Bɔɔ Mɔde Kaa O Maa Kase Ní Hehi Ke O Ngɛ Ní Kasee

Loko wa maa kase ní ɔ, wa ma nyɛ ma bi wa he ke, ‘Mɛni lɛ i ngɛ blɔ hyɛe kaa ma kase?’ Se kɛ̃ ɔ, e sɛ nɛ wa ha nɛ nɔ́ nɛ wa ngɛ blɔ hyɛe kaa wa maa kase ɔ nɛ je wa juɛmi ngɛ nɔ́ nɛ Yehowa ngɛ hlae nɛ e tsɔɔ wɔ ɔ nɔ. Kɛ wa ma plɛ kɛ le nɔ́ nɛ Yehowa ngɛ hlae nɛ e tsɔɔ wɔ ha kɛɛ?

Moo sɔle kɛ bi juɛmi. Ke o ngɛ ní kasee ɔ, mo bi Yehowa nɛ e ye bua mo nɛ o le nɔ́ nɛ e ngɛ hlae nɛ o kase amlɔ nɛ ɔ. (Yak. 1:5) Koo ngɔ o juɛmi kɛ ma nɔ́ nɛ o le momo ɔ nɔ pɛ.—Abɛ 3:5, 6.

Ha nɛ Mawu Munyu ɔ nɛ ná o nɔ he wami. “Mawu munyu ɔ hɛ ngɛ.” (Heb. 4:12) Be fɛɛ be nɛ wa maa kane Baiblo ɔ, e ma nyɛ maa tsɔɔ wɔ nɔ́ ehe ko, nɛ e maa ye bua wɔ ngɛ blɔ kpahi a nɔ ngɛ wa si himi mi. Se loko e ma nyɛ maa ba jã a, e sa nɛ wa yɔse kaa e biɔ nɛ waa le nɔ́ nɛ Mawu ngɛ wɔ tsɔɔe.

O bua nɛ jɔ nɔ́ fɛɛ nɔ́ nɛ Yehowa ngɔɔ kɛ tsɔɔ wɔ ní ɔ he. Mumi mi niye ní nɛ Yehowa kɛ haa wɔ ɔ ngɛ kaa nɔ́ nɛ e ‘ngmɛ wɔ okplɔɔ kɛ e nɔ niye ní kpakpahi.’ (Yes. 25:6) Enɛ ɔ he ɔ, ko kua mumi mi niye ní nɛ o bua jɔɛ he ɔ. Ke o pee jã a, o ma ná he se saminya, nɛ o bua maa jɔ blɔ fɛɛ blɔ nɛ Mawu guɔ nɔ kɛ tsɔɔ wɔ ní ɔ he wawɛɛ!