Ni Kasemi 3

Mɛnɛ Ji Yesu Kliisto?

Mini he je nɛ a tsɛ Yesu ke Mawu “kleklee” Bi ɔ? (1)

Mini he je nɛ a tsɛ lɛ ke “Munyu ɔ”? (1)

Mini he je nɛ Yesu ba zugba nɔ kaa nɔmlɔ adesa? (2-4)

Mini he je nɛ e pee nyakpɛ ni ɔ? (5)

Mini Yesu maa pee ngɛ huɔse be nɛ ekɛ we mi? (6)

1. Yesu hi hiɔwe kaa mumi mi nɔmlɔ loko e ba zugba nɔ. Lɛ ji nɔ nɛ Mawu bɔ kleklee, nɛ lɔɔ he je nɛ a tsɛ lɛ ke Mawu “kleklee” Bi ɔ nɛ. (Kolosebi 1:15; Kpojemi 3:14) Yesu pɛ ji Mawu Bi nɛ e nyaake bɔ lɛ. Yehowa kɛ Yesu nɛ jama be ɔ mi e ba pee we adesa lolo ɔ tsu ni kaa e ‘ni tsulɔ ga tsɛ’ ngɛ nihi kpai tsuo nɛ e bɔ ngɛ hiɔwe kɛ zugba nɔ mi. (Abɛi 8:22-31; Kolosebi 1:16, 17) Mawu kɛ lɛ tsu ni kaa E nya jelɔ nɔkɔtɔma. Lɔɔ he je nɛ a tsɛ Yesu ke “Munyu ɔ” nɛ.—Yohane 1:1-3; Kpojemi 19:13.

2. Mawu tsɔ E Bi ɔ kɛ ba zugba nɔ kɛ gu e wami nɛ e je kɛ wo Maria fɔmi kotoku mi ɔ nɔ. Lɔɔ ha nɛ Yesu be adesa tsɛ ko. E nɔ he nɛ e na we yayami aloo fatɔmi ko ɔ nɛ. Mawu tsɔ Yesu kɛ ba zugba nɔ ngɛ yi mi tomi etɛ komɛ a he je: (1) Konɛ e ba tsɔɔ wɔ anɔkuale nɛ kɔɔ Mawu he (Yohane 18:37), (2) Konɛ e hɛɛ mluku yemi mi kɛ pi si nɛ e pee nɔ hyɛmi nɔ kɛ ha wɔ nɛ wa nyɛɛ se (1 Petro 2:21), kɛ (3) janɔ se hu konɛ e kɛ e wami sa afɔle nɛ wa ye wa he kɛ je yayami kɛ gbenɔ he. Mini he je nɛ e nɔ he hia?—Mateo 20:28.

3. Kleklee nɔmlɔ, Adam, pee nɔ nɛ Baiblo ɔ tsɛ lɛ kɛ “yayami” kɛ gu Mawu kita nɛ e gbo nɔ tue ɔ nɔ. E nɔ ha Mawu bu lɛ gbenɔ fɔ. (1 Mose 3:17-19) E tɔ fa ngɛ Mawu tɛ nɛ e po ɔ nya, e he sui kɛ pi si hu. E ngmɛ bwɔmi nɔ bɔɔbɔɔ nɛ e gbo. Adam kɛ yayami ha e bimɛ tsuo. Lɔɔ lɛ ha nɛ wa bwɔɔ, hiɔ nu wɔ, nɛ wa gboɔ nɛ. Mini blɔ nɔ a maa gu kɛ he adesa yi wami?—Romabi 3:23; 5:12.

4. Yesu ji adesa nɛ e he su kɛ pi si kaa Adam pɛpɛɛpɛ. Se Yesu be kaa Adam, e bu Mawu tue kɛ pi si ngɛ ka nɛ nya wa po mi. Ngɛ e nɔ he je ɔ, e maa nyɛ nɛ e kɛ e nɔmlɔ tso nɛ he su kɛ pi si ɔ sa afɔle kɛ wo Adam yayami ɔ he hiɔ. E nɔ ji nɔ nɛ Baiblo ɔ tsɛ lɛ kɛ “kpɔmi nɔ” nɛ. Lɔɔ he je ɔ a ma nyɛ maa kpɔ Adam bimɛ kɛ je gbenɔ fɔbumi sisi. A ma nyɛ maa ngɔ nimli tsuo nɛ a na Yesu mi hemi kɛ yemi ɔ he yayami kɛ pa mɛ nɛ a na neneene wami.—1 Timoteo 2:5, 6; Yohane 3:16; Romabi 5:18, 19.

5. Be nɛ e ngɛ zugba nɔ ɔ, Yesu tsa hiɔ tsɛmɛ, e ha nimli nɛ huɔ ye mɛ ni yeni, nɛ e ba kɔɔhiɔ slɔɔtohi nɛ a nya wa si. E tle nimli nɛ a gbo po si. Mini he je nɛ e pee nyakpɛ okadi nɔmɛ? (1) E mi mi saa lɛ ngɛ nimli nɛ a naa nɔ he, nɛ e suɔ nɛ e ye bua mɛ. (2) Nyakpɛ okadi nɛ e peeɔ tsɔɔ kaa Mawu Bi ji lɛ. (3) A tsɔɔ nɔ nɛ e maa pee kɛ ha adesahi nɛ a buɔ tue be nɛ e maa ye Matsɛ ngɛ zugba nɔ.—Mateo 14:14; Marko 2:10-12; Yohane 5:28, 29.

6. Yesu gbo nɛ Mawu tle lɛ si kaa mumi mi bɔ nɔ, nɛ e kpale e se kɛ ho hiɔwe ya. (1 Petro 3:18) Kɛ je lɔɔ se kɛ ma nɔ ɔ, Mawu to lɛ Matsɛ. E bi kɛe nɛ Yesu ma je yayami peeli kɛ nɔnami kɛ je zugba nɔ nɔ.—Lala 37:9-11; Abɛi 2:21, 22.

[Fonihi ngɛ ba fa 7]

Ni tsɔɔmi, nyakpɛ nihi, kɛ e wami tete po nɛ e kɛ ha wɔ piɛ Yesu sɔmɔmi ni tsumi ɔ he