Ni Kasemi 1

Be Nɛ O Maa Pee Ha Kɛ Le Nɔ Nɛ Mawu Ngɛ Hlae

Mini munyu nɛ he hia lɛ ngɛ Baiblo ɔ mi? (1)

Mɛnɛ lɛ ngma Baiblo ɔ? (2)

Mini he je nɛ e sa nɛ o kase Baiblo ɔ? (3)

1. Baiblo ɔ ji ni keeni nɛ he jua wa nɛ je Mawu ngɔ. E ngɛ kaa womi nɛ tsɛ ko nɛ ngɛ suɔmi ngma e bi mɛ. E de ɔ wɔ anɔkuale nɛ kɔ Mawu he—nɔ nɛ e ji kɛ e sisi tomi mlahi. E tsɔɔ wɔ be nɛ a maa pee ha kɛ da nyagbai a nya kɛ bɔ nɛ a maa pee ha kɛ na buajɔ nitsɛ. Baiblo ɔ pɛ lɛ de ɔ wɔ nɔ nɛ e sa nɛ wa pee konɛ wa sa Mawu hɛ mi.—Lala 1:1-3; Yesaia 48:17, 18.

2. Nyumuhi slɔɔtoi maa pee kaa 40 kɛ be nɛ hiɛ pe jeha 1,600 ngma Baiblo ɔ, kɛ je jeha 1513 L.M.B. Womi nyafinyafi 66 lɛ ngɛ mi. Mawu lɛ e kɛ e mumi ɔ ha nimli nɛ a ngma Baiblo ɔ nɛ. A ngma e yi mi munyu se tsapi mɛ nitsɛmɛ a nɔ. Lɔɔ he je ɔ, Mawu nɛ ngɛ hiɔwe ɔ ji Baiblo ɔ Ngmalɔ se tsapi adesa ko ngɛ zugba nɔ.—2 Timoteo 3:16, 17; 2 Petro 1:20, 21.

3. Mawu ha nɛ a hyɛ Baiblo ɔ nɔ nɛ a ngma e ko hu pɛpɛɛpɛ kɛ pue si konɛ a baa yi. A plinti Baibloi fuu pe womi kpahi tsuo. Tsapi nɔ fɛɛ nɔ nɛ e bua maa jɔ he kaa e maa na kaa o ngɛ Baiblo ɔ kasee, se ko ha nɛ lɔɔ tsi o nya. O huɔse si himi kɛ ya neneene maa je le mi nɛ o maa le Mawu kɛ e suɔmi nya nihi nɛ o maa pee ngɛ si temi kɛ womi tsuo se.—Mateo 5:10-12; Yohane 17:3.