Noa Kpɛ Lɛ

NOA ngɛ yo kɛ binyumuhi etɛ. A tsɛɛ mɛ Shem, Ham kɛ Yafet. A ti nɔ tsuaa nɔ ngɛ yo kakaaka. Lɔɔ he ɔ nimli nɛ ngɛ Noa weku ɔ mi ɔ, a yibɔ ji kpaanyɔ.

Mawu ha nɛ Noa pee nɔ́ ko nɛ ngɛ nyakpɛ. E de lɛ ke e kpɛ lɛ nguaa ko. Lɛ nɛ ɔ kle kaa mele, se e ngɛ kaa daka nguaa nɛ e ka gagaaga hulɔ. Mawu de lɛ ke, ‘Kpɛɛ lɛ ɔ siaudo etɛ nɛ́ o pee tsuhi kɛ wo mi.’ Noa kɛ e weku ɔ maa hi tsu ɔ ekomɛ a mi, nɛ a niye ní kɛ lohwehi hu maa hi tsu kpa amɛ a mi.

Mawu de Noa ke e kpɛ lɛ ɔ bɔnɛ nyu be nyɛe maa sɛ mi. E de ke: ‘Ma ha nyu afua nguaa ma ba kpata je ɔ tsuo hɛ mi. Nɔ tsuaa nɔ nɛ be lɛ ɔ mi ɔ ma gbo.’

Noa kɛ e bimɛ ɔmɛ bu Yehowa tue nɛ a je lɛ ɔ kpɛmi sisi. Se ni kpa amɛ lɛɛ muɔmi kɛkɛ nɛ a ngɛ mɛ muɔe. A ya nɔ nɛ a pee ní yayamihi. Benɛ Noa de mɛ nɔ́ nɛ Mawu ma peemi ɔ, nɔ ko nɔ ko he we lɛ yi.

A ngɔ be gagaa kɛ kpɛ lɛ ɔ ejakaa e kle saminya. Nyagbe ɔ, a gbe lɛ ɔ kpɛmi nya ngɛ jehahi fuu se. Mawu de Noa ke e ngɔ lohwehi kɛ wo lɛ ɔ mi. E de lɛ ke e ngɔ lohwe henɔhi komɛ enyɔɔnyɔ, nɛ ji eku kɛ eyo kɛ wo lɛ ɔ mi. Se lohwe kpahi komɛ lɛɛ Mawu de lɛ ke e ngɔ kpaagokpaago kɛ wo lɛ ɔ mi. Jehanɛ se, Mawu de Noa ke e ngɔ lohwe pɛlitsɛmɛ slɔɔtoslɔɔtohi kɛ wo lɛ ɔ mi. Noa pee bɔnɛ Mawu de lɛ ɔ pɛpɛɛpɛ.

Pee se ɔ, Noa kɛ e weku ɔ hu sɛ lɛ ɔ mi. Kɛkɛ nɛ Mawu nga sinya a. Noa kɛ e weku ɔ mlɛ ngɛ lɛ ɔ mi. Ngɔɔ lɛ kaa o piɛɛ a he ngɛ lɛ ɔ mi nɛ nyɛ ngɛ mlɛe. Anɛ nyu afua ko maa ba niinɛ kaa bɔnɛ Mawu de ɔ lo?