Bɔnɛ O Maa Pee Ha Kɛ Na Anɔkuale Jami Ɔ

Ke o suɔ kaa o pee Mawu huɛ ɔ, e sa nɛ o ngɔ o he kɛ wo jami nɛ Mawu kplɛɛɔ nɔ ɔ mi. Yesu de kaa “anɔkuale jali” ma ja Mawu ngɛ “anɔkuale” mi. (Yohane 4: 23, 24, Somi He Ɔ) Blɔ dadɛ kake pɛ lɛ ngɛ nɛ́ a guu nɔ kɛ jaa Mawu. (Efesobi 4:4-6) Anɔkuale jami kɛ nɔ yaa neneene wami mi, se lakpa jami kɛ nɔ yaa hɛ mi kpatami mi.—Mateo 7:13, 14.

O ma nyɛ ma yo anɔkuale jami ke o hyɛ nimli nɛ a kɛ tsuɔ ní ɔ. Akɛnɛ Yehowa ji nɔ kpakpa heje ɔ, e sa kaa nihi nɛ jaa lɛ hu ɔ, a pee nimli kpakpahi. Kaa bɔnɛ akutu tso kpakpa woɔ akutu kpakpahi ɔ, jã kɛ̃ anɔkuale jami hu peeɔ nihi nimli kpakpahi.—Mateo 7:15-20.

Yehowa huɛmɛ ngɛ bu nɛ mi kuɔ kɛ ha Baiblo ɔ. A le kaa Baiblo ɔ je Mawu ngɔ. A haa nɛ nɔ́ nɛ e deɔ kudɔɔ a si himi, nɛ a kɛ tsuɔ a haomihi a he ní. Baiblo ɔ kɛ̃ a kɛ kaseɔ Mawu he ní. (2 Timoteo 3:16) A bɔɔ mɔde kaa níhi nɛ a fiɛɛɔ ɔ, a maa hi si ngɛ nya.

Yehowa huɛmɛ jeɔ suɔmi kpo kɛ haa a sibi. Yesu je suɔmi kpo kɛ ha nihi kɛ gu Mawu he ní nɛ e tsɔɔ mɛ, kɛ hiɔtsɛmɛ nɛ́ e tsa a nɔ. Nihi nɛ ngɛ anɔkuale jami ɔ mi hu ngɛ suɔmi ha ni kpahi. A gbi ohiafohi aloo nihi nɛ je wɛtso kpahi a mi ɔ he guɛ kaa bɔnɛ Yesu hu pee we ɔ. Yesu de kaa suɔmi nɛ e se nyɛɛli ma je kpo ha a sibi ɔ nɛ nihi kɛ ma yo kaa e kaseli ji mɛ.—Yohane 13:35.

Mawu huɛmɛ ngɛ bumi ha Mawu biɛ, nɛ ji Yehowa a. Ke nɔ ko kua o biɛ tsɛmi ɔ, anɛ jamɛ a nɔ ɔ ma nyɛ maa pee o huɛ kpakpa lo? Dɛbi! Ke wa ngɛ huɛ ko ɔ, waa kɛ e biɛ tsɛɛ lɛ nɛ wa sɛɛɔ e he ní kpakpa kɛ haa ni kpahi. Enɛ ɔ heje ɔ, e sa kaa nihi nɛ suɔ kaa a pee Mawu huɛmɛ ɔ, a ngɔ e biɛ kɛ tsu ní nɛ a tu e he munyu kɛ ha ni kpahi. Yehowa suɔ nɛ waa pee ja.—Mateo 6:9; Romabi 10:13, 14.

Mawu huɛmɛ tsɔɔ ni kpahi Mawu Matsɛ Yemi ɔ he ní kaa bɔnɛ Yesu pee ɔ. Mawu Matsɛ yemi ɔ ji hiɔwe nɔyemi nɛ ma ba pee zugba a paradeiso. Mawu huɛmɛ sɛɛɔ Mawu Matsɛ yemi ɔ he sane kpakpa a kɛ haa ni kpahi.—Mateo 24:14.

Yehowa Odasefoli bɔɔ mɔde kaa a maa pee Mawu huɛmɛ. A ngɛ bumi kɛ ha Baiblo ɔ, nɛ a suɔ a sibi. A ngɛ bumi ha Mawu biɛ nɛ a ngɔɔ kɛ tsɛɛ lɛ, nɛ a tsɔɔ ni kpahi Mawu Matsɛ Yemi ɔ he ní hulɔ. Yehowa Odasefoli lɛ a ngɔ anɔkuale jami ɔ kɛ ngɛ ní tsue ngɛ zugba a nɔ mwɔnɛ ɔ nɛ.