Anɛ O Le Lo?

Kɛ wa plɛ kɛ le kaa la he hia wawɛɛ ngɛ Israelbi ɔmɛ a be ɔ mi ha kɛɛ?

ISRAELBI ɔmɛ nɛ a hi si blema a bua jɔ la he wawɛɛ. Baiblo ɔ tu ni komɛ nɛ a fia kpa sakuhi nɛ a la a he munyu si abɔ. Ngɛ anɔkuale mi ɔ, Baiblo ɔ mi womi ɔmɛ fuu ji lahi. Kaa nɔ hyɛmi nɔ́ ɔ, La womi ɔ, Lahi A Mi La, kɛ Kɔmɔ Yemi womi ɔ ji lahi. Womi nɛ ji Music in Biblical Life ɔ de ke, “Baiblo ɔ tsɔɔ heii kaa Israelbi ɔmɛ la lahi daa ligbi ngɛ a si himi mi.”

A fiaa la daa ligbi. Israelbi ɔmɛ fiaa sakuhi nɛ a laa kɛ tsɔɔ bɔ nɛ a ngɛ he nue ha. (Yes. 30:29) Yihi fiaa akasawahi, a laa bua jɔmi lahi nɛ a doɔ ke a ngɛ ní peemi komɛ pee. Kaa nɔ hyɛmi nɔ́ ɔ, peeɔ jã ke a ngɛ matsɛ woe, loo ke tabuli ye kunimi ngɛ ta mi loo ke a ngɛ gbijlɔ komɛ yee. (Many. 11:34; 1 Sam. 18:​6, 7; 1 Ma. 1:​39, 40) Jehanɛ hu ɔ, ke Israelbi ɔmɛ a suɔli gbo ɔ, a laa aywilɛho yemi lahi. (2 Kron. 35:25) E ngɛ heii kaa Israelbi ɔmɛ suɔ la wawɛɛ.

A fia lahi ngɛ matsɛ we ɔ. Israel matsɛmɛ ɔmɛ bua jɔ lahi a he wawɛɛ. Matsɛ Saul ha nɛ David ba hi matsɛ we ɔ konɛ e ba fia saku kɛ ha lɛ. (1 Sam. 16:​18, 23) Pee se benɛ David nitsɛ ba pee matsɛ ɔ, e pee la fiami níhi fuu nɛ e po la ngɔngɔɛhi hulɔ. Jehanɛ hu ɔ, e bua nihi a nya konɛ a la lahi ngɛ Yehowa sɔlemi we ɔ. (2 Kron. 7:6; Amos 6:5) Matsɛ Salomo hu ngɛ nyumuhi kɛ yihi nɛ a laa ngɛ matsɛ we ɔ.—Fiɛɛ. 2:8.

Israelbi ɔmɛ la kɛ je Yehowa yi. La nɛ Israelbi ɔmɛ laa ngɛ Yehowa sɔmɔmi mi ɔ ji nɔ́ ko nɛ he hia mɛ wawɛɛ. Ngɛ anɔkuale mi ɔ, nyumuhi 4,000 nɛ a he be ɔ ngɔ la fiami níhi kɛ je Yehowa yi ngɛ Yerusalem sɔlemi we ɔ. (1 Kron. 23:5) Jehanɛ hu ɔ, a fia ayawahi, kpã sakuhi, sakuhi, kɛ titimatihi. (2 Kron. 5:12) Se tsa pi nyumu nɛ ɔmɛ pɛ nɛ a la kɛ je Yehowa yi. Ngɛ anɔkuale mi ɔ, Israelbi fuu laa lahi ke a yaa ye gbijlɔhi ngɛ Yerusalem ɔ. A tsɛɔ la nɛ ɔmɛ nɛ a laa a ke Yoku Kuɔmi La. (La 120–134) Womihi nɛ blema Yudabi ɔmɛ ngma a tsɔɔ kaa Israelbi ɔmɛ laa La womia ɔ mi la komɛ ke a ngɛ Hetsɔmi ɔ yee ɔ.

Loloolo ɔ, la he hia Mawu we bi wawɛɛ. (Yak. 5:13) Wa laa lahi kɛ jeɔ Yehowa yi. (Efe. 5:19) Lahi nɛ wa laa a haa nɛ waa kɛ wa nyɛmimɛ Kristofohi peeɔ kake. (Kol. 3:16) Jehanɛ hu ɔ, e woɔ wɔ he wami ke waa kɛ nyagbahi ngɛ kpee. (Níts. 16:25) Lahi nɛ wa laa a ji blɔ kake nɔ nɛ wa guɔ kɛ tsɔɔ kaa wa ngɛ hemi kɛ yemi ngɛ Yehowa mi, nɛ wa suɔ lɛ.