Yesu Ha Nihi Fuu Niye Ní

NƆ́ KO ba nɛ hí kulaa. A gbe Yohane Baptisilɔ ɔ be bɔɔ pɛ ji nɛ ɔ. Herodia nɛ ji Matsɛ ɔ yo ɔ sume e sane. Lɔɔ he ɔ, e ha nɛ matsɛ ɔ po Yohane yi.

Benɛ Yesu nu he ɔ, e ye aywilɛho wawɛɛ. Lɛ nɔ kake e ho he ko banee ya. Se ni ɔmɛ nyɛɛ e se. Benɛ Yesu na nimli babauu ɔ, e mi mi sã lɛ ngɛ a he. Nɛ e tu Mawu matsɛ yemi ɔ he munyu kɛ tsɔɔ mɛ, nɛ e tsa a kpɛti nihi nɛ be he wami ɔ hulɔ.

E kaseli ɔmɛ ba e ngɔ jamɛ a gbɔkuɛ ɔ, nɛ a ba de lɛ ke: ‘Je jɔ nɛ hiɛ ɔ hu ngɛ banee. Moo wo ni ɔmɛ blɔ kɛ ya kɔpe ɔmɛ a mi, konɛ a ya he niye ní nɛ a ye.’

Yesu ha heto ke: ‘E sɛ kaa a ya. Nyɛ hla nɔ́ ko ha mɛ nɛ a ye.’ Kɛkɛ nɛ e bi Filipo ke: ‘Jije wa ma ná niye ní ngɛ ma he bɔnɛ e maa su ni ɔmɛ tsuo?’

Filipo ha heto ke: ‘Ke wa ma he niye ní bɔnɛ nɔ tsuaa nɔ ma na bɔɔ ko nɛ e ye ɔ, lɛɛ wa ma puɛ sika fuu.’ Kɛkɛ nɛ Andrea de ke: ‘Jokuɛ nyumuyo nɛ ɔ hɛɛ abolo enuɔ kɛ lo enyɔ. Se e be ni ɔmɛ tsuo sue.’

Yesu de mɛ ke: ‘Nyɛ ha nɛ ni ɔmɛ nɛ a hi si ngɛ nga a nɔ.’ Kɛkɛ nɛ e na Mawu si ngɛ niye ní ɔ he, nɛ e bɔni abolo ɔ mi kumi tsɔwitsɔwi. Lɔɔ se ɔ, e kaseli ɔmɛ gba abolo kɛ lo ɔ ha ni ɔmɛ tsuo. Nyumuhi nɛ ngɛ a kpɛti ɔ a yibɔ ji 5,000, nɛ yihi kɛ jokuɛwi akpehi abɔ hu piɛɛ a he. Mɛ tsuo a ye nɛ a tɔ. Nɛ benɛ kaseli ɔmɛ bua sisi bibliwi ɔmɛ a nya a, a ná kusii (kɛ̃tɛ) 12 sɔuu!

Jehanɛ ɔ, Yesu ha e kaseli ɔmɛ sɛ lɛ mi konɛ á ya Galilea Wo ɔ se. Kɔɔhiɔ nɛ nya wa ko fia jamɛ a gbɔkuɛ ɔ, nɛ oslɔke ɔ tsitsɛɛ lɛ ɔ kɛ ya hiɛ kɛ hiɛ. Kaseli ɔmɛ ye gbeye wawɛɛ. Kɛkɛ nɛ nyɔ mi kpɛti ɔ, a na nɔ ko nɛ ngɛ nyu ɔ nɔ nyɛɛe kɛ ma a ngɔ. A ye gbeye nɛ a kpa ngmlaa ejakaa a li nɔ́ nɛ a na a.

Yesu de mɛ ke: ‘Nyɛ ko ye gbeye. Imi!’ Se loloolo ɔ, a he we lɛ yi. Lɔɔ he ɔ, Petro de ke: ‘Nyɔmtsɛ, ke mo niinɛ ɔ, lɛɛ de mi nɛ ma nyɛɛ nyu ɔ nɔ kɛ ba o ngɔ mɔ.’ Yesu ha lɛ heto ke: ‘Ba!’ Kɛkɛ nɛ Petro je lɛ ɔ mi, nɛ e bɔni nyu ɔ nɔ nyɛɛmi! Se e bɔni gbeye yemi nɛ lɔɔ ha e bɔni mumi kɛ yaa nyu ɔ sisi, nɛ Yesu he e yi wami.

Pee se ɔ, Yesu ha nihi akpehi abɔ kpa hu niye ní. Nɛ ngɛ enɛ ɔ mi ɔ lɛɛ e ngɔ abolo kpaago kɛ lo tsɔwi bɔɔ ko kɛ lɛ mɛ. Nɛ a tɔ kaa kekle bi ɔmɛ. Anɛ bɔnɛ Yesu hyɛɛ nihi a nɔ ha a be bua jɔmi lo? Benɛ Yesu ma ba ye nɔ kaa matsɛ nɛ Mawu to ɔ, nɔ́ ko nɔ́ ko be wɔ hiae!