3) e jɔɔ wɔ mwɔnɛ ɔ, nɛ hwɔɔ se hu e maa jɔɔ wɔ.—w22.11, bf. 9.
Mɛni he je nɛ wa ma nyɛ ma de ke munyuhi nɛ ngɛ La 37:10, 11, 29 ɔ, ba mi ngɛ blema be ɔ mi, nɛ e maa ba mi hwɔɔ se hulɔ?
David munyu ɔ hu tsɔɔ bɔ nɛ si himi ɔ maa hi ha ngɛ Matsɛ Salomo be ɔ mi. Yesu tsɛ munyu nɛ ngɛ La 37: 11 ɔ se benɛ e ngɛ paradeiso nɛ maa ba zugba a nɔ hwɔɔ se ɔ he munyu tue ɔ. (Mat. 5:5; Luka 23:43)—w22.12, bf. 8-10, 14.