Matsɛ Yayami Ko Ye Mizraim Nɔ

NYUMUHI nɛ o ngɛ hyɛe ngɛ́ foni ɔ mi ɔ ngɛ ni ɔmɛ a nɔ nyɛe nɛ a tsu ní. Hyɛ bɔnɛ nyumu ɔ ngɛ ní tsuli ɔmɛ a kpɛti nɔ kake kpa fiaae ha! Ní tsuli ɔmɛ ji Yakob sisibi, nɛ a tsɛɛ mɛ ke Israelbi. Nɛ nyumuhi nɛ ngɛ a nɔ nyɛe konɛ a tsu ní ɔ ji Mizraimbi. Israelbi ɔmɛ plɛ nyɔguɛhi kɛ ha Mizraimbi ɔmɛ. Kɛ enɛ ɔ plɛ kɛ ba kɛɛ?

Yakob weku agbo ɔ hi si ngɛ tue mi jɔmi mi ngɛ Mizraim jeha babauu. Nɛ Yosef nɛ ji Farao se yelɔ hyɛ a nɔ saminya. Se Yosef ba gbo. Nɛ Farao ehe, nɛ sume Israelbi ɔmɛ ba ye Mizraim nɔ matsɛ.

Lɔɔ he ɔ, Farao yayami nɛ ɔ pee Israelbi ɔmɛ nyɔguɛhi. Nɛ e ngɔ nyumuhi nɛ a yi mi wa kɛ to a nya. A nyɛ Israelbi ɔmɛ a nɔ wawɛɛ nɛ a po mahi ha Farao. Se kɛ̃ ɔ, Israelbi ɔmɛ a yibɔ ngɛ hiɛe. Be komɛ a se ɔ, Mizraimbi ɔmɛ ye gbeye kaa Israelbi ɔmɛ a he maa hiɛ fuu nɛ a he ma ba wa pe mɛ.

O le nɔ́ nɛ Farao pee lo? E de yi ɔmɛ nɛ yeɔ bua Israel yi ɔmɛ kɛ fɔɔ ɔ ke: ‘Nyɛɛ gbe binyumuyo tsuaa binyumuyo nɛ a ma fɔ.’ Se yi nɛ ɔmɛ ji nimli kpakpahi, heje ɔ, a gbi bimwɔwi ɔmɛ.

Lɔɔ he ɔ, Farao fã e ma mi bi ɔmɛ ke: ‘Nyɛɛ gbe Israel binyumuyo tsuaa binyumuyo. Se nyɛ ko gbe biyiwi ɔmɛ.’ Anɛ pi yiwutso ní peepee ji nɛ ɔ lo? Ha nɛ waa hyɛ bɔnɛ a baa binyumuwi ɔmɛ a kpɛti nɔ kake yi ha.