Ni Kasemi 2
Mɛnɛ Ji Mawu?
Mɛnɛ ji anɔkuale Mawu ɔ, nɛ mini ji e biɛ? (1, 2)
Mini nɔmlɔ tso e hɛɛ? (3)
Mini ji e suhi titli komɛ? (4)
E sa nɛ wa kɛ amagahi kɛ okadihi tsu ni ngɛ e jami mi lo? (5)
Mini ji blɔhi enyɔ nɛ wa ma nyɛ maa gu nɔ kɛ kase Mawu he ni? (6)
1. Nimli ja nihi fuu. Se Baiblo ɔ de ɔ wɔ kɛ ANƆKUALE Mawu kake pɛ lɛ ngɛ. Lɛ nɛ e bɔ nɔ̀ tsuaa nɔ ngɛ hiɔwe kɛ zugba nɔ. A kɛ nɛ lɛ nɛ e ha wɔ wami he je ɔ, lɛ pɛ ji Nɔ nɛ e sa nɛ wa ja lɛ.—1 Korintobi 8:5, 6; Kpojemi 4:11.
2. Mawu ngɛ sablai fuu se biɛ kake pɛ e ngɛ. Biɛ nɔ ji YEHOWA. A je Mawu biɛ ɔ kɛ je Baiblohi fuu mi nɛ a kɛ sablai kaa NUTSƆ aloo MAWU to nane mi. Se be nɛ a ngma Baiblo ɔ, biɛ Yehowa je kpo ngɛ mi sii 7,000!—2 Mose 3:15; Lala 83:19.
3. Yehowa ngɛ nɔmlɔ tso, se e be kaa wa nɔ ɔ. Baiblo ɔ de kɛ, “Mawu ɔ mumi ji lɛ.” (Yohane 4:24) Mumi ji wami su ko nɛ e nɔ kuɔ pe wa nɔ ɔ. Nɔmlɔ ko nɛ Mawu hyɛ we. Yehowa ngɛ hiɔwe, se e ma nyɛ maa na nihi tsuo. (Lala 11:4, 5; Yohane 1:18) Lɛɛ, mini ji mumi klɔuklɔu ɔ? Tsapi nɔmlɔ ko ji lɛ kaa benɛ Mawu ngɛ ɔ. Se, e ji Mawu ni tsumi he wami.—Lala 104:30.
4. Baiblo ɔ jeɔ Yehowa su kɛ benɛ e ngɛ ha kpo kɛ tsɔɔ wɔ. E tsɔɔ kaa e suhi titli ji suɔmi, dami sane yemi, ni lemi, kɛ he wami. (5 Mose 32:4; Hiob 12:13; Yesaia 40:26; 1 Yohane 4:8) Baiblo ɔ de ɔ wɔ kɛ e naa nɔ mɔbɔ, e mi mi hi, e kɛ tɔmi keɔ, e kɛ nihi keɔ, nɛ e toɔ e tsui si hu nɔ. Wɔ, nɛ wa ji bi mɛ nɛ wa peeɔ tue bomi ɔ, e sa nɛ wa bɔ mɔde nɛ wa kase lɛ.—Efesobi 5:1, 2.
5. E sa nɛ wa kplã si nɛ wa sɔle kɛ ha amagani, fohi, aloo okadihi ngɛ wa jami mi lo? Dabida! (2 Mose 20:4, 5) Yehowa ke e sa nɛ wa ja e nyaake too pɛ. E kɛ nɔ kpa ko aloo nɔ ko bi e nunyami ɔ dlae. Amagahi be he wami ko nɛ a kɛ maa ye bua wɔ.—Lala 115:4-8; Yesaia 42:8.
6. Kɛ wa maa pee kɛɛ kɛ le Mawu nitsɛ? Blɔ kake nɛ wa maa gu nɔ ji kaa wa maa kadi nihi nɛ e bɔ ɔmɛ nɛ wa susu nihi nɛ a deɔ wɔ he kɛ ya tsitsaa. Mawu ni bɔ nihi tsɔɔ wɔ kaa e ngɛ he wami kɛ nilemi fuu nitsɛ. Wa naa e suɔmi ɔ ngɛ nɔ tsuaa nɔ nɛ e pe ɔ mi. (Lala 19:2-7; Romabi 1:20) Blɔ kpa nɛ wa ma nyɛ maa gu nɔ kɛ kase Mawu he nihi ji kɛ gu Baiblo ɔ kasemi nɔ. E de wɔ nihi fuu nɛ tsɔɔ wɔ nɔ nɛ Mawu e ji. E de wɔ e yi mi tomi kɛ nɔ nɛ e ngɛ hlae nɛ wa pee.—Amos 3:7; 2 Timoteo 3:16, 17.
[Fonihi ngɛ ba fa 5]
Wa kase ɔ Mawu he ni kɛ je ni bɔ nihi kɛ Baiblo ɔ mi